San Lucas 1:23-73

²³Mi'ay lanic' Zacarías ipanenni jiƚpe al cuecaj xoute'. Lijou'netsi lipenic' i'huana'ma lejut'ƚ.

²⁴Lijou'ma ixim'me innay ƚipeno Elisabet. Amaquej mut'ƚa emi'moxi, ipajm'ma lejut'ƚ.

²⁵Ticua: “Iƚe laƚ'ipa aƚ'e'epa caƚ'Ailli' ȽanDios. Iƚque aƚsimpa nincuanuc', liƚonc'e'epa laipelaic'ata. Lan xanuc' aimalatets'iconaya.”

²⁶Lixhuaitsi acamts'us mut'ƚa ȽanDios icuxe'epa ti'huaƚa' ƚapaluc quema'a cuftine Gabriel. Umme'ma liƚya' Nazaret lopa'a al distrito Galilea.

²⁷Jiƚpe Nazaret tipalaic'otsi anuli ƚahuats'. Joupa inanc'opoƚtsi temalƚi'me anuli cal xans cuftine José. Cal rey David itatahuelo iƚque José. Ƚahuats' cuftine María.

²⁸Icuaitsi ƚapaluc quema'a, itsufai'ma pe lopa'a María, timi: ―CumMaría, canonhuo'. Cu'ihuo' linespa ȽanDios. Iƚque titoc'i'mo' acueca', etenƚcocopa lopicuejma', aimecanujyaco'. Ima' xonca acueca' lipaxnepo'. Toƚiya aiquipaxnela' lof'as cacaƚ'no'.

²⁹Licuej'ma iƚe lataiqui' Maria ixhueƚco'ma juaiconapa. Timiyoxi: “¿Te caƚnonacopa toƚta'a?”

³⁰Ƚapaluc quema'a timi: ―María aimixpaij'mo'. Ƚinca titoc'i'mo' ȽanDios.

³¹Ima' toxim'moxi minnay. Tipajntsi co'hua tacui'i'ma Jesús.

³²Iƚque ti'i'ma acueca' xans. Tecui'im'me: Ƚi'Hua ȽanDios, iƚque cal Cuecaj Xonca. ȽanDios tepi'i'ma quimane ticuxe'ma to licuxepa cal rey David, iƚque itatahuelo.

³³Ƚo'hua ticuxe'mola' lixanuc', iƚne ixanuc' Jacob. Nij naitsi naipa'eya limane. Locuxeya aimijouya.

³⁴María icuis'e'ma ƚapaluc quema'a, timi: ―¿Teƚe co'iya? Iya' nahuats'. Ailopa'a caipe'ailli'.

³⁵Ƚapaluc quema'a italai'e'ma timi: ―Cal Espíritu Santo timuhuo pe lofpa'a. Toxinguf'moxi lipepaxi ȽanDios, iƚque cal Cuecaj Xonca. Ƚo'hua ƚopajnya ma' i'huexi ȽanDios. Tecui'im'me: Ƚi'Hua ȽanDios.

³⁶Ƚopima Elisabet, tama itojpa caca'no', itsiya innay. Luyaipa quitine tinescoyi, timiyi: “Ima' mijuiqui”. Itsiya ixhuaita acamts'us mut'ƚa' innay.

³⁷ȽanDios aimixina quipime. Jahuay nipajnya ti'e'ma.

³⁸María timi: ―Ne'. ȽanDios aiPoujna. Ma to laƚmipa, toƚta'a ti'iƚa'. Toƚta'a cuyaicoƚa'. Ƚapaluc quema'a ipanni pe lopa'a María, i'huanapa.

³⁹Iƚniya ƚitiné ipanni María lipiƚya'. Aiquicoƚ'ma, i'hua'ma ƚijualay, ticuaita anuli liƚya' lopa'a al distrito Judea.

⁴⁰Icuaitsi liƚya' itsufai'ma lejut'ƚ Zacarías, inom'ma Elisabet.

⁴¹Jiƚpe al 'hora licuej'ma Elisabet tinoninni, ƚi'hua ƚo'nico licu'u iyuf'conni. Cal Espíritu Santo ticuxe lipicuejma' Elisabet.

⁴²Ipalai'ma ujfxi, timi María: ―Ima', xonca acueca' lipaxnepo' ȽanDios. Toƚta'a aiquipaxnela' lof'as cacaƚ'no'. Joupa apaxi ƚo'hua ƚo'nico locu'u.

⁴³Itsiya aixina' acueca' laƚ'ipa. Iya' ni naitsi caca'no'. Ima' ƚotaic' ƚaiPoujna, ti'i'mo' i'máma' iƚque. Itsiya ocuai'ma pe laifpa'a, lahuenge.

⁴⁴¡Xinƚa'! Laicuejpa laƚnompa, jiƚpe 'hora, ƚai'hua ƚo'nico laicu'u iyuf'comma. Juaiconapa ixocomma queta.

⁴⁵Al ƚinca, ima' toyaijma al c'a. Mepenufpa linespa ȽanDios, iƚe limipo'. Onespa: “Iƚe lataiqui' tenanƚ'ma”.

⁴⁶María ines'ma: Iya' cax'najtsi'i caƚ'Ailli' ȽanDios.

⁴⁷Tixoqui neta ca'nujuaitsi ȽanDios, iƚque Ƚalunƚu'eya.

⁴⁸Iya' tama ni naitsi cahuats' iƚque aicalatets'i', aƚpaxnepa. Lan xanuc' ticua'me: “Iƚque María al c'a tuyaijma”. Toƚta'a tines'me lan xanuc' nomana' itsiya, jouc'a nomajnyacu locuaicoya quitine.

⁴⁹Cal Cuecaj CanDios aƚtoc'ipa juaiconapa aƚpaxnepa. Ma' iƚque cal Paxi CanDios.

⁵⁰Iƚque tixinnila' acuanuc'la jahuay lixanuc', iƚne noxpaic'epá. Iƚne nomana' itsiya litine, jouc'a nomajnyacu locuaicoya quitine.

⁵¹Iƚne lan xanuc' nonescopoƚtsi: “Illanc' ninc'tsilaj xanuc'”, ȽanDios joupa eca'nepola' ni petsi li'a ƚamats'. Toƚta'a imuc'ipola' acueca' lipujfxi, acueca' lo'epa.

⁵²Iƚonc'e'epola' liƚmane lan tsilaj quincuxepá. Lijoupa epi'ipola' liƚmane lan xanuc' xonca a'ojca.

⁵³Pe nonle'epá ites'minapola' xonca ixhuaitola'. Iƚne pe ts'iƚ'hueca acueca' quiƚ'huexi, ummenapola' ixcuajma liƚmane, ailopa'a quepi'ipola'.

⁵⁴ȽanDios ƚaƚPoujna aƚtoc'iponga', illanc' ixanuc' ƚaƚtatahuelo Israel, iƚque inieto Abraham. ȽanDios joupa inespa: “Caxim'mola' acuanuc'la, catoc'i'mola' iƚniya Abraham, ƚi'hua jouc'a linaxque' ƚi'hua. Catoc'i'mola' jahuay lixanuc' Abraham, iƚque itatahuelo iƚniya.” ȽanDios aiquimenc'ejma iƚiya litaiqui' limipola' laƚtatahueló. Ma to limipola', toƚta'a li'epa.

⁵⁶María ipajnhuo'ma to afanej mut'ƚa lejut'ƚ Elisabet. Lijou'ma i'huana'ma ipainanni lejut'ƚ.

⁵⁷Lixhuaitsi al pelƚa mut'ƚa Elisabet ipo'no'ma ƚi'hua. Ipajntsi amijcano.

⁵⁸Lan huejnca lan xanuc' jouc'a lipimaye Elisabet icuej'me li'epa ƚaƚPoujna ȽanDios, iƚque iximpa cuanuc' Elisabet, acueca' litoc'ipa.

⁵⁹Lixhuaita al paico quitine efot'ƚunni ti'e'me ma to liƚ'ejma'. Coƚa' tecui'i'me Zacarías ma to lipuftine qui'ailli'.

⁶⁰Qui'máma' italai'e'e'mola' timila': ―A'i. Lacui'i'me Juan.

⁶¹Italai'e'me, timiyi: ―¿Te colacui'icoyacu Juan? Laƚpimaye, ailopa'a quecui'impa toƚta'a.

⁶²Ipalaic'oco'me le'a liƚmane qui'ailli' ƚahuac'hua. Icuis'e'me: ―¿Te cofcuapa? ¿Te caftine calacui'iyacu ƚamijcano?

⁶³Zacarías ixahue'e'ma tini'inƚe anuli la'hua caxma tiniƚ'ma. Ini'im'me. Iƚque iniƚ'ma: “Lipuftine aJuan”. Lan xanuc' aiquiƚcuec'e li'ipa. Ticuayi: ―¡Toƚsinƚe! ¡Iniƚpa: “Juan”!

⁶⁴Aiquicoƚ'ma, ixaƚna'ma lejoc' Zacarías, uhuaƚquenamma ƚipaƚ, tipalay. Ix'najtsi'i'ma ȽanDios.

⁶⁵Lan huejnca lan xanuc' ixpailij'mola'. Ixim'me acueca' li'ipa. Lan xanuc' ni petsi ƚijualay al distrito Judea tuya'ayi li'ipola' Elisabet y Zacarías.

⁶⁶Licuej'me ticuis'eyoƚtsi, timiyoƚtsi: ―Iƚque ƚamijcano: ¿Te co'eya? y ¿te co'iya? ȽanDios itoc'i'ma ƚamijcano, ipaxne'ma.

⁶⁷Cal Espíritu Santo icuxe'ma lipicuejma' Zacarías. Ma to Ƚandios mimi, ma toƚta'a Zacarías tuya'e'. Tuya'e':

⁶⁸¡Aƚs'najtsi'i'me ȽanDios, iƚque ƚalanDios illanc' ixanuc' Israel! Aƚtoc'iponga', tocomma aluhuaƚponga' petsi iƚne laƚ'e'eponga' laic'. Iƚniya aimalulijyaconga' illanc' ixanuc' ȽanDios.

⁶⁹ȽalanDios, iƚque iPoujna cal rey David, lapi'iponga' Ƚalunƚu'eyaconga'. Maƚque cal rey David itatahuelo iƚque.

⁷⁰Luyaipa quitine ȽanDios u'ipola' lipaxij profeta toƚta'a lo'eya. Iƚniya u'iyale'me, u'im'mola' laƚtatahueló.

⁷¹Iƚe litaiqui' ȽanDios tuya'e' te ts'i'ic' laƚtoc'iyaconga'. Ticua: “Cunƚu'e'molhuo'; iƚne naixtuc'opolhuo' aimulijyacolhuo'. Jouc'a no'epolhuo' laic' ailopa'a co'eyacolhuo'.”

⁷²Ticua: “Iya' aiquimenc'ecoyacola' laixanuc'”. Iƚne lixanuc' ȽanDios maƚniya aƚtatahueló illanc'. ȽanDios i'nujuaitsi lipaxi cataiqui', iƚe lipo'no'ipola' lixanuc'. q

⁷³Joupa inespa lunƚu'e'monga', aimalulijyaconga' iƚniya nalixtuc'oponga'. ȽanDios toƚta'a limipa ƚaƚtatahuelo Abraham. Joupa icuapa aƚpo'no'monga' pe ailopa'a caxpaiqui', jiƚpiya laxc'onƚingoƚai'me ƚalanDios. Jahuay ƚalunxajma' lihuej'me ȽanDios, aimaƚ'econayacu lixcay. Maƚmana' fa'a li'a ƚamats', jahuay laƚpitine, luyalaico'me to luyalaicopa lixanuc' ȽanDios, iƚque cal Paxi.