48 Nguetho Oją bi bɛ̨ngä ngue dra hyoya 'yɛ̨hɛgä, nɛ gätho yʉ ją'i da 'yɛ̨ngui dá tįngä rá mate Oją.
49 Xʉn ngu ran ho bi 'yørca Oją madą rá ts'ɛdi, nɛ xʉn hotho a.
50 Nɛ da nu rá yembʉi to'o gätho da numansu a.
51 Nu Oją nuįxte tho yʉ́n t'øt'e, bi 'bɛrpa yʉ́ ts'ɛdi ʉ din yɛ̨zɛhɛ ngue im bɛ̨ni jasɛ yʉ́ ts'ɛdi.
52 Nɛ bi 'bɛrba yʉ́ ts'ɛdi yʉ ts'ʉt'abi, nɛ go bi un yʉ́ ts'ɛdi yʉ ją'i thoho.
53 Nɛ bi japi da bą ʉ to'o i honi da bądi, pɛ nu'ʉ to'o him bi hyoni da bądi bi japi di 'bɛ'ʉ.
54 Nɛ nu Oją bi mbäxcahʉ ya ngue dyʉ ją'i israelgähʉ, ngue bi 'yɛ̨njʉ yʉ́ t'ʉhnigahʉ a, nɛ him bi pumbɛ̨ni a ran ho bi ma da 'yørcahʉ.
55 Pɛ bi 'yøt'e tenguthoho bi si a ra Abraham ta t'ørcahʉ, yʉ́m bom'bɛtojʉ, gätho yʉ pa maząi, bi 'yɛ̨n'a ra María 'bʉ mi 'yɛ̨spa Oją.
56 Nɛ nu'a ra María hyuzna bi gopʉ rá ngu ra Elisabet, m'bɛjua bi mbeng bʉ rá ngusɛ.
57 Nɛ bi zøn ra pa dim 'bʉ a rá ts'ʉnt'ʉ ra Elisabet.
58 Nɛ gätho yʉ́ mɛni nɛ yʉ́ mɛnguhʉ bin johya 'bɛ'a bi 'yørpa Oją a ra Elisabet, nɛ bi zøm bʉ rá ngu bi zɛngua a.
59 Nu'bʉ mi gua'an hyąto pa xím 'bʉ a ra t'ʉhni, bi mba nts'its'i da thɛcua rá xifani. Nɛ gätho ʉ mi 'bʉpʉ, bi ma da hyąnba rá thuhu rá ta ngue dí Zacarías.
60 Pɛ nu rá mbe bi ma ngue hin da zä, pɛgue jatho da hyux rá thuhu ngue dí Xuua.
61 Nɛ gätho mi 'bʉpʉ bi 'yɛ̨na: ―Pɛ njo'o n'da ni mɛnihʉ í Xuua, bi 'yɛ̨mbi.
62 Nɛ nu'ʉ, bi uąn yʉ́ 'yɛ, bi 'yän'na rá ta: “'Bɛ'a rá thuhu a ni t'ʉhni,” bi 'yɛ̨mbi.
63 Nu rá ta bʉya bi 'yäh ra søcuą nɛ bi 'yo't'a n'da ram hma ngue bi 'yɛ̨na: “Dí Xuua a ma t'ʉhni.”
64 'Bex bi zä bin yą mahøn'a ra Zacarías bʉya, nɛ bi 'yɛ̨spa Oją a.
65 Nɛ bi hyonya thoho gätho mi 'bʉpʉ. Nɛ gätho yʉ ją'i mi 'bʉpʉ ja yʉ nyuni a ra xɛqui Judea bi 'yø a bin ja.
66 Nɛ gätho bin 'yomfɛ̨nisɛ 'bɛ'a da 'yøt'a ra t'ʉhni, nguetho Oją bi jąpi.
67 Nɛ bin 'youi rá Hogandąhi Oją ra Zacarías, nɛ bim pøngahyą a, bi 'yɛ̨na:
68 Ɛ̨mmɛ dí ɛ̨spa Oją ra Hmu nguetho bi bɛ̨njʉ dyʉ ją'i israelgähʉ, dyʉ judíohʉ, ngue da yąnjʉ.
69 Nɛ nanguehna ma t'ʉhni bim 'bʉi, janangue'a dí pądi him ma ya'a ba pɛnga mam pørpatehʉ i ja rá ts'ɛdi, rám bom'bɛto ra ts'ʉt'abi David a.
70 Gue'a bi bɛ̨nba Oją ʉ yʉ́ pøngahyą maya'bʉ thoho,
71 ngue bi ma da yąnjʉ nangue man sʉihʉ, nɛ nangue gätho ʉ i numan'ʉjʉ.
72 Pɛ nu Oją bi huɛ̨c'ʉ mam bombøtahʉ, nɛ him bi pumbɛ̨ni ran ho mi ɛ̨na da 'yørcahʉ.
73 Nɛ majuąni da 'yøt' Oją a bi xih mam bombøtahʉ ra Abraham,
74 ngue bi xifi da yąnjʉ nangue ʉ man sʉihʉ, nɛ hin ga su ga thąndehʉ a Oją bʉya.
75 Janangue da gohi xʉn ho ma mbʉihʉ bʉ dá nu a Oją, nɛ ga øthʉ ra hogam'bʉi bʉ ja rá hmi.
76 Nɛ nuna ma t'ʉhni, da 'yɛ̨mb yʉ ją'i rá pøngahyą Oją mahɛ̨ts'i, nɛ da xih yʉ ją'i di päh yʉ́n 'yomfɛ̨ni, da dø'ma ra Hmu.
77 Nɛ da xi ʉ da mba ma punbi yʉ́ ts'oqui, nɛ da mba nhyąni.
