48 Kíxin Dios ikuá kuentá ijnko tí chojni chjin nòé chꞌexón xra̱ kuènte chꞌán. A̱ ntá ijie la ko jnkochríxín tsontáchro chojni kíxin náxrjón tjèn janhan, tsixro sín.
49 Kíxin Dios chónta kaín kjuachaxin ntá janhan mé kjuasixínna chꞌán ijnko kjuaxroan jié; imá tjóá tí ihni̱é chꞌán.
50 Jnkochríxín tsi̱konóe̱he̱ chꞌán kaín tí sín tjikosáyehe sín chꞌán.
51 Tsíkjasin chꞌán itsjé kjuaxroan jié; kuakitsjehe chꞌán tí kjuachaxin chónta tí sín nchehnke.
52 Kuakitsjehe chꞌán tí kjuachaxin chónta tí sín tꞌe̱to̱an, A̱ ntá tí sín nòa kꞌuékꞌe̱tua̱nhya senó la mé jie chjéhe chꞌán kjuachaxin tsꞌe̱to̱an sín.
53 A̱ ntá tí sín tꞌenxín kjinta la kjuanjon chꞌán kaín nkehe tsicháxi̱nhin sín, a̱ ntá tí sín rico xráxín jehó tja sín sákjuí sín.
54 Kjuínki̱tsa chꞌán tí sín nación Israel kíxin tjejóchꞌehe sín chꞌán xra̱; kꞌuitjáyenhya chꞌán tí jehe sín kui̱konóe̱he̱ chꞌán sín,
55 éxí kꞌuéchenka chꞌán tí sín kꞌuaxrjeníxinni kꞌuéjó sín ósé, na mé tí chꞌín Abraham la ko kaín tí sín na̱xa̱ tsꞌaxrjeníxin chꞌán ―mé xi̱kaha ichro tjan María.
56 A̱ ntá tjan María kuíto̱eko tjan tí tjan Elisabet iní nitjó la ntá chrꞌéxi̱n xíkjan tjan nto̱e tjan.
57 Ntá xétja tí ya̱on sinchekokjíhi tjan Elisabet tí xje̱en tjan, a̱ ntá kjuínchekokjíhi tjan ijnko xjan ntoa.
58 A̱ ntá tí sín chjinaxón nto̱e la ko tí sín kjéhya tjan mé kjuíjitsjehe sín kíxin tso̱chéhe̱ko sín tjan kíxin kuínhin sín kíxin Dios imá tsíki̱konóe̱he̱ tí jehe tjan.
59 Ntá tí ya̱on jníxin ikui sín sincheka sín xjan tí xro̱ye kuènte tí sín judío. Ntá chrókjuinchekꞌin sín xjan Zacarías éxí itꞌin itꞌé.
60 Kjánchó ntáchro ìné xjan kíxin: ―Náhí. Tꞌichjánxi̱n itsꞌin xjan Juan ―ichro tjan.
61 Ntá ntáchro sín kíxin: ―¿Nkekuènte kíxin xi̱kaha chrókꞌuin xjan? Kohya nkexro na̱xa̱ kjéhya xi̱kaha itꞌin ―ichro sín.
62 A̱ ntá kaín tí sín kjéhya kjua̱ko̱xi̱n sín tja sín kjuanchankíhi sín tí itꞌé xjan kíxin nkexrí tjinkaon chꞌán chrókꞌuin tí xjan.
63 A̱ ntá tí itꞌé xjan mé kjuanchia chꞌán ijnko ntachiso ntsí tsokjin chꞌán ntá kjin chꞌán kíxin: “Ihni̱é xjan mé Juan.” A̱ ntá kaín tí sín tjejó sín ntiha la chrakon sín kuínhin sín xi̱kaha kónhen.
64 A̱ ntá xrína̱hya chꞌín Zacarías kjuankíxin chꞌán nixja chꞌán ínaá kjuanchehe chꞌán Dios kjuasáya.
65 A̱ ntá kaín tí sín chjinaxón nto̱e sín mé chrakon sín. La ntá nkuíxín tí jna̱ kuènte estado Judea mé kjo sín kíchó sín chrónka sín kíxin xi̱kaha tsíkónhen.
66 A̱ ntá kaín tí sín kuínhin mé kjuenka̱yáxin sín kjuanchankíhi sín kíchó sín kíxin: ―¿Xá nkehe tí xra̱ tsíki̱to̱nhe̱n tí xjan i? ―ichro sín. Kíxin chaxín Ìnchéni Dios tsíkjincheyaon chꞌán tí xjan.
67 A̱ ntá itꞌé tí xjan mé chꞌín Zacarías, mé a̱ntsí kꞌuáyéhe̱ chꞌán kjuachaxin kuènte Ncha̱kuen Dios ntá xi̱kaha nixja chꞌán itén Dios ntáchro chꞌán kíxin:
68 Imá jína Ìnchéni, na mé tí Dios kuènte tí nación Israel, kíxin ikui chꞌán tí tjejóni kjuínchekaá chꞌán nación kuènténi.
69 La ko kjuanjon chꞌán ijnko nkexro tꞌe̱to̱an sinchekaáni chꞌán na mé ijnko nkexro kꞌuaxrjeníxin tí chꞌín David, tí nkexro kꞌuékjichꞌehe Dios xra̱.
70 Éxí kꞌuéchronkaxín tí sín kjueyá Dios kꞌuéchrónka itén Dios ósé,
71 kꞌuéchronka Dios kíxin sinchekaáni chꞌán kíxin ntá tsjachahya kaín tí sín nínkakonhenni,
72 tsi̱konóe̱he̱ chꞌán tí sín kꞌuaxrjeníxinni ósé, tsꞌitjáyenhya chꞌán tí nkehe tsíchronka chꞌán tsoxiteyá.
73 Tíhi mé tsíkjo Dios tí chꞌín Abraham ósé kíxin nkehe chaxín tsoxiteyá chrꞌéxi̱n
74 kíxin sinchekaáni chꞌán kíxin kohya nkehe sichꞌeheni tí sín nínkakonhenni kíxin jína sichꞌeheni chꞌán xra̱ tsochrakonhyani,
75 la ntá jína tsꞌejóni sinchetjóáni chꞌán kaín ya̱on tí na̱xa̱ tjejóchónni.
76 A̱ ntá jaha xje̱enni mé tsontáchro Dios kíxin jaha ijnko nkexro tsochrónka itén Dios tjen nkaya nka̱jní. Jaha tsíto̱nxian nti̱a tsi̱xi̱n Ìnchéni la ko jaha tsjásiyóxian nti̱a tsi̱xi̱n chꞌán.
77 Jaha tsjákohé tí chojni chjasintajni nkexrí tsjìin tí jie̱ chónta sín, ntá tsaá sín.
