SAN LUCAS 22:19-52

¹⁹Nu loꞌo cua ntsuꞌu xlyá biꞌ yaꞌ Jesús, liꞌ ndya xlyaꞌbe jiꞌi̱ ycuiꞌ Ndyosi, cuati ngusaꞌbe yu xlyá biꞌ, chaꞌ tacha jiꞌi̱ nguꞌ. Liꞌ nchcuiꞌ yu loꞌo nguꞌ: ―Nde laca naꞌ, ycuiꞌ cuañaꞌ naꞌ laca re. Na cua nda ycuiꞌ Ndyosi Sti naꞌ ꞌna chaꞌ cajaa naꞌ chaꞌ caca tsoꞌo chaꞌ jiꞌi̱ cuꞌma̱. Tyiꞌu tiꞌ ma̱ ꞌna loꞌo cacu ma̱ xlyá re.

²⁰La cuiꞌ juaꞌa̱ nguaꞌni Jesús loꞌo vaso biꞌ loꞌo ndye ndyacu nguꞌ. ―Loꞌo coꞌo ma̱ vino re tyiꞌu tiꞌ ma̱ jiꞌi̱ chaꞌ cucui nu cua quiñi ti jiꞌi̱ ycuiꞌ Ndyosi loꞌo ma̱ ―nacui̱ Jesús liꞌ―. Nu loꞌo cajaa naꞌ lo crusi, liꞌ tyalú tañi naꞌ xquiꞌya cuꞌma̱.

²¹’Pana ngaꞌa̱ yu juani la cuiꞌ yu nu cujuiꞌ cresiya ꞌna jiꞌi̱ nguꞌ cuxi; stuꞌba ti ngaꞌa̱ yu biꞌ toꞌ mesa re loꞌo naꞌ ―nacui̱ Jesús liꞌ―.

²²Ngaꞌa̱ chaꞌ tsaꞌa naꞌ nu cua lijya̱a̱ chaꞌ caca naꞌ ñati̱, tsaꞌa̱ tyucui̱i̱ su cua nscua cuayáꞌ chaꞌ tsaꞌa̱ cuentya jiꞌi̱ ycuiꞌ Ndyosi Sti naꞌ. Pana tyaꞌna tsa nu quiꞌyu nu cua cujuiꞌ ti cresiya ꞌna jiꞌi̱ nguꞌ cuxi biꞌ.

²³Liꞌ nguxana nguꞌ nchcuiꞌ nguꞌ loꞌo tyaꞌa ndiꞌi̱ ti nguꞌ: ―¿Tilaca laca nu tya jiꞌi̱ mstru jiꞌna re yaꞌ nguꞌ xñaꞌa̱? ―nacui̱ nguꞌ.

²⁴Loꞌo ti nguxana nguꞌ nchcuiꞌ tyucuaa tiꞌ nguꞌ loꞌo tyaꞌa ndyaca tsaꞌa̱ ti nguꞌ, nchcuiꞌ nguꞌ chaꞌ jiꞌi̱ tilaca nu caca loo la jiꞌi̱ tyaꞌa nguꞌ.

²⁵Laja liꞌ xaꞌ nchcuiꞌ Jesús loꞌo nguꞌ chaca quiyaꞌ: ―Cua ñaꞌa̱ ca xuꞌna chalyuu, tsoꞌo tsa nclyo biꞌ cña jiꞌi̱ ñati̱ jiꞌi̱; ñati̱ nu tsoꞌo tsa nduꞌni laca nu laca loo biꞌ, nacui̱ nguꞌ liꞌ.

²⁶Pana cuꞌma̱ ni, ná ntsuꞌu chaꞌ cuaꞌni ma̱ juaꞌa̱ loꞌo tyaꞌa ma̱. Ndiꞌya̱ cuaꞌni ma̱ tsoꞌo la: nu loꞌo ntiꞌ ma̱ chaꞌ ndulo la chaꞌ jiꞌi̱ ma̱ que chaꞌ jiꞌi̱ tyaꞌa ma̱ ni, liꞌ ngaꞌa̱ chaꞌ cuaꞌni ma̱ ñiꞌya̱ si laca ma̱ nu cuañiꞌ la jiꞌi̱ tyaꞌa ma̱ ―nacui̱ Jesús jiꞌi̱ nguꞌ biꞌ―. Juaꞌa̱ cuꞌma̱ nu ntiꞌ ma̱ culo ma̱ cña jiꞌi̱ tyaꞌa ma̱ ni, ngaꞌa̱ chaꞌ cuaꞌni ma̱ cña cuentya jiꞌi̱ lcaa tyaꞌa ma̱.

²⁷¿Tilaca laca nu ndulo la chaꞌ jiꞌi̱ lacua? ¿Ha nu ntucua toꞌ mesa chaꞌ cacu? ¿Ha msu nu nxacu jiꞌi̱ yu? Chañi chaꞌ yu nu ntucua toꞌ mesa ni, biꞌ laca nu ndulo la chaꞌ jiꞌi̱, chaꞌ biꞌ laca xuꞌna nguꞌ. Pana nu naꞌ ni, ñiꞌya̱ si laca naꞌ sca msu jiꞌi̱ ma̱, juaꞌa̱ ti ndiꞌi̱ naꞌ laja cuꞌma̱ ―nacui̱ Jesús―.

²⁸’Cuꞌma̱ ni, cua ndiꞌi̱ ma̱ loꞌo naꞌ lcaa tyempo loꞌo nchcubeꞌ naꞌ ndiꞌi̱ naꞌ chalyuu re,

²⁹biꞌ chaꞌ ta naꞌ sca cña tsoꞌo nu cuaꞌni ma̱ chaꞌ caca ma̱ cña loꞌo naꞌ; cña biꞌ caca ñiꞌya̱ laca cña nu nda Sti naꞌ ꞌna, chaꞌ caca naꞌ loo.

³⁰Ngaꞌa̱ chaꞌ stuꞌba ti cacu ma̱ coꞌo ma̱ loꞌo naꞌ ca su tlyu biꞌ su tyucua naꞌ; ngaꞌa̱ chaꞌ stuꞌba ti tyiꞌi̱ ma̱ loꞌo naꞌ nu loꞌo cuaꞌni cuayáꞌ naꞌ jiꞌi̱ lcaa ñati̱; loꞌo juaꞌa̱ cuaꞌni cuayáꞌ ma̱ jiꞌi̱ tyaꞌa ñati̱ ma̱, nu tii tyucuaa tyaꞌa taju nguꞌ Israel tyaꞌa na.

³¹Loꞌo liꞌ nchcuiꞌ Jesús loꞌo Simón Pedro biꞌ: ―Simón ―nacui̱―, laca chaꞌ ñiꞌya̱ laca si cua ngüijña Satanás chacuayáꞌ chaꞌ cuaꞌni lyaꞌ tiꞌ jiꞌi̱ lcaa cuꞌma̱; cua ntiꞌ yu cuaꞌni cuayáꞌ yu jiꞌi̱ ma̱, chaꞌ xcutsi̱i̱ yu jiꞌi̱ ma̱. Ñiꞌya̱ laca loꞌo nscui̱i̱ nguꞌ jiꞌi̱ siꞌyu trigo chaꞌ tyubii jiꞌi̱, juaꞌa̱ cuaꞌni yu loꞌo ma̱, ntiꞌ yu.

³²Pana cua ngüijña naꞌ jiꞌi̱ ycuiꞌ Ndyosi Sti naꞌ chaꞌ jinuꞌu̱ Pedro, chaꞌ ná tye chaꞌ jlya tiꞌ nuꞌu̱ ꞌna. Loꞌo cua nteje tacui chaꞌ cuxi biꞌ hi̱, nu loꞌo xaꞌ chcuiꞌ nuꞌu̱ chaꞌ ꞌna, liꞌ taca xtyucua nuꞌu̱ jiꞌi̱ xaꞌ la tyaꞌa ma̱ chaꞌ tsoꞌo la xñi nguꞌ chaꞌ ꞌna.

³³―Cusuꞌ ―nacui̱ Simón liꞌ―, ná nduꞌni chaꞌ jnaꞌ masi tsaꞌa̱ loꞌo nuꞌu̱ neꞌ chcua̱, masi cajaa naꞌ loꞌo nuꞌu̱ ―nacui̱ jiꞌi̱ Jesús.

³⁴―Ndiꞌya̱ nchcuiꞌ naꞌ loꞌo nuꞌu̱ juani, Pedro ―nacui̱ Jesús jiꞌi̱―, chaꞌ nu loꞌo tya lyiji xiꞌya ndyeꞌe talya juani, liꞌ sna quiyaꞌ ñacui̱ nuꞌu̱ chaꞌ ná nslo nuꞌu̱ ꞌna.

³⁵Liꞌ nchcuane Jesús jiꞌi̱ nguꞌ: ―Nu loꞌo ngulo naꞌ cña jiꞌi̱ ma̱ chaꞌ tsaa ma̱ xaꞌ quichi̱ nu ná loꞌo cujui̱ cñi jiꞌi̱ ma̱, ná loꞌo xaꞌ cujui̱, ná loꞌo caña jiꞌi̱ ma̱, ¿ha ntsuꞌu na nu lyiji jiꞌi̱ ma̱ liꞌ? ―Ná sca na lyiji jiꞌi̱ ya liꞌ ―nguxacui̱ nguꞌ chaꞌ jiꞌi̱.

³⁶Liꞌ nacui̱ Jesús jiꞌi̱ nguꞌ: ―Juaꞌa̱ ngua tuꞌni, pana xaꞌ ñaꞌa̱ ngaꞌa̱ chaꞌ cuaꞌni ma̱ juani. Nu cuꞌma̱ nu ntsuꞌu cujui̱ cñi jiꞌi̱ ma̱ ni, loꞌo biꞌ cuiꞌya ma̱ tsaa ma̱, loꞌo xaꞌ cujui̱ loꞌo; si ná ntsuꞌu maxtyi cusu̱u̱ jiꞌi̱ ma̱, ngaꞌa̱ chaꞌ cujuiꞌ ma̱ steꞌ ma̱ chaꞌ cuiꞌya ma̱ maxtyi.

³⁷Juaꞌa̱ chaꞌ nchcuiꞌ naꞌ loꞌo ma̱ chaꞌ ngaꞌa̱ chaꞌ tyuꞌu tucua chaꞌ cuxi nu nchcuiꞌ quityi cusuꞌ chaꞌ caca ꞌna. Ndiꞌya̱ nscua chaꞌ: “Ñiꞌya̱ nu nduꞌni nguꞌ loꞌo ñati̱ cuxi, juaꞌa̱ cuaꞌni nguꞌ loꞌo ycuiꞌ Cristo”. Lcaa chaꞌ nu nscua chaꞌ caca ꞌna, juaꞌa̱ caca ꞌna tuꞌni ―nacui̱ Jesús jiꞌi̱ nguꞌ.

³⁸Liꞌ nacui̱ nguꞌ biꞌ jiꞌi̱: ―Cusuꞌ, nde ntsuꞌu tucua tyaꞌa maxtyi cusu̱u̱ ―nacui̱ nguꞌ. ―Cuayáꞌ cua lacua ―nacui̱ Jesús liꞌ.

³⁹Liꞌ nduꞌu Jesús ndyaa yu ca lo caꞌya Olivos, ñiꞌya̱ nu nduꞌni ti yu. Loꞌo nu nguꞌ nu ndyaca tsaꞌa̱ jiꞌi̱ biꞌ, nduꞌu lcaꞌa̱ nguꞌ jiꞌi̱ yu liꞌ.

⁴⁰Nu loꞌo ndyalaa nguꞌ ca biꞌ, liꞌ nacui̱ Jesús jiꞌi̱ nguꞌ: ―Chcuiꞌ ma̱ loꞌo ycuiꞌ Ndyosi Sti naꞌ chaꞌ ná tyiji̱loo nu xñaꞌa̱ jiꞌi̱ ma̱ ―nacui̱.

⁴¹Liꞌ nduꞌutsuꞌ Jesús nde slo nguꞌ ñaꞌa̱ cuayáꞌ nu tyalaa sca quee cu̱ na, ca biꞌ ndyatu̱ sti̱ꞌ Jesús chaꞌ chcuiꞌ loꞌo ycuiꞌ Ndyosi.

⁴²―Sti naꞌ ―nacui̱ yu―, ¿ha ná ntsuꞌu xi xaꞌ la ñaꞌa̱ nu caca cuaꞌni naꞌ cña re, chaꞌ ngaꞌaa chcubeꞌ la naꞌ loꞌo cña tlyu re jinuꞌu̱? ―nacui̱ Jesús jiꞌi̱ ycuiꞌ Ndyosi Sti yu―. Pana ntiꞌ naꞌ chaꞌ cuaꞌni naꞌ cua ñaꞌa̱ ca cña nu ntiꞌ nuꞌu̱ chaꞌ cuaꞌni naꞌ.

⁴³Liꞌ nduꞌu tucua sca xca̱ nu ngutuꞌu slo ycuiꞌ Ndyosi nde cua̱, chaꞌ ta la juersa jiꞌi̱ Jesús.

⁴⁴Nu loꞌo lye tsa nchcubeꞌ Jesús, liꞌ lye la nchcuiꞌ yu loꞌo ycuiꞌ Ndyosi. Loꞌo liꞌ ntyucua jatá Jesús, ndyalú nchcuaꞌ lo yuu; ñiꞌya̱ si nchcuaꞌ tañi ycuiꞌ, juaꞌa̱ ñaꞌa̱.

⁴⁵Ndye nchcuiꞌ Jesús loꞌo ycuiꞌ Ndyosi Sti yu, liꞌ nguxtyu̱u̱ yu ñaa yu slo nu nguꞌ nu ndyaca tsaꞌa̱ jiꞌi̱ yu. Liꞌ nquije nguꞌ jiꞌi̱ yu, ndiꞌi̱ nguꞌ lajaꞌ nguꞌ chaꞌ ndye juersa jiꞌi̱ nguꞌ, chaꞌ xñiꞌi̱ tsa tiꞌ nguꞌ.

⁴⁶Liꞌ nacui̱ yu jiꞌi̱ nguꞌ: ―¿Ni chaꞌ laca ndiꞌi̱ ma̱ lajaꞌ ti ma̱? Tyatu̱ clya ma̱ chaꞌ chcuiꞌ ma̱ loꞌo ycuiꞌ Ndyosi, chaꞌ ná tyiji̱loo nu xñaꞌa̱ jiꞌi̱ ma̱.

⁴⁷Tya nchcuiꞌ ca Jesús loꞌo nguꞌ biꞌ, liꞌ ndyalaa quiñaꞌa̱ tsa ñati̱. Nu naa Judas biꞌ, tsaca yu tyaꞌa nu tii tyucuaa tyaꞌa nguꞌ nu ndyaca tsaꞌa̱ jiꞌi̱ Jesús ni, nguluꞌu yu tyucui̱i̱ jiꞌi̱ nguꞌ quiñaꞌa̱ biꞌ. Ñaa yu ca slo Jesús chaꞌ chcuichaꞌ yu sacaꞌ Jesús.

⁴⁸Liꞌ nchcuiꞌ Jesús loꞌo yu biꞌ: ―Judas ―nacui̱―, ¿ha biꞌ chaꞌ chcuichaꞌ nuꞌu̱ ꞌna chaꞌ tya nuꞌu̱ ꞌna yaꞌ nguꞌ cuxi, naꞌ nu cua nda Ni ꞌna lijya̱a̱ chaꞌ caca naꞌ ñati̱?

⁴⁹Loꞌo naꞌa̱ nguꞌ nu ndu̱ loꞌo Jesús ñiꞌya̱ caca chaꞌ biꞌ, liꞌ nchcuane nguꞌ jiꞌi̱ yu: ―Cusuꞌ ―nacui̱ nguꞌ―, ¿ha cuaꞌa ya jinuꞌu̱ loꞌo maxtyi, chaꞌ ná ca̱a̱ nguꞌ cua?

⁵⁰Liꞌ ngusicua̱ tsaca tyaꞌa nguꞌ biꞌ maxtyi jiꞌi̱ yu, ngusiꞌyu yu jyaca̱ sca msu jiꞌi̱ xuꞌna sti joꞌó; ngusiꞌyu cuꞌ yu scuaꞌ jyaca̱ laꞌa tsuꞌ cui̱ jiꞌi̱ yu.

⁵¹Liꞌ nacui̱ Jesús jiꞌi̱ nguꞌ: ―Cuayáꞌ tsa lo cua ti. Ta tiꞌi̱ ma̱ maxtyi jiꞌi̱ ma̱. Liꞌ ngusta yaꞌ Jesús lo scuaꞌ jyaca̱ msu biꞌ, ngua tsoꞌo ca scuaꞌ jyaca̱ yu liꞌ.

⁵²Loꞌo ti nchcuiꞌ Jesús loꞌo nguꞌ sti joꞌó nu laca loo, loꞌo nguꞌ nu laca cña neꞌ laa, juaꞌa̱ loꞌo nguꞌ cusuꞌ jiꞌi̱ quichi̱, lcaa nguꞌ nu ñaa chaꞌ tyaa loꞌo nguꞌ jiꞌi̱: ―¿Ha na nduꞌu cuꞌma̱ lijya̱ ma̱ loꞌo maxtyi jiꞌi̱ ma̱, loꞌo yaca jiꞌi̱ ma̱, chaꞌ quijiꞌi̱ yaca ma̱ ꞌna ñiꞌya̱ nu ntyijiꞌi̱ na jiꞌi̱ sca cuaana?