3 Juan onentinemia itech nochteh altepemeh non okatkah itempa n río Jordán. Ye okinmiliaya makipatlakah innemilis iwa mamokuaatekikah para Dios makintlapojpolwi de intlajtlakolwah.
4 Ijkó omochi kemi ijkuilitok itech itlajkuilol n profeta Isaías: Se tlájtoli mokaki chikawak kan amaka chanti: “Xikyektlalilikah iojwiu n Toteko, Xikmilawakah iojwiu.
5 Kan tlawewejkatla, xikixmanakah, nochi tepemeh iwa n tepetsitsinteh noiwa nonkinmixmanaskeh, n ojmeh nenekuiltikeh xikinmilawakah, iwa n ojmeh kan tlalchikototolonka noiwa xikinmixmanakah.
6 Iwa nochteh n tlaltikpaktlakah kitaskeh kenomi techmakixtis Dios.”
7 Miakeh tlakah owalayah inawak Juan, para makinkuaateki iwa ye okimiliaya: —¡Nomejwah kemi nonkoameh! ¿Akin onomechili nonmakisaskeh imak tlaijyowílistli temojti non nomopah wits?
8 Xikchiwakah tlan kuali para mamota milák yononmoyolkopkeh inawak Dios, iwa amo xikmolikah: “Tejwah titepilwah de Abraham.” De milajka nomechilia, Totajtsi Dios weletis kinkopas ninteh temeh ipilwah n Abraham.
9 N acha kajki inakastla n kuawitl, iwa nochi kuawitl non amo kitemaka kuali itlakilo, motsontekis iwa motlamotlas ijtik tletl.
10 N tlakah okitlajtlaniayah: —¿Tlan tikchiwaskeh?
