31 Sa ni tuhasa Pedrore Jesu ohõ saha ni yahuahye: —Simo Pedro yʉhʉre tʉhoya. Mʉsare ijipihtinare watĩno yʉhʉre cohãgʉ̃ ye duare. Trigo wese cjʉ̃no trigore tiquiro wejẽ site cohãriro sahata mʉsare ijipihtinare watĩno ñano ye duare. Sa ye duaro, Cohãcjʉ̃re sinidi.
32 Tiquiro sa sinigʉ̃ ihñagʉ̃ yʉhʉ pehe Cohãcjʉ̃re sini basaʉ mʉhʉre. Yʉhʉre mʉhʉ wacũ tutua duhueratire sini basaʉ mʉhʉre. Sa yegʉ mʉhʉ yʉhʉ mehna cjʉ̃ pari turi ijigʉ yeequinare yedohoya mʉhʉ, yʉhʉre tiquina wacũ tutua nemoati, niahye Jesu Pedrore.
33 Tiquiro sa nigʉ̃ Pedro yʉhtiahye: —Pʉhto, yʉhʉre tiquina peresu yepegʉ̃ta, yʉhʉre tiquina wejẽ duepegʉ̃ta mʉhʉ mehna cjʉ̃ ijiitja, niahye Pedro.
34 Jesu yʉhtiahye: —Pedro, mʉhʉre niita niaja. Mia ñami canaca tiquiro yahuato pano “Jesure masiedaja”, nigʉta mʉhʉ apequinare. Ihtia taha sa nigʉta mʉhʉ, niahye Jesu Pedrore.
35 Sa ni tuhasa Jesu tiquiro buheyequinare yahuahye: —¿Sohõ ijiri pje niñeru ajuro mariena, pajiri ajuro mariena, dahpo suhti mariena mʉsare yʉhʉ ohogʉ̃ apee boro dʉhsari mʉsare? ni sinituahye Jesu. —Ne ʉsãre yabe dʉhsaerari, ni yʉhtiahye tiquina.
36 —Ti pjere mʉsare dʉhsaerapegʉ̃ta yojopʉ pehere niñeru ajurore cʉona tire neña. Pajiri ajurore cʉona gʉ̃hʉ neña. Sa yena mʉsare ñoseni pjĩ mariedagʉ̃ mʉsa suhtire duana ti pjĩne dúya.
37 Ahrire mʉsare nii niaja. Cohãcjʉ̃ yere tiquina ojoari pũpʉ tiquina nidiro sahata yʉhʉre sa waharo cahmene. Ohõ saha niahye ti pũpʉ: “ ‘Tiquiro dutiyere yʉhdʉdʉcayequina mehna cjʉ̃no ijire’, nieta masa”, ni, ojoahye, niahye Jesu.
38 —Ihñaña pʉhto. Pʉa pjĩ ñoseñe pjĩnine cʉoaja ʉsã, niahye tiquiro buheyequina. —To punota ijire, ni yʉhtiahye Jesu.
39 Sa ye Jesu tiquiro sa yeducuriro sahata Olivo wame tidʉ cʉnʉpʉ wahahye. Tiquiro sa wahagʉ̃ tiquiro buheyequina tiquiro mehna wahahye.
40 Topʉ esaro tiquiro tiquinare yahuahye: —Cohãcjʉ̃re siniña mʉsa ñano yeratire, niahye Jesu tiquinare.
41 Sa ni tuhasa tiquiro dihita mehenogã waha nemo, dʉsepe curi mehna quehe sa, Cohãcjʉ̃re siniahye:
42 —Mai, yʉhʉ ñano yʉhdʉatire ye dueragʉ yeracãhña. Yʉhʉ sa niepegʉ̃ta yʉhʉ cahmeñe pehere yeracãhña. Mʉhʉ pehe masine. Mʉhʉ cahmeno saha yeya yʉhʉre, ni siniahye Jesu Cohãcjʉ̃re.
43 Tiquiro sa sinigʉ̃ ʉhmʉsepʉ ahtariquiro angel Jesure bajua, yedohoahye tiquirore.
44 Sa yero Jesu ñano jeripohna ti, tutuaro mehna Cohãcjʉ̃re siniahye. Sa yero tiquiro asi ti cuhsaye dii pjeri yero saha tiquirore wijia, yehpapʉ bora quehe sahye.
45 Cohãcjʉ̃re sini bato ti, wahcãdʉca sa, tiquiro buheyequina cahapʉ wihiahye. Tiquiro wihigʉ̃ tiquiro buheyequina tutuaro bʉjʉa witiyequina ijiye, carĩñe niahye.
46 Sa yero Jesu tiquinare ohõ saha ni yahuahye: —¿Dʉhsena carĩajari mʉsa? Wahcãña. Cohãcjʉ̃re siniña mʉsa, “Ñano yeari”, nina, niahye Jesu tiquinare.
47 Tiquiro sa ni yahuducuri watoa masa peyequina wihiahye. Juda doce buheyequina mehna cjʉ̃no ijimediquiro masare ʉhmʉ tã cãhtariquiro ijiahye. Sa yero tiquiro Jesu cahapʉ wihi, wahsupu ihmiahye tiquirore.
48 Tiquiro sa ihmigʉ̃ Jesu tiquirore sinituahye: —¿Juda, yʉhʉ masʉre Cohãcjʉ̃ ohorigʉre yʉhʉre ihña tuhtiyequinare ihñogʉ yʉhʉre wahsupu ihmiñe mehna sa yeajari mʉhʉ? niahye Jesu.
49 Tiquiro sa nidi bato Jesu buheyequina masa Jesure tiquina ñeheatire masiñe, tiquirore sinituahye: —¿Pʉhto, ʉsã ñoseñe pjĩni mehna tiquina mehna cahmequema? niahye tiquina.
50 Tiquina sa nidi bato ihcãquiro Jesu buheyequina mehna cjʉ̃no pehe pahia pʉhtoro cahacjʉ̃nore tiquiro ñoseni pjĩ mehna tiquiro cahmonore poto pehe ijiri cahmonore dʉte pahrẽ cãhye.
51 Tiquiro sa yegʉ̃ ihñano Jesu tiquirore ohõ saha niahye: —Sa yeracãhña, niahye. Ni, cahacjʉ̃no cahmono ijiriropʉ ña ohõahye. Tiquiro ña ohõgʉ̃ta cahmono mʉnano sahata ijiahye tja.
52 Sa ye tuhasa pahia pʉhtoare Cohãcjʉ̃ wʉhʉ cjẽna surara pʉhtoare, bʉcʉna gʉ̃hʉre tiquirore ñeheñe ahtariquinare Jesu sinituahye: —¿Dʉhse ijiro boro mʉsa ñoseñe pjĩni, yucʉ tiãri mehna yaqueriquirore tiquina yeriro saha mʉsa yʉhʉre ñehena ahtajari?
53 Decoripe Cohãcjʉ̃ wʉhʉpʉ mʉsa mehna yʉhʉ ijigʉ̃, mʉsa yʉhʉre ñehedari. Sa ijiepegʉ̃ta yojopʉre mʉsa ya deco yʉhʉre mʉsa ñano yeati deco ijire. Yojopʉ watĩno tiquiro ñano yeati deco gʉ̃hʉ ijire, niahye Jesu.
54 Tiquina Jesure ñehe tuhasa pahia pʉhtoro ya wʉhʉpʉ neahye tiquina tiquirore. Tiquina topʉ neagʉ̃ Pedro yoaropʉ tiquinare ihña nʉnʉ tãhye.
55 Pʉhtoro ya wʉhʉpʉ esa, topʉ wʉhʉ cahapʉ ijiri paapʉ, quehnoari paa decopʉ peca wijiãhye apequina. Tiquina wijiãgʉ̃ ihñano Pedro peca cahapʉ dujiyequina mehna dujiahye.
56 Tiquiro dujiri bato ihcãcoro cahacjõno tiquirore quehnoano ihña, apequinare ohõ saha ni yahuahye: —Ahriquiro gʉ̃hʉ tiquiro mehna ijiri, niahye ticoro.
57 Ticoro sa nigʉ̃ tʉhoro Pedro yʉhtiahye: —Numio, tiquirore ne masiedaja yʉhʉ, nimahye tiquiro.
58 Came cjũnogã apequiro Pedrore ihña, ohõ saha ni yahuahye: —Mʉhʉ gʉ̃hʉ tiquina mehna cjʉ̃ ijire, niahye tiquiro. —Ne ijieraja, nimahye Pedro.
59 Ihcã hora bato apequiro apequinare ohõ saha ni yahuahye: —Ijirota ijire. Ahriquiro Galilea cjʉ̃no ijire. Sa yero potota Jesu mehna ijiri ahriquiro gʉ̃hʉ, niahye tiquiro apequinare.
60 Tiquiro sa nigʉ̃ Pedro yʉhtiahye: —Ne, mʉhʉ nidiquirore masiedaja yʉhʉ, ni yʉhtiahye Pedro. Tiquiro sa ni yahuducuri watoa canaca yahuahye.
61 Tiquiro yahugʉ̃ta Jesu wʉhʉ cahapʉ ijiriquiro Pedrore majare ihñadoqueoahye. Tiquiro sa yegʉ̃ Pedro pehe Jesu tiquiro nidire wacũahye. “Mia ñami canaca tiquiro yahuato pano, ‘Yʉhʉ Jesure masiedaja’, nigʉta mʉhʉ. Ihtia taha sa nigʉta mʉhʉ”, Jesu tiquiro nidire wacũahye Pedro.
62 Sa wacũno Pedro topʉ wijia ta, tutuaro utiahye.
