6 Zacarías ne zru'ule̱' Elisabet gulaque̱' xrlátaje lau Dios, ne dxelune̱' ca zaj naca da bdxixruj bea Xránadxu, ne ca da naxúaj na lu da gunné̱'. Ca'an guca, quebe nu guzeque gagu zria le̱' lau Dios.
7 Quebe nu zrí'ine̱' chilá', lawe' da naca Elisabet na' nu'ula wizre, na' dxúpate̱' zaj bezúale̱'e̱ gula.
8 Tu zra, gate belexala bxruze ca' naga nababa Zacarías xelune̱' zrin lu xel-la bxruze chee̱' lau Dios,
9 cáte̱ze naca da dxelún bxruze ca', na' bexala Zacarías chu'e̱ lu lataj lá'azxa chee̱ Xránadxu lu xudau' chee̱ guzezxe̱' xala.
10 Dxácate̱ na' dxezxe xala na', ca naca benne' ca' zaj zra' chalé'ajla dxuluchálajle̱ne̱' Dios.
11 Nadxa ble'e lau tu gubáz chee̱ xabáa chee̱ Xránadxu, ze̱' chalá'a xabe̱la chee̱ cugu naga zría xala dxezxe na.
12 Ca ble'e Zacarías gubáz chee̱ xabáa na', guzúe̱' ste̱be, ne bzrébele̱'e̱.
13 Gubáz chee̱ xabáa na' guzre̱' le̱': ―Zacarías, quebe zrebu', lawe' da ba ben Dios dizra' da dxuchálajle̱nu' Le̱', na' nu'ula chiu', Elisabet, walaj tu zri'ine̱', bi na' guzú' labe' Juan.
14 Wabéle̱'e̱nu', ne gaca chiu' tu da ba neza zrente̱, na' benne' zan xelebene̱' lawe' da ba gulaj bidu na'.
15 Ca'an gaca lawe' da gaca zri'inu' szrente̱ lau Dios. Quebe xí'ajbe' xrise uva wal-la, u da dxusuzre na bénneache, na' gate gálajte̱be' tu súale̱zqueze Be' Lá'azxa nen le̱be'.
16 Ne̱ chee̱ le̱be' benne' zan xelexaque̱' bi chee̱ Xránadxu Dios.
17 Juan nigá quia laube' lau Xránadxu, na' Be' na', ne xel-la waca da gulezúale̱ na Elías, bénnea' bchálaje̱' waláz chee̱ Dios gate nate, xelezúale̱ na le̱be', chee̱ guzúabe' tuze benne' ca' zaj naque̱' xra xrna nen zrí'ine̱', ne chee̱ gulé'ebe' benne' dxeledábague̱' Dios chee̱ xelune̱' ca dxenná xrtizra' Dios. Ca'an gaca, gucá'ana cháwebe' bénneache chee̱ xelezí' lu ne̱'e̱ Xránadxu.
18 Zacarías na' bche̱be̱' gubáz chee̱ xabáa: ―¿Ájazra gaca nezda' gaca caní? Neda' ba nagúlale̱'a, ne cá'anqueze naca nu'ula chia'.
19 Na' beche̱be gubáz chee̱ xabáa na': ―Neda' naca' Gabriel, ne naca' we̱n zrin chee̱ Dios. Le̱' gusel-le̱' neda' chee̱ guchálajle̱na' lue', ne guzenda' lue' dizra' chawe' nigá.
20 Na'a, lawe' da quebe guxéajle̱'u da gucha' lue', xegá'anu' quebe gaca nníu' cadxa galaj zri'inu'. Caní gaca na ca zrinte̱ zra chee̱ na.
21 Dxácate̱ na' zaj zra' benne' ca' chalé'ajla, dxelebeze̱' Zacarías, ne dxelexebánene̱' lawe' da dxezréle̱'e̱ne̱', quebe dxedxúaje̱' lu lataj lá'azxa.
22 Gate bedxúaj Zacarías, québedxa dxaca nnie̱'. Nadxa guleque bé'ene̱' ba ble'e Zacarías tu da ble'e Dios le̱' lu lataj lá'azxa na'. Na' le̱' bta ná'ase̱', lawe' da quebe dxaca nnie̱'.
23 Ca xeajsé̱ chee̱ zra ca' dxal-la' gun Zacarías zrin chee̱ xudau', na' bezé̱'e̱ zexíaje̱' lizre̱'.
24 Ca gudé na' zru'ule̱' Elisabet ba zue̱' zi'i, na' quebe bdxúaje̱' lataj bchina' chie̱' ca gazxu' beu', na' dxenné̱' lu lázrdawe̱':
25 “Xrana' Dios ba be̱ne̱' chia' da nigá chee̱ québedxa xuluzúa bénneache neda' chalá'ala.”
26 Ca gudé xrupa beu' gate na' bchálajle̱ gubáz chee̱ xabáa na' Zacarías, na' Dios gusel-le̱' le̱' tu xe̱zre nababa Galilea nazí le na Nazaret,
27 chee̱ cheajchálajle̱ne̱' tu nu'ula cuíde'dau' le̱be' María. Le̱be' ba zua guchaga na'be' benne' biu na' le̱' José, benne' naque̱' zri'ine zre sua wenná bea David.
28 Gubáz chee̱ xabáa na' guxú'e̱ naga zua María na', na' guzre̱'-be': ―Padiuzre. Dios dxune̱' lue' tu culuén. Xránadxu zúale̱ne̱' lue'. Dios ba be̱ne̱' tu da cháwedxa chiu' quézcala chee̱ xúgute̱ nu'ula ca'.
29 Gate María na' ble'ebe' gubáz chee̱ xabáa na', bebánebe' ca naca dizra' na', na' gunabe' lu lázrdaube': ¿Bizr chee̱ na' dxugape̱' neda' diuzre caní?
30 Nadxa gunná gubáz chee̱ xabáa na': ―María, quebe zrebu' lawe' da ba bzrué'enu' tu culuén da dxun Dios chiu' lue'.
31 Na'a, zua da gunna Dios chiu', na' galaj tu bidu biu chiu', na' guzú' labe' Jesús.
32 Le̱be' gácabe' szren, na' xelennáqueze̱' naque̱' Zri'ine Dios szrente̱, na' Xránadxu Dios gune̱' Le̱' wenná bea ca guca xra xrtawe̱' David,
33 chee̱ nna bé'etecaze̱' xe̱zr la xu Israel, na' xel-la dxenná bea chee̱' quebe cheajsé̱queze chee̱ na.
34 Nadxa María bché̱bebe' gubáz chee̱ xabáa: ―¿Ájazra gaca da nigá, lawe' da quebe nu benne' biu zúale̱na'?
35 Gubáz chee̱ xabáa na' gunné̱': ―Be' Lá'azxa chee̱ Dios sue̱' xichaj lázrda'u, na' xel-la waca chee̱ Dios szrente̱ sua na nen lue'. Chee̱ le̱ na' bidu na' gálajbe' gácaquezebe' chee̱ Dios, na' sí'queze labe' Zri'ine Dios.
36 Cá'anqueze bila ljwezru' Elisabet wálajqueze bidu chee̱' lácala ba naque̱' benne' gula. Ca'an naca, nu'ula na' gulenné̱' naque̱' wizre, ba zeaj xrupa beu' bnezruj Dios chee̱'.
37 Quebe bi de̱ da quebe gaca gun Dios.
38 Nadxa gunná María: ―Neda' nácaqueza' we̱n zrin chee̱ Xránadxu. Gun Dios chia' ca da ba gunnáu'. Na' gubáz chee̱ xabáa na' bezé̱'e̱ naga zua María na'.
39 Ca lu zra na' María guzá'abe' zéajbe' tu xé̱zredau' da zua na laduj xi'a ca' chee̱ ga nababa Judea.
40 Na' guxú'ube' lizre Zacarías, ne bgápabe' diuzre Elisabet.
41 Gate ben Elisabet dizra' da gunné̱ María, na' bidu na' xú'ube' le̱'e Elisabet guxrítebe', na' guzúale̱ Be' Lá'azxa le̱'.
42 Nadxa gunné̱' tu chi'e̱ zizraj: ―Dios ba be̱ne̱' tu da cháwedxa chiu' quézcala chee̱ xúgute̱ nu'ula ca', lawe' da ba zua da be̱nna Dios chiu'.
43 ¿Núzraqueze naca' neda', za xrna Xrana' ga zua' neda'?
44 Cáte̱ze benda' dizra' da gunnéu', na' guxrite bidu chia' lu le̱'a lu xel-la dxebé chee̱be'.
45 Ba neza naca na chiu' guxéajle̱'u lawe' da gaca li ca da gunná Xránadxu.
46 Nadxa gunná María: Bénne'du xu'a dxue lá'ana na Xrana'.
47 Lázrdawa' dxebé na ca dxun Dios, weselá chia'.
48 Lawe' da gudxé' Dios gunne xue chia', nácaqueza' we̱n zrin chee̱'. Na'a su lau na, xúgute̱ benne' xelenné̱' nazi'a tu culuen zren chee̱ Dios.
49 Dios Szrente̱ ba be̱ne̱' tu da zrente̱ chia' neda'. Chee̱ le̱ na' lá'azxa naca La Le̱'.
50 Le̱' xexache lázrqueze̱' xúgute̱ benne' ca' dxelezrebe̱' Le̱'.
51 Da zrente̱ ba be̱n Le̱'. Bzue̱' zrila benne' ca' dxulucá'ana szren cuine̱'.
52 Bebéaje̱' benne' blau ca' lu lataj chee̱', ne bechise̱' benne' dxexruj lazre' ca'.
53 Bnézrujle̱'e̱ da gulagu benne' dxeledún, na' benne' gunní'a ca' bca'ane̱' le̱' cá'aze.
54 Gúcale̱ne̱' benne' Israel, benne' we̱n zrin chee̱' ca' lawe' da bezrí lázrqueze̱' le̱',
55 ca da guche̱be lazre̱' chee̱ xra xrtáudxu ca', chee̱ Abraham, ne chee̱ benne' xrtie̱' ca' chadía chacanna.
56 María begá'anale̱be' Elisabet ca chunna beu', na' ca gudé na' bezrinbe' lízrebe'.
57 Ca gudé na' guxá' beu' chee̱ Elisabet na' chee̱ galaj bidu chee̱', na' guzane̱' tu bi biu chee̱'.
58 Benne' walízr chee̱' ca', ne xrtia ljwezre̱' belezrine̱' dxelebene̱' nen le̱', gate belenne̱' Dios bezrí lázrele̱'e̱ le̱'.
59 Gate guca xrunu' zra, belezrine̱' chee̱ xelechúgue̱' lu xpé̱labe' da gulé'e na naca be̱' bi chee̱ Dios, na' gulaca lazre̱' xuluzúe̱' labe' Zacarías ca le̱ xrabe'.
60 Na' gunná xrnabe': ―Quebe gaca. Dxal-la' si' labe' Juan.
61 Na' gulé̱'e̱ le̱': ―¿Bizr chee̱ na'? Quebe nu chilá' xrtia ljwézrele le̱' ca'.
62 Na' buluche̱be̱' xra bidu na', bulutá ne̱'e̱ chee̱ xelenézene̱' ájazra guzúe̱' labe'.
63 Na' xrabe' na' gunabe̱' tu blágadau', na' bzuaje̱' le̱'e̱ na: Juan si' labe'. Na' xúgute̱ benne' ca' belexebánene̱'.
64 Ca' guca Zacarías benné̱', na' guzú lawe̱' dxue lá'ane̱' Dios.
65 Ca belelé'ene̱' da nigá, xúgute̱ benne' walízr chee̱' belexebánene̱', na' ca naca xe̱zre zaj nnita laduj xi'a ca ga nababa Judea, buluchálaje̱' ca da guca.
66 Xúgute̱ benne' belenne̱' na, gulezú lawe̱' dxelenné̱' lu lázrdawe̱', ne buluche̱be ljwezre̱' tue̱' xetúe̱': ―¿Ájazraqueze gun bi nigá? Naca bea na Xránadxu zúale̱ne̱'-be'.
67 Na' Be' Lá'azxa guzúale̱ne̱' Zacarías, xra bidu nigá, na' bchálaje̱' waláz chee̱ Dios, gunné̱':
68 ¡Gaca ba Xránadxu, Dios chee̱ xe̱zre Israel! Ba ble̱'e̱ naga zúadxu, bénneache chee̱', na' bselé̱' dxi'u.
69 Ba gusel-le̱' tu benne' wál-lale̱'e̱, weselá chee̱dxu. Bénnea' gulaj ládujla xrtia David, benne' we̱n zrin chee̱'.
70 Ca'an guche̱be lazre' Dios lu dxu'a benne' ca' buluchálaje̱' waláz chee̱' nédxudaute̱.
71 Guche̱be lazre̱' guselé̱' dxi'u lu na' benne' dxelezré̱'e̱ dxi'u, ne lu na' benne' dxelecuídene̱' dxi'u.
72 Xezrí lazre̱' xra xrtáudxu ca', ne quebe gal-la lazre̱' xel-la wezría lá'azxa chee̱'.
