Lucas 1:48-77 in Mam

⁴⁸ Nti'xtaq wokli'n, me atzi'n ja'lin, ma chin tzaj tka'yi'n Dios. O'kqinxa nimxix wokli'n kyxoljo jni' xjal ja'lin.

⁴⁹ Qu'n a Dios nimxix toklin, tb'anilx ma tzaj tq'o'n we'y. Xjanxixjo tb'i.

⁵⁰ Atx te Dios tq'aq'b'il tk'u'j kyi'jjo nchi kub' niminte.

⁵¹ Tuk'a tkyaqil tipin, nchi el ti'n nimsil kyib' toj kytx'ixew, ex n-ok tyupi'n kyb'is.

⁵² N-el ti'n kyoklin nmaq kawil, ex nxi tq'o'n kye a nti' kyoklin.

⁵³ Ayetzi'n at wa'yaj kyi'j, nxi tq'o'n kywa. Ex n-el ti'n kye' a noqx nb'aj kyyajin.

⁵⁴ Mi ẍi el najjo aj Judiy toj tk'u'j. Ma chi tzaj tmojin tuk'a tq'aq'b'il tk'u'j.

⁵⁵ Ikytzin tq'ma ojtxe kye qtzan qyajil Abraham ex kye txqantl kchi ul itz'je.

⁵⁶ Kyij Mariy oxe xjaw tja Lisabet. Te' kyb'ajjo oxe xjaw, b'e'x aj tja.

⁵⁷ Te' tjapin q'ij tu'n tkub' tz'aq Lisabet, ul jun kyal q'a.

⁵⁸ Te' tok kyb'i'n jni' t-xjalil, ex jni' xjal, a at ite'ke te, i xta'j q'olb'ilte, qu'n otaq q'aq'in tk'u'j Dios ti'j.

⁵⁹ Te' tb'aj wajxaq q'ij tulin itz'je, ul aq'b'aj techiljo q'a, tze'n nchi tenetaqjo jni' kyk'wal aj Judiy, a q'aqetaq. Atzi'n te' tu'ntaq tok tb'i, Zakariytaq tb'i tu'ntaq tok q'o'n, tze'nkuxjo tb'i ttata.

⁶⁰ Me mix ttziye tnana, qu'n Juan tb'i k-okilch.

⁶¹ Xi kyq'ma'n xjal te: ¿Tiqu'n ikyjo? ¿Ma attzin jun kye' iky tb'i? chi chi'.

⁶² Xi kyqanin noq tuk'a techil te ttata ti'taq tb'i tu'n tok.

⁶³ Xi tqanin ttata jun tz'lan, ja' tu'n tkub' tz'ib'ite tb'i. Atzaj te' tzaj ttzyu'n, kub' ttz'ib'in, Juan tb'i. Te' tok kyb'i'n jni' xjal ikyjo, jotx b'e'x i b'aj jaw ka'ylaj.

⁶⁴ Ex tb'ajlinxi' ikyjo, b'e'x b'antl tyolin Zakariy, exsin ok ten nimsil tb'i Dios.

⁶⁵ Jotxjo jni' xjal antza, junx kyuk'a tkyaqiljo najleqe tojjo jni' najb'il kyxol wutz te Judey, i b'aj jaw ka'ylaj ti'jjo jni' otaq b'aj.

⁶⁶ Tkyaqilxjo jni' otaq b'aj b'inte ikyjo, b'aj jaw yolin toj kyanmin ex kyq'ma: ¿Titzila kb'antil tu'n k'wal? Qu'n nimx toklin ma tzaj tq'o'n Dios, a tAjaw Tkyaqil.

⁶⁷ Zakariy, a ttata ne'ẍ, noj tanmin tu'n Xewb'aj Xjan, ex ok ten yolil tu'n, ex chi' kyjalu'n:

⁶⁸ Ky'iwlinxixjo tb'i Dios te Israel, a tAjaw Tkyaqil, qu'n ma tzul klol te' Ttanim.

⁶⁹ Ma tzaj tq'o'n jun Klolqe, a nimx toklin, tzajnin ti'j tyajiljo qtzan nmaq kawil David, a kub' niminte.

⁷⁰ Atzi'n lu'n a q'umj ojtxe kyu'n xjan yolil Tyol Dios, tej kyq'ma:

⁷¹ A tu'n tel klonqe kye qajq'oj ex kye aye kyky'e'x qi'j;

⁷² tu'n ttzaj q'aq'in tk'u'j kyi'jjo qyajil, ex tu'n mina tz'el naje toj tk'u'j, a tumil xjanxix b'ant ti'j tu'n; tu'n kykyij Ttanim toj wen tuk'a.

⁷³ Ex atzi'n b'ant ti'j tu'n, ex tq'ma te Abraham, a qxe'chil kyjalu'n,

⁷⁴ tu'n qel tklo'n kye qajq'oj, ex tu'n qajb'in te tuk'a tkyaqil qanmin;

⁷⁵ tu'n tkub' qb'inchin qten jikyinxix toj tkyaqil qchwinqil twutz.

⁷⁶ Atzi'n te, mil: Yolil Tyol Dios te' tb'i k-okil, a Dios nimxix toklin. Qu'n ay k'wel nej twutzjo Kolil q'malte tu'n tkub' kyb'inchinxjal kyib' twutz.

⁷⁷ K'wel tnajsin Dios kyila, ex kchi kletila tu'n, chkujiy kye.

⁴⁸ Amale minttii' wajbelela tuj cywitz xjal, pero ma tzul Dios te k'olte jun wajbela. Ja'lewe bix tuj cykilca tyem cykba' xjal ma tsicy' Dios inayena te k'olte jun jawnex woclena.

⁴⁹ O tak' Dios jun jawnex xtalbil wibaja. ¡Xjanxsen tbixin!

⁵⁰ At lastim tu'nxin te cyej xjal nchi niman jaxin.

⁵¹ Nimxsen o bint tu'nxin tu'n tipemalxin. O xcyexin cyi'j kej xjal e jaw cyniman cyiib.

⁵² O tz'el tii'nxin tipemal cycawbil kej cawel, bix o tzaj tk'o'nxin cyajbel kej xjal yaa'n jawnex.

⁵³ O tzaj tk'o'nxin jun ba'n te cyej xjal at il ete'. Pero mintii' o tzaj tk'o'nxin te cyej xjal mintii' il ete' tuj cywitz.

⁵⁴ Bix o tzulxin te onlcye ke Israel, kej xjal e tsicy'xin tu'n cyajben texin, tu'n tjapan bajxin ti' tyolxin.

⁵⁵ E cyaj tyolxin tuya kiy'jil Abraham tu'n ttzaj lastim tu'nxin cye tchman Abraham te junx maj, bix tu'nj o bint tu'nxin wi'ja, otzen japan bajxin ti' tyolxin—tz̈i María.

⁵⁶ Bix e tenle María tuya Elisabet jun oxe xjaw. Bix aj meltz'ajtxin tjatxin.

⁵⁷ Tejtzen tpon tumel tu'n talen Elisabet, bix itz'j jun talxuj xinak.

⁵⁸ Ke tvesint-xuj bix ke titz'enxuj e cybi otk tz'itz'j talxuj, bix e jaw tzalajke tuyaxuj ti'j jawnex xtalbil otk tzaj tk'o'n Dios texuj.

⁵⁹ Te twajxakan k'ij titz'jlen talxuj, bix e pon ke cyvesint-xuj bix ke cyermanaxuj tuj cyjaxuj, cuma otk pon tumel tu'n tel cpet ttz'umel twi' ttz'albil nee' te techel judíotzen nee'. Bix oc cyk'o'n xjal tbi nee' Zacarías, tisex tbi tman.

⁶⁰ Pero bix e xi' tkba'n ttxu nee': —Min. Te tbi c'oquel Juan—tz̈ixuj.

⁶¹ Pero e xi' cykba'n xjal texuj: —¿Tu'n tikentzen taja tz'oc tbi tala te Juan? Min-al Juan cyxol ke cyiy'jila—tz̈i ke xjal.

⁶² Bixsen oc cykanen xjal te tman nee' alcye tbi nee' c'oquel. Pero nuk tuya cyk'ab e yoleneke, cuma menx ta' Zacarías bix otk chquinba.

⁶³ Bix e tkanen Zacarías jun tzlom, bix e cub ttz'i'benxin: “C'oquel tbi te Juan.” Bix cykilca xjal e jaw klee'.

⁶⁴ Tejtzen tcub ttz'i'benxin ju'wa, njketltzen ttzixin, bixsen ak'xin k'olxte chjonte te Dios.

⁶⁵ Tejtzen cybinte ke xjal cyvesint-xin ti otk baj tuj tja Zacarías, e jawxsen klee'ke, bix cykilca kej xjal najl cyxol witz te Judea e yolenke ti'j ti otk baj.

⁶⁶ Kej xjal e binte ti otk baj bix ak'ke bislte ti'j, bix e baj cykanen cye ke cyuya: “¿Titzele c'oquele jnee' lu?” tz̈i ke xjal. Ju'xne e jaw klee' ke xjal, cuma otk cub tk'ab Dios tibaj nee'.

⁶⁷ Tejtzen otk jket ttzi Zacarías tu'n tyolen, bixsen e tak' Espíritu Santo tipemalxin tu'n tkbantexin tyol Dios, bix e xi' tkba'nxin:

⁶⁸ —Jawxit nimset tbi Dios, jatzen Kaawja kibaj ejoo' Israel, cuma min ma ko el tuj tc'u'jxin, bix ma bint tu'nxin tu'n kclet, ejoo' t-xjalxin.

⁶⁹ Ma tzaj tk'o'nxin jun Clol ke nim tipemal. Jatz q'uelela itz'j ti' tiy'jil David, jaj xin cawel ajben te Dios.

⁷⁰ Ma japan bajxin ti'j tyolxin e cyaj tk'o'nxin ke cyu'n kej tyolelxin ajben texin jatxe ootxa.

⁷¹ E cykbaxin at tu'n tul jun Clol ke tu'n kclet tuj cyk'ab kej xjal nchi k'ojl ki'j, bix tu'n ktzakpet tjak' cycawbil kej n-el iiq'uente ke.

⁷² Ma tzaj tk'o'nxin Clol ke tu'ntzen tjapan bajxin ti'j jawnex tyolxin e cyaj tk'o'nxin cye kiy'jil, tu'n tk'ontexin lastim cye t-xjalxin.

⁷³ Bix ma tzaj tk'o'nxin Clol ke tu'n tjapan bajxin ti' tyolxin tuya kiy'jil Abraham.

⁷⁴ E cyaj tk'o'nxin tyolxin te Abraham tu'n cyclet tiy'jil Abraham tuj cyk'ab ke k'ojlel cyi'j. Ma tzaj tk'o'nxin te ke tu'n ktzakpet tuj cycawbil kej k'ojlel ki'j tu'ntzen mi'n bet kk'ij tuya ttz̈i ki'j, sino tu'ntzen tbet kk'ij tu'n kajben te Dios.

⁷⁵ Tajxin tu'n t-xi' kii'n kchunk'lal sakxix bix jiquen twitzxin te cykil k'ij.

⁷⁶ Yaltzen tey, ncy'aal, c'oquela te tyolel jawnex Dios, cuma ckbala tulel Kaaw, tu'ntzen binne cyten xjal oj tul.

⁷⁷ Ckbala cye xjal ti tten tu'n cyclet, jaj tu'n tnajset cyil