4 Juanṉa' bene' dan' bzoj da' Isaías ben' be' xtiža' Diosen' cani'te, gana' žan: Bena' chṉe' zižje latje dašen', že': “Ḻe gonšagüe' yic̱hjlažda'olen' cont soale gwzenagle c̱he X̱anchon' cate' yide', ḻe cuejyic̱hj da' malen' chonḻe cont yic̱hjlažda'olen' gaquen ca to nez da' ba gosonšagüe'.
5 Gwžin ža cate' yogo' ya'a yegw ca' yesyeyaquen laše', na' no nez da' nacchgua bxoca' yesyeyaquen ḻicha, na' no nez da' nžaš nche'eṉe yesyeyaquen ba'a.
6 Na' yogo'ḻoḻ beṉe' yesacbe'ede' can' chaclaže' Diosen' yebeje' beṉac̱hen' ḻo da' mal.”
7 Na' beṉe' zan ja'aque' gan' gwzoa Juanṉa' cont gwzoe'ne' nis. Na' Juanṉa' gože' ḻegaque': ―Le'e nacchguale beṉe' zgot na' beṉe' gwxiye'. ¿Chaquele guac yelale lao castigw dan' seḻa' Diosen' caten' gone' yeḻa' justis c̱he beṉac̱hen'?
8 Še da' ḻi ba betiṉjele xtoḻa'le, cheyaḻa' gonḻe da' nac güen cont yesacbe'e beṉe' ba boša' yic̱hjlažda'olen'. Na' bitw gonḻe xbab gaquele Diosen' bitw gone' le'e castigw c̱he xtoḻa'len' lagüe da' nacle xi'iṉ diaža c̱he da' Abrahanṉa'. Bitw ṉacho ḻeca chyažje Diosen' le'e. Guac gone' cont yej quinga yesyeyaquen xi'iṉ diaža c̱he da' Abrahanṉa'.
9 Ca nac le'e, še bi chonḻe can' chazlaže' Diosen', zaca'leble ca to yag frut da' bibi chbia. Na' yogo'te yag frut da' bibi chbia, c̱hog x̱an yaga' ḻen na' gwzeyen'.
10 Nach beṉe' ca' chosozenag xtiže'na' goseṉabde' Juanṉa', gose'ene': ―¿Bica' da' cheyaḻa' gonto'?
11 Na' gože' ḻegaque': ―Ben' nape' c̱hope camis cheyaḻa' gwnežjue' ton c̱he beṉe' bi de c̱he'. Na' ḻecze ca' c̱he ben' de da' gagüe', cheyaḻa' gwnežjue' c̱he ben' bi de gagüe'.
12 Na' cate' to c̱hope beṉe' güec̱hixjw ca' jasebigue' cont gwzoa Juanṉa' ḻegaque' nis, na' gose'ene': ―Maestrw, ¿bica' da' cheyaḻa' gonto'?
13 Na' gože' ḻegaque': ―Bitw gwc̱hixjwchle ca da' cheyaḻa' yeseyixjue'.
14 Na' to c̱hope beṉe' ca' zjanac soldadw ḻecze goseṉabde' ḻe', gose'ene': ―¿C̱hix neto'? ¿Bica'ch da' cheyaḻa' gonto'? Na' Juanṉa' gože' ḻegaque': ―Bitw ca'ale da' de c̱he beṉe', na' ṉeca gonḻaže'le len da' yosbague'le beṉe' cont ca'ale xmechwgaque'. Ḻe gon banez len laxjwle.
