SAN LUCAS 1:48-77 in Tzotzil

⁴⁸ Manchuc mi biq'uitun ti stojol, laj yilun, ho'on ti yabatune. “Ep i'ac'bat bendición”, xchi jc'opilal yu'un scotol crixchanoetic ti ch-ech'ic li' ti balumile.

⁴⁹ Jelaven yutsil ti hech laj xa spasbun ti Diose, ja' ti jelaven sp'ijile, ja' ti toj yo'ntone.

⁵⁰ Ti jujumaquel ti ch-ech'ic li' ti balumile chc'uxubin ti much'utic tspasat ti muc' yu'un.

⁵¹ Laj yac' ti q'uelel ti jelaven sp'ijile. Xu' yu'un tsjimbe yabtel ti much'utic tstoy sbaique, ja' ti much'utic p'ij scuyoj sbaique, hech mu xa xu' yu'unic ti c'utic snopojique.

⁵² Xu' yu'un tsten loq'uel ti totile ti tsots tspas mantale. Xu' yu'un chac'be tsots yabtel ti much'utic biq'uit ch-ilatique.

⁵³ Tsnojesbe yo'ntonic ti c'usi leque ti much'utic tsna'ic ti mu'yuc yutsil yo'ntonique. Ja'uc ti much'utic lec yo'ntonic scuyoj sbaique mu'yuc c'usi ch-ac'batic.

⁵⁴ Ta xa scoltaucutic, ho'ucutic ti yelnich'onucutic ti Israele ti jayvo'ucutic ti cajvalinojtic ti Diose. Yu'un mu xch'ay ti yo'nton ti Diose ti hech laj yalbe ti jtatamoltique, ja' ti Abrahame. Laj yalbe ti chc'uxubinatic xchi'uc yelnich'nabtac sbatel osil, xchi ti Maríae.

⁵⁶ Ti Maríae te laj xchi'in sbaic oxib u xchi'uc ti Elisabete. Patil isut batel ti sna.

⁵⁷ Laj sta yorail chcol ti alajel ti Elisabete, hech i'an ti snene quereme.

⁵⁸ Ti svecinotaque xchi'uc ti yuts yalaltac ti Elisabete laj ya'ibeic sc'opilal ti ep ic'uxubinat yu'un ti Diose. Hech co'ol nichim no'ox yo'ntonic xchi'uc.

⁵⁹ C'alal laj sta vaxaquib c'ac'al yanel ti snene quereme, tal yac'be yich' circuncisión ti snene quereme. Ja' ituch'bat snuculel ti sc'unil ti nene quereme. Ja' señail ti ja' yu'un Dios ic'ot o ti hech ituch'bat ti snuculele. Ti yuts yalaltaque laj scuyic ti ja' Zacarías chc'ot sbi ti snene quereme.

⁶⁰ Ti sme'e hech laj yalbe: ―Mu hechuc chcac'be. Ja' Juan sbi chcac'be ―xchi.

⁶¹ Hech i'albat: ―¿C'u yu'un hech chavac'be sbi? Mu'yuc bu hech jbitic ti ho'ucutique ―x'utat ti Elisabete yu'un ti yuts yalaltaque.

⁶² Hech yu'un lic sc'oponic ti stot ti quereme. Hech lic spasbeic yil ti sc'obic yu'un hech ac'o yal c'usi sbi tsc'an chac'be.

⁶³ Ti Zacaríase hech lic sc'an te' yu'un tsts'ibaj ti te'. Hech laj sts'iba: “Juan sbi”, xchi laj sts'iba. Scotolic ich'ay yo'ntonic yu'un.

⁶⁴ Ti ora ijambat ye ti Zacaríase, hech ic'opoj. Ep laj yalbe vocol ti Diose.

⁶⁵ Toj xi'el ic'otic scotol ti svecinotaque. Ipuc batel sc'opilal scotol ti bu nacale te ti siquil balumil te ti Judea.

⁶⁶ Scotol ti much'utic laj ya'ibeic sc'opilale, hech lic snopilanic ti yo'ntonic: ―¿C'u x'elan chbat avi olol lume? ―xchiic. Yu'un ti quereme xchi'inoj ti Cajvaltic Diose laj yilic.

⁶⁷ Ti Zacaríase, ja' ti stot ti quereme, inoj ti yo'nton ti Ch'ul Espíritue. Hech laj yal ti hech chc'ot ti pasele:

⁶⁸ Hocol yal ti Cajvaltic Diose, ja' ti Dios cu'untique, ho'ucutic ti yelnich'onucutic ti Israele, ti chtal sq'uelucutic ho'ucutic ti t'ujbilucutic yu'une. Chtal scoltaucutic.

⁶⁹ Chtal xa ti Jcoltavanej cu'untique, ja' ti scotol xu' yu'une. Ja' ti jun yelnich'on ti Davide. Ja' yabat ti Diose ti Davide.

⁷⁰ Ti vo'one laj xch'amumbe ye ti j'alc'opetic yu'une.

⁷¹ Hech laj yal ti chijcolucutic loq'uel ti sc'ob ti cajcontratique.

⁷² Hech chixc'uxubinucutic hech chaj c'u che'el laj yalbe ti antiguo jtotique. Hech chvinaj ti mu xch'ay ti yo'nton ti trato ti laj spasic xchi'uc ti antiguo jtotique.

⁷³ Ja' ti j'ech'el hech laj yalbe jc'opilaltic ti jtatamoltic Abrahame ti chiscoltaucutic loq'uel ti sc'ob ti cajcontratique hech mu'yuc xi'el ti co'ntontic chcac' jbatic ti abatinel ti stojol.

⁷⁵ Hech lecubtasbil co'ntontic, toj co'ntontic ti stojol ti jayib c'ac'al li' cuxulucutique.

⁷⁶ Ti ho'ote, nich'on, j'alc'opot yu'un Dios ti te oy ti vinajele chac'ot yu'un ho'ot chabaej yu'un ti Cajvaltique yu'un chachapambuntutic co'ntontutic yu'un hech ti jpastutic ti muc' ti sc'ope.

⁷⁷ Ho'ucutic t'ujbilucutic yu'un ti Diose, ho'ot chavac'bun jna'tutic ti chixch'aybucutic jmultic hech chijcolucutic.

⁴⁸ Acꞌo mi mu cꞌusi xitun o pero iyil ti chitun yuꞌune. Li crixchanoetique jech ta xalic ti cꞌalal ta xꞌechꞌic liꞌ ta balumile: “Xmuybaj noꞌox ti iꞌacꞌbat schiꞌin svoqꞌues li Cajvaltique”, xi jcꞌoplal yuꞌunic.

⁴⁹ Li Diose oy stsatsal sjuꞌel. Toj lec li cꞌusi icꞌot ta jtojol yuꞌune jech acꞌo ichꞌeuc ta mucꞌ.

⁵⁰ Li crixchanoetic li ta xꞌechꞌic liꞌ ta balumile, mi ta xichꞌic ta mucꞌ li Diose, ta xichꞌic cꞌuxubinel.

⁵¹ Li Diose yacꞌoj ta ilel ti scotol xuꞌ yuꞌune. Xuꞌ yuꞌun ta spajesbe yabtel li buchꞌutic ta stoy sbaique, jaꞌ li buchꞌutic pꞌij chaꞌi sbaique, jech mu xuꞌ ta spasic li cꞌustic snopojique.

⁵² Li Diose xuꞌ yuꞌun ta sloqꞌues ta yabtel li mucꞌta ajvaliletique. Xuꞌ yuꞌun ta xacꞌbe tsots yabtel li buchꞌutic mu cꞌusi bal o ch‐ileique.

⁵³ Naca lec li cꞌustic ta xꞌacꞌbat ta yoꞌonic li buchꞌutic snaꞌic ti muc bu lequic li stuquique. Yan li buchꞌutic ti lec spꞌisoj sbaique jaꞌ mu cꞌusi ta staic o.

⁵⁴ Joꞌotic li jꞌisraelutique chiscoltautic onoꞌox li jayvoꞌutic li quichꞌojtic ta muqꞌue. Mu xchꞌay ta yoꞌon ti jech onoꞌox laj yalbe li jtotic jmeꞌtic ta voꞌonee.

⁵⁵ Yuꞌun laj yalbe onoꞌox li jtotic jmeꞌtic Abraham ta voꞌone ti ta scꞌuxubin sbatel osil schiꞌuc li snitilultaque, xi li Maríae.

⁵⁶ Li Maríae te la schiꞌin sbaic oxib u schiꞌuc li Elisabete, isut batel ta sna.

⁵⁷ Cꞌalal ista yual ta xcux li Elisabete, querem iyil.

⁵⁸ Li yutsꞌ yalaltac li Elisabete schiꞌuc li slacꞌnataque, iyaꞌiic ti iyil xa li yole yuꞌun icꞌuxubinat yuꞌun li Diose. Jech coꞌol xmuybajic scotolic schiꞌuc li Elisabete.

⁵⁹ Cꞌalal ilocꞌ vaxaquib cꞌacꞌal svoqꞌuel li unen quereme, ba yacꞌbeic yichꞌ circuncisión. Li yutsꞌ yalaltaque la snopic ti jaꞌ ta xichꞌbe sbi stot li unen quereme.

⁶⁰ Pero li smeꞌe jech laj yal: ―Maꞌuc chcacꞌbecutic sbi li stote. Juan ta xcacꞌbecutic sbi ―xi.

⁶¹ Jech iꞌalbat: ―¿Cꞌu chaꞌal Juan chavacꞌbeic sbi? Yuꞌun muc buchꞌu jech sbi cuꞌuntic liꞌi ―xꞌutat yuꞌun li yutsꞌ yalaltaque.

⁶² La sjacꞌbeic stot li unene. Laj yacꞌbeic senya ta scꞌobic yoꞌ acꞌo yal ti cꞌusi sbi ta xacꞌbe li snichꞌone.

⁶³ Li Zacaríase la scꞌan jpech unen tenelteꞌ, la stsꞌiba: “Juan ta xcacꞌbe sbi”, xi. Jech toj chꞌayel noꞌox yoꞌonic scotolic.

⁶⁴ Ijam ye ta ora, lic cꞌopojuc li Zacaríase. Laj yalbe coliyal Dios ti jech icꞌuxubinatique.

⁶⁵ Ixiꞌic tajmec scotolic li slacꞌnataque. Li buchꞌutic te nacalic ta vitstic ta Judea balumile, iyaꞌi scotolic.

⁶⁶ Scotol li buchꞌutic iyaꞌiique jech la snopilanic ta yoꞌonic: “¿Cꞌusi yabtel ta stsac li querem taje?” xi ta yoꞌonic. Yuꞌun li quereme qꞌuelbil chabibil yuꞌun li Cajvaltic Diose.

⁶⁷ Li Zacaríase, jaꞌ li stot li unen quereme, ijulesbat ta sjol ta yoꞌon yuꞌun li Chꞌul Espíritue li cꞌusi ta xcꞌot ta pasele. Jech laj yal:

⁶⁸ Coliyal li Cajvaltic Diose, jaꞌ li Dios cuꞌuntic, joꞌotic li jꞌisraelutique, chtal xa sqꞌuelutic, joꞌotic ti tꞌujbilutic onoꞌox yuꞌune. Chtal xa scoltautic.

⁶⁹ Ta xtal xa li Cajcoltavanejtique, jaꞌ li oy sjuꞌel oy stsatsale. Jaꞌ snitilul li Davide, jaꞌ li lec itune yuꞌun Dios ta voꞌonee.

⁷⁰ Li Diose voꞌone onoꞌox la schꞌamunbe ye li buchꞌutic iyalic ba li scꞌope.

⁷¹ Jaꞌ laj yalic ti chijcolutic loqꞌuel ta scꞌob li buchꞌutic chiscontrainutique, ti xtiꞌet noꞌox yoꞌonic ta jtojoltique.

⁷² Chiscꞌuxubinutic jech chac cꞌu chaꞌal iꞌalbatic onoꞌox li jtotic jmeꞌtic ta voꞌonee. Jech ta xquiltic o ti mu xchꞌay ta yoꞌon li cꞌusi laj yalbe li jtotic jmeꞌtic ta voꞌonee.

⁷³ Jaꞌ joꞌotic jcꞌoplaltic ti laj yalbe li jtotic jmeꞌtic Abraham ti ta jꞌechꞌel chiscoltautic loqꞌuel ta scꞌob li buchꞌutic snacojutique, jech muꞌyuc xa xiꞌel ta xcaꞌitic, xuꞌ xa chijtun yuꞌun.

⁷⁵ Jech jun noꞌox coꞌontic ta xquichꞌtic ta mucꞌ li jayib cꞌacꞌal liꞌ cuxulutique.

⁷⁶ Li jnichꞌone jaꞌ ta xal li scꞌop Diose. Jaꞌ baꞌi chlic abtejuc; jaꞌ tsꞌacal chlic abtejuc li Cajvaltique. Jaꞌ chlic yalbe jchiꞌiltactic ti acꞌo yictaic li cꞌustic chopol ta spasique, jaꞌ jech chichꞌic o ta mucꞌ li Cajvaltique.

⁷⁷ Jaꞌ ta xalbe ti ta spasbatic perton yuꞌun li smulique, jaꞌ jech chcolic o mi ta schꞌunic ti jaꞌ Yajcoltavanejic li Cajvaltique, yuꞌun tꞌujbilutic onoꞌox yuꞌun Dios.

⁴⁸ Yuꞌun ti Diose laj yichꞌun ta venta ti pobre yajmosovune. Scotol ti cristianoetic ti cꞌu yepal ti ta xꞌechꞌic liꞌ ta sba banomile ta xalic ti jcꞌoplal ti ximuyubaje.

⁴⁹ Yuꞌun ti Diose, ti scotol xuꞌ yuꞌune, toj echꞌem lec ti cꞌusitic laj spasbune. Yuꞌun jaꞌ Chꞌul Dios.

⁵⁰ Staoj yav ta xcꞌuxubin scotol ti buchꞌutic ta xiꞌtaique.

⁵¹ Laj xa yacꞌ ta ilel ti yabtel ti tsots xuꞌ yuꞌune. Laj xa stsal ti buchꞌutic toj toyobbaique.

⁵² Laj xa specꞌtsan ti buchꞌutic cajal xaꞌi sbaique. Yan ti buchꞌutic ta snijan sbaique toyesatic xa.

⁵³ Ti buchꞌutic ta xviꞌnajique acꞌbatic ti cꞌusitic xtun yuꞌunique. Yan ti buchꞌutic jcꞌulejetique smeyoj scꞌobic iloqꞌuic batel.

⁵⁴ Laj scolta ti slumal Israele, ti jaꞌ yajtunele. Muꞌyuc laj xchꞌay ta yoꞌnton ti jech cꞌux ta xaꞌie.

⁵⁵ Yuꞌun jech onoꞌox yaloj ta stojol ti jtot jmeꞌtique, ta stojol ti Abrahame schiꞌuc ti yalab snichꞌnabtaque ti cꞌux ta xaꞌivan sbatel osile, xi ti Maríae.

⁵⁶ Ti Maríae nopol van oxibuc u ijocꞌtsaj ta sna ti Elisabete. Tsꞌacal to un, isut batel ta sna stuc.

⁵⁷ Tsꞌacal to un, ista scꞌacꞌalil ti ta svoqꞌues yol ti Elisabete. Iꞌayan jun querem.

⁵⁸ Cꞌalal laj yaꞌi ti slacꞌnataque schiꞌuc ti yutsꞌ yalaltac ti Elisabete, bat spatbeic yoꞌnton. Yuꞌun laj yaꞌiic ti icꞌuxubinat yuꞌun ti Cajvaltic Diose.

⁵⁹ Cꞌalal yichꞌoj xa svaxaquibal cꞌacꞌale, bat yacꞌbeic yichꞌ circuncisión ti olole. Ti yutsꞌ yalaltaque ta scꞌanic ox ta xacꞌbe sbiin Zacarías jech chac cꞌu chaꞌal ti stote.

⁶⁰ Pero ti smeꞌe jech laj yal: ―Moꞌoj, ta sbiin Juan ―xi.

⁶¹ Pero ti stuquique jech laj yalic: ―¿Cꞌu chaꞌal? Yuꞌun muꞌyuc jech abiic taje ―xiic.

⁶² Jech o xal ti stuquique laj spasic señail ta stojol ti stot ti olole yoꞌ jech ta snaꞌic cꞌusi ta xacꞌbe sbiin.

⁶³ Ti totile laj scꞌan uni tenelteꞌ ti jech laj stsꞌibae: “Juan ta sbiin”, xi. Scotolic labal laj yaꞌiic ti jech taje.

⁶⁴ Ta jech to yepal ijam ye ti Zacaríase. Tey lic yalbe slequilal ti Diose.

⁶⁵ Ti jech taje, más to chꞌayal icꞌot yoꞌntonic scotol ti slacꞌnataque. Jaꞌ jech xtoc scotol ti jnaclejetic ti ta svitsal Judea banomile, jaꞌ ta xalic ti cꞌusi icꞌot ta pasele.

⁶⁶ Scotol ti buchꞌutic laj yaꞌiique ta snopilan ta sjacꞌolanbe sbaic ta jujun tal: ―¿Cꞌusi ta xlic spas ti olol taje? ―xiic. Yuꞌun laj yaꞌiic ti ta melel acꞌbil bendición yuꞌun ti Cajvaltic Diose.

⁶⁷ Ti stot ti neneꞌe, jaꞌ ti Zacaríase, noj ta yoꞌnton ti Chꞌul Espíritue. Jech lic cꞌopojuc ti cꞌu sꞌelan iꞌacꞌbat snaꞌ yuꞌun ti Diose:

⁶⁸ Jun yutsil ti Dios yuꞌun ti jꞌisraeletique. Yuꞌun tal xa ta jtojoltic ti voꞌotic yalab snichꞌnabotique. Laj xa scoltaotic.

⁶⁹ Yuꞌun ti Diose laj xa yacꞌbotic jun mucꞌul Jcoltavanej ti iꞌayan tal ta jun snitilul ti ajvalil Davide, ti jaꞌ yajtunel to oxe.

⁷⁰ Yuꞌun jech onoꞌox yaloj ta sventa ti chꞌul jꞌalcꞌoptac ta voꞌnee:

⁷¹ Jaꞌ ta xispojotic ta yoc ta scꞌob ti cajcrontatic ti xtiꞌet sjolic ta jtojoltique.

⁷² Yaloj xtoc ti ta xcꞌuxubin ti jmolmucꞌtotique, ti muꞌyuc ta xchꞌay ta yoꞌnton ti schꞌul trate ti laj spase.

⁷³ Ti jech liꞌe, jaꞌ icꞌot ta pasel ti trate ti jech onoꞌox albil ti jmolmucꞌtotic Abraham yuꞌun ti Diose, ti

⁷⁴ ta onoꞌox xiscoltaotic loqꞌuel ta scꞌob ti cajcrontatique, yoꞌ jech mu ta xiꞌeluc ta xcacꞌ jbatic ta tunel.

⁷⁵ Yuꞌun lecubtasbilotic, tuqꞌuibtasbilotic ta stojol ti jayib cꞌacꞌal cuxulotique.

⁷⁶ Ti voꞌote, Nichꞌon, yajꞌalcꞌop ti cajal Dios ta xabiine. Yuꞌun ti voꞌote, jbaꞌyej be ta xabat yuꞌun ti Cajvaltique. Ta xameltsanbe batel beetic yuꞌun.

⁷⁷ Ta xavacꞌbe snaꞌ ti yalab snichꞌnabe ti ta staic perdón yuꞌun ti smulique, yoꞌ jech ta staic ti coltaele.

⁴⁸ Ac'o me mu bijucun, pero laj yil ti ta jc'an chitun yu'une. Scotol cristianoetic jech ta xalic ti c'alal chjelovic li' ta banamile: “Xcuxet no'ox yo'nton ti i'ac'bat svoq'ues li Cajvaltique”, xi jc'oplal yu'unic.

⁴⁹ Li Diose ech'em stsatsal. Toj lec li c'usi la spasbune jech ac'o ich'atuc ta muc'.

⁵⁰ Li jujuc'ol cristianoetic ta xjelovic li' ta banamile, li boch'otic ta xich'ic ta muc' Diose ta xich'ic c'uxubinel.

⁵¹ Li Diose yac'oj ta ilel ti scotol xu' yu'une. Xu' yu'un ta spajesbe yabtel li boch'otic ta stoy sbaique, ja' li boch'otic bij yalojique, jech mu xu' yu'unic li c'usitic snopojique.

⁵² Xu' yu'un ta sloq'ues ta yabtel li boch'otic banquilaletic ta pasmantale. Xu' yu'un ta xac'be tsots yabtel li boch'otic mu'yuc stu ch‑ilatique.

⁵³ Puro lec c'usitic chac'be ta yo'ntonic li boch'otic sna'ic ti mu'yuc lec yo'nton stuquique. Yan li boch'otic lec yo'nton yalojique mu'yuc c'usi ta x'ac'batic.

⁵⁴ Vu'utic li israelutique ta scoltautic li jayib cajvalinojtic oe. Yu'un mu xch'ay ta yo'nton ti jech ono'ox laj yalbe li jmoltotactic ta vo'onee. Yu'un laj ono'ox yalbe Abraám ti ta xc'uxubin sbatel osil xchi'uc smomnich'nabe, xi li Maríae.

⁵⁶ Li Maríae tey la xchi'in sbaic oxib u xchi'uc li Elisabete. Ts'acal to isut batel ta sna.

⁵⁷ C'alal sta yorail la xcux li Elisabete, querem ivoc' yu'un.

⁵⁸ Li yuts' yalaltac Elisabete xchi'uc li boch'otic tey noch' nacajtic xchi'uque, laj ya'yic ti ivoc' xa yole yu'un ic'uxubinat yu'un Dios. Jech co'ol xcuxet yo'nton scotolic xchi'uc li Elisabete.

⁵⁹ C'alal iloc' vaxaquib c'ac'al svoq'uel li unin quereme, tal yac'beic yich' circuncisión. Li yuts' yalaltaque la snopic ti ja' ta xich'be sbi stot li unin quereme.

⁶⁰ Pero li sme'e jech laj yal: ―Mu jechuc ta xcac'becutic sbi. Juan ta xcac'becutic sbi ―xi.

⁶¹ Jech i'albat: ―¿C'u yu'un jech chavac'beic sbi? Yu'un mu'yuc boch'o jech sbi cu'untic li'i ―x'utat yu'un li yuts' yalaltaque.

⁶² Jech tey lic sjac'beic stot li olole. La spasbeic senyail ta sc'obic yu'un ac'o yal c'usi sbi ta xac'be li xnich'one.

⁶³ Li Zacaríase tey lic sc'an jun pech'pech' te', jech la sts'iba: “Juan ta xcac'be sbi”, xi. Jech toj ch'ayel ic'ot yo'nton scotolic.

⁶⁴ Ta ora tey ijambat ye yu'un Dios li Zacaríase, lic lo'ilajuc. Laj yalbe slequilal Dios.

⁶⁵ Jech toj xi'el ic'otic li boch'otic tey noch' nacalic xchi'uque. Li boch'otic tey nacajtic ta vitsetic ta Judea banamile, laj ya'i scotolic.

⁶⁶ Scotol li boch'otic laj ya'yique jech la snopilan ta yo'ntonic: “¿C'usi yabtel ta xbat li querem va'i x'elane?” xi ta yo'ntonic. Yu'un li quereme chi'inbil yu'un Cajvaltic Dios.

⁶⁷ Li Zacaríase, ja' li stot unin quereme, iventainbat yo'nton yu'un Ch'ul Espíritu. Ja' laj yal li c'usi ta to xc'ot ta pasele. Jech laj yal:

⁶⁸ Coliyal li Cajvaltic Diose, ja' li Dios cu'untic vu'utic li israelutique, chtal xa sq'uelutic, vu'utic ti t'ujbilutic ono'ox yu'une. Chtal xa scoltautic.

⁶⁹ Chtal xa li Jcoltavanej cu'untique, ja' ti toj ech'em stsatsale. Ja' smomnich'on David, ja' ti lec itun yu'un Dios ta vo'onee.

⁷⁰ Li Diose vo'one ono'ox la xch'amanbe ye li yaj'alc'optaque.

⁷¹ Ja' laj yalic ti ta to xijcolutic loq'uel ta sc'ob li cajcontratique.

⁷² Ta xixc'uxubinutic jech chac c'u cha'al laj ono'ox yalbe li jmoltotactic ta vo'onee. Jech ta xquiltic o ti mu xch'ay ta yo'nton c'usi la xchapan xchi'uc li jmoltotactic ta vo'onee.

⁷³ Ja' vu'utic jc'oplaltic ti laj yalbe jmoltotic Abraám ti j'ech'el chiscoltautic loq'uel ta sc'ob cajcontratique, jech mu'yuc xa xi'el chca'itic, jech xu' xa chijtunutic yu'un.

⁷⁵ Jech jun no'ox co'ntontic ta xquich'tic ta muc' ti jayib c'ac'al li' cuxulutique.

⁷⁶ Li jnich'one ja' yaj'alc'op Dios chc'ot. Ja' ba'yuc chlic abtejuc, ja' ts'acal chlic abtejuc li Cajvaltique. Ja' chlic yalbe jchi'iltactic ti ac'o scomtsanic li c'usitic chopol ta spasique jech xu' yu'unic ta xich'beic ta muc' li sc'ope.

⁷⁷ Ja' chalbe ya'yic ti tspasbatic perdón yu'un smulique yu'un jech xu' chcolic o me ta xch'unic ti ja' Jcoltavanej yu'unique. Yu'un t'ujbilutic ono'ox yu'un Dios.

⁴⁸ Acꞌu mi mu cꞌu jtu chiꞌile pero chitun yuꞌun ti Rioxe. Ti jayqꞌuex crixchanoetic ta to xꞌechꞌic liꞌ ta sba balamile, “Iꞌacꞌbat bentisyon yuꞌun jaꞌ iyayantas ti Cajvaltic Jesucristoe”, xi jcꞌoplal yuꞌunic.

⁴⁹ Ti Rioxe oy slequilal syuꞌelal. Lec tajmec ti cꞌusi iyul ta jtojole yechꞌo un acꞌu quichꞌtic ta mucꞌ ti Rioxe.

⁵⁰ Ti mi chichꞌic ta mucꞌ Riox li crixchanoetic ti ch-echꞌic liꞌ ta sba balamile, ta xcꞌuxubinatic.

⁵¹ Ti Rioxe yacꞌoj iluc ti stuc noꞌox oy syuꞌele. Tspajes ti muchꞌutic ta stoy sbaique, jaꞌ ti muchꞌutic pꞌij ti yalojique, yoꞌ mu spasic o ti cꞌusitic snopoj tspasique.

⁵² Mi jaꞌ yech tspasic li jyuꞌeletique, ta xloqꞌuesatic. Jaꞌ ch-ochic ti muchꞌutic mu snaꞌ stoy sbaique.

⁵³ Ti muchꞌutic tscꞌanic lecubtasbel yoꞌonique ta xlecubtasbatic. Yan ti muchꞌutic lec yoꞌonic ti yalojique, jaꞌ mu xlecubtasbatic.

⁵⁴ Voꞌotic li jꞌisraelotique, chixcꞌuxubinotic onox ti jayvoꞌ quichꞌojtic ta muqꞌue. Mu onox xchꞌay scꞌoplal ti cꞌu xꞌelan iꞌalbatic ti voꞌne moletique.

⁵⁵ Iꞌalbat onox ti jmucꞌtatotic Abraame ti ta xcꞌuxubinat ta sbatel osil xchiꞌuc voꞌotic li smomotique, xi la ti Maríae.

⁵⁶ Ti Maríae ixchiꞌin la sbaic ta naclej oxib u xchiꞌuc ti Elisabete. Ti cꞌalal ilocꞌ oxib ue, isut la ta sna.

⁵⁷ Ti cꞌalal ista yual icol ti Elisabete, crem la iꞌayan ti yole.

⁵⁸ Ti xchiꞌiltac Elisabete xchiꞌuc ti slacꞌnataque, iyaꞌiic la ti icꞌuxubinat yuꞌun ti Rioxe, ti iꞌayan xa yole. Xmuyubajic xa la.

⁵⁹ Ti cꞌalal ista vaxaquib cꞌacꞌal yayanel ti unene, iyacꞌbeic la yichꞌ circuncisión. Ti xchiꞌiltaque isnopic la ti jaꞌ ta xichꞌbe sbi ti stote.

⁶⁰ ―Maꞌuc chichꞌbe sbi li stote. Juan chcacꞌbeticotic sbiin ―xi la ti smeꞌe.

⁶¹ ―¿Cꞌu yuꞌun ti Juan chavacꞌbeic sbiine? Yuꞌun muc muchꞌu yech sbi junuc cuꞌuntic liꞌtoe ―xꞌutat la yuꞌun ti xchiꞌiltaque.

⁶² Isjacꞌbeic la ti stot unene. Iyacꞌbeic la seña ta scꞌobic ti acꞌu yal cꞌusi sbi chacꞌbe ti screme.

⁶³ Ti Zacaríase iscꞌan la jpech cꞌox tabla, istsꞌiba la: “Juan chcacꞌbe sbiin”, xi la. Xchꞌayet xa la yoꞌon scotolic.

⁶⁴ Jaꞌo la ijam ye ti Zacaríase, lic la cꞌopojuc. ―Colaval ti acꞌuxubinoticotique ―xut la ti Rioxe.

⁶⁵ Ixiꞌ la tajmec scotol ti slacꞌnataque. Ti muchꞌutic tey nacajtic ta vitstic ta estado Judeae, iyaꞌi la scotolic.

⁶⁶ Ti muchꞌutic iyaꞌie “¿Cꞌusi van yabtel li crem taje?” xi la isnopilanic. Ti creme chabibil la yuꞌun ti Cajvaltique.

⁶⁷ Ti Zacaríase, jaꞌ ti stot unene, ichꞌamunbat la ye yuꞌun ti Chꞌul Espíritue, iyal la ti cꞌusi poꞌot xa xcꞌote.

⁶⁸ Coliyalbotic ti Rioxe, jaꞌ ti Cajvaltic, voꞌotic li jꞌisraelotique, chistacbotic tal Jtojmulil, voꞌotic ti stꞌujojotic onoxe. Oy slequilal syuꞌelal. Jaꞌ smom ti Davide ti lec tajmec itun yuꞌun Riox ti voꞌnee.

⁷⁰ Ti Rioxe ixchꞌamunbe ye ti yajꞌalcꞌoptac ti voꞌnee.

⁷¹ Iyalic onox ti ta xcꞌot yora ti mu xa bu chispasotic ta mantal li muchꞌutic chiscrontainotique, ti scꞌacꞌalotic yoꞌonique.

⁷² Chixcꞌuxubinotic onox chac cꞌu chaꞌal iꞌalbatic ti voꞌne moletique. Yechꞌo un chquiltic ti mu onox xchꞌay xaꞌi ti cꞌusi iyalbe ti voꞌne moletique.

⁷³ Jaꞌ jcꞌoplaltic ti iꞌalbat ti jmucꞌtatotic Abraame ti ta onox xcꞌot yora ti mu xa bu chispasotic ta mantal li jcrontatique, yoꞌ mu xa cꞌusi xixiꞌotic o ta yichꞌel ta mucꞌ ti Rioxe.

⁷⁵ Yechꞌo un jun coꞌontic chquichꞌtic ta mucꞌ ti cꞌu sjalil cuxulotic liꞌ ta sba balamile.

⁷⁶ Li voꞌote, crem, ti cꞌalal xachꞌie, voꞌot yajꞌalcꞌopot ti Riox ta vinajele. Yuꞌun voꞌot baꞌyi chavalbe scꞌoplal ti Cajvaltique, jaꞌ tsꞌacal to chtal ti stuque. Voꞌot baꞌyi chlic avalbe li jchiꞌiltactique ti acꞌu yictaic spasel li cꞌusitic chopole, ti acꞌu yichꞌic ta mucꞌ ti Cajvaltic cꞌalal xule.

⁷⁷ Voꞌotic ti stꞌujojotic onoxe, voꞌot chavalbe li jchiꞌiltactique ti ch-aqꞌueic ta pertonal yuꞌun ti Rioxe ti mi ta xchꞌunic ti jaꞌ tstoj jmultic ti Cajvaltique. Ti mi ixchꞌunique, ta xcuxiic ta sbatel osil.