21 Laḻni cayajc dee, cadxeloj rebejṉ ni suga' nez ro' yudxan cabäjzreni guiṟii Zacaríi sa'csi cayaclaani neṉ yudxan.
22 Che biṟii Zacaríi, di niajcdiru niniini loj rebejṉ; dxejc gucbeereni yu' xhi cosro bahuiini neṉ yudxan xten guidoo. Dxejc con seen guninäjni rebejṉga, sa'csi xheti xse'ni te niniini.
23 Che gulujx bejnni dzuun neṉ guidoro, gubi'ni rolijzni.
24 Che gudejd redxej dxejcti bazeṉ nuu Elisabe't, chäälni, bäz, gaii bäii diruni niṟii rolijzni. Bejnni xhigab, räjpni:
25 “Si'c bejn Dad Dios narä ṉaj, gucnäjni narä te diru bejṉ cuälaz narä sa'csi ruti xi'nä.”
26 Che gudejd xho'p bäii, baxhaḻ Dios xanglni Gabriel lo te guedx Galilee ni laa Nazare't,
27 te chahuiini te dxapxteeb ni laa Marii. Agojt xtiidxni te guchṉaani te dade' ni laa José. Dade're najc xagdoo toṟeii David.
28 Biu' anglre cadro sobga' dxape'ga, räjpni lojni: ―Xchan, dxa'p ni sanälajz Dios, ni agule Dios loj guiraa regunaa. Dios gacnäjlu. Abenle' Dioslu loj guiraa regunaa.
29 Luxh che bahuiini lo xangl Dios bidxelojni lo rextiidxni, rujnni xhigab: “¿Xhicuent caniini si'c loä?”
30 Dxejc räjp xangl Dios lojni: ―Na'c guidxejblu, Marii; agule Dios luj.
31 Bacuadiajg diidx. Suulu bäz, su' te xi'nlu. Che gaalni guirilajni Jesús.
32 Laani sajcni te bejṉ ni sacduxh. Sirilajzani Xi'n Gueb Dios ni yu' xhaguibaro. Gueb Dios sujn gacni ṟeii sigajc ni gujc toxtadgoldooni David,
33 te tejpas guinibeeni loj rexi'n Israel, luxh dipac xcäḻrnibeeni nitloj.
34 Dxejc gunabdiidx Marii lo xangl Dios, räjpni: ―¿Xho mood gac dee? Ni dxapxteeb narä, gajd narä gumbeä niguii.
35 Badzu' xangl Dios diidxre lojni, räjpni: ―Sprit Dxan xten Dios siääd lojlu, xcäḻrnibee Gueb Dios ni yu' xhaguibaa suhuajcwni luj si'c te za. Ni'cni bäz ni gaal sajcni te beṉdxan, sibälaj bejṉni Xi'n Dios.
36 Näjza sa'lu Elisabe't su' te xi'nni luxh anajcni te beṉgool; ni'cni gunaa nani najreni digacdi chu xi'nni agujc xho'p bäii nuuni bäz.
37 Xheti te cos ni naganduxhtej nez loj Dios ―räjp Xangl Dios.
38 Dxejcti räjp Marii: ―Narä nacä xmos Xtadnu Dios; mbaj, sugunnäj Dios narä si'ctisni gunii gueblu loä. Dxejcti biunejz angl xten Dios lojni, sä'tini.
39 Neṉ redxejga, basquejn Marii sääni lo te guejdx ni tre' neṉ redajn xten Judea.
40 Biu'ni rolijz Zacaríi, guniini xtidxbee loj Elisabe't.
41 Che biejn diajg Elisabe't guniini, biniib xi'nni xque'ni, gudxaj Sprit Dxan xten Dios lastoo Elisabe't.
42 Dxejc dipduxh guniini räjpni: ―Abenle'ru Gueb Dios luj loj guiraa regunaa. Abenle'zani xi'nlu.
43 ¿Chu narä te siädhuii xnan Xtioozä narä?
44 Biejntis diagä xtiidxlu, bibalazgajc xi'nä, biniibni xque'ä.
45 Sibaa lajzlu, luj ni huililajz sisiojbpac nani gunii Xtadnu Dios.
46 Dxejc räjp Marii: Xaimä rliä'p xpala'n Xtadnu Dios.
47 Rbalazduxhza lastoä xcuent Dios ni rusḻaa narä lo dojḻ.
48 Sa'csi agule Dios narä, nacä te mos gunaa ni xhet sajcdi, luxh ṉajli sinii rebejṉ näjza reni churu chu lo guedxliuj, chicbaani loj guiraa regunaa.
49 Sa'csi Gueb Dios ni rajp guiraa yäḻrnibee abejn xhidajl cosro loä, dxanduxh najc lajni.
50 Dini cuääz gulaslajzni guiraa rebejṉ ni riu xtiidxni, reni rajṉni.
51 Xhidajl cosnagajn abejnni con lagajc ṉaani, abatie'chni renani rustioob lastooreni rliä'p lagajc xpala'nreni.
52 Abasajbni reni rnibee, per rebeṉnadolajz bejnni gacreni beṉro.
53 Bachajni xque' reni calaan, badeedni ganax cossa'c, niluxh badzu'ni rebejṉ ni yu' xhixtenreni xhet badeed dini lojreni.
54 Gucnäjni nacióṉ xten xpejṉ Israel, ni najc xmos Dios. Di lajzni niäḻ nulaslajznireni
55 sa'csi si'c bia'nni diidx con retoxtadgoldoonu, sinuu gulazlajzni toAbram näjza rexagdooni par tejpas.
56 Dxejc bia'n Marii rolijz Elisabe't si'cti choṉ bäii, dxejc gubisacni rolijzni.
57 Che baza' xpäi Elisabe't, dxejc gojl xpäzni te bäz niguiini.
58 Dxejc bidzujṉ rexpisiṉni näjza resa'ni biädhuiireni guiro'preni che gucbeereni lacti hueen gujc Dios con laani. Bibalaznäjrenini.
59 Che gudejd xhujṉ dxej, huinäreni bäze'ga chuni bee. Rlajz rebejṉ nirilaj bäze'ga si'c laa xtadni, Zacaríi.
60 Niluxh xnanni räjp: ―Na'c, guirilajpacni Juan.
61 ―¿Xhicuent? ―räjpreni―. Ruti xfamiḻlu ni laa si'c.
62 Dxejcti gunabdiidxreni con seen lo xtad bäze'ga te gacbeereni xho rlajzni guirilaj bäze'ga.
63 Xtadni gunab te la' guijtz, dxejc bacuaani: “Lajni najc Juan.” Dxejc guiraareni bidxelojreni.
64 Luxh lagajc dxejc gujc gunii Zacaríi stehuält, dxejc guslojni calä'pni xpala'n Dios.
65 Bidxeloduxh rexpisiṉreni xhini'c gujc ro'c. Luxh bire'ch diidx xcuent recosre guideb neṉ redajn xten Judea.
66 Guiraa reni biejn diajg rediidxga gusloj cayujnreni xhigab, dxejc gunabdiidxreni loj sa'reni: ―¿Chuchani'c gac biuxe'ga? Si'c guniireni sa'csi huenliisi abenle' Diosni.
67 Dxejcti biääd Sprit Dxan xten Dios neṉ lastoo xtadni Zacaríi, gusloj caniini rediidx ni badeed Dios lojni, räjpni:
68 Guiliä'pnu xpala'n Dios, Xtios rexpejṉ Israel, sa'csi abiädhuiini loonu, ni najcnu rexpejṉni, te siädgusḻaani nuurnu neṉ dojḻ.
69 Abaxhaḻni loonu te bejṉ ni rajp yäḻrusḻaduxh bejṉ neṉ dojḻ. Najcni te rexagdoo toxmosni David.
70 Lagajc si'cni badeed Dios gunii redade' ni bacuaa xtiidxni lo guijtz galoo:
71 Susḻaani nuurnu loj reni rdxe'ch loonu, näjza ladzṉaa rebejṉ ni gulälaz nurnu.
72 Te gulaslajzni retoxtadgoldoonu, te soob diidx ni bia'nni con rebejṉga.
73 Scree bia'nni diidx con toxtadgoldoonu, Abram:
74 Susḻaani nuurnu ladzṉaa rebejṉ ni rdxe'ch loonu, te na'c guidxeebnu chunu lojni gusoobnu xtiidxni,
75 con yäḻnabaṉsa'c näjza yäḻguxhtis guiraa redxej ni guibajṉnu.
76 Luxh luj, bäze', sirilajlu dade' nani rnii xtidx Gueb Dios ni yu' xhaguibaa, sa'csi sinijdlu lo Dad te gusucheelu rexnezyulajzni,
77 te gunlu gacbee rexpejṉni xho gac ḻaani lo dojḻ, te gac guibicaj xtojḻreni.
