6 ―Yúguꞌtë lë ni rléꞌiliꞌ, huadxín dza catiꞌ cutur ugáꞌn ni guiöj lahui lzëꞌi, le lusnít gdauꞌ ni bunách.
7 Niꞌr gulanabnëꞌ Jesús, taꞌnë́ꞌ: ―Bönniꞌ Usëdi, ¿batx gac lë ni? ¿Bizxa gac bëꞌ chzoa gac cni?
8 Bubiꞌë didzaꞌ Jesús, rnëꞌ: ―Gul‑gún chiꞌi cuinliꞌ, qui nadxi nu siꞌ yeꞌi lbiꞌiliꞌ, le laꞌlaꞌquëꞌ bönniꞌ zian, laꞌzíꞌ laquëꞌ ca leaꞌ nedaꞌ, laꞌnë́ꞌ nacquëꞌ Cristo, len laꞌnë́ꞌ: “Chzaꞌ gal‑laꞌ dza udx.” Nedaꞌ rëpaꞌ lbiꞌiliꞌ: Cutu tséajlenliꞌ lequëꞌ.
9 Catiꞌ yö́niliꞌ rac gdil‑l, len taꞌdáꞌbagaꞌ yúlahuiꞌ bunách, cutu gadxi gdzö́biliꞌ, le run bayúdx lac ziꞌal le cni, san cutu zuítëni dza udx.
10 Niꞌr rëꞌ caꞌ lequëꞌ: ―Til‑l tu yödz len yetú yödz, atiꞌ bunách tu ga nu rna bëꞌ laꞌdil‑len bunách yetú ga nu rna bëꞌ.
