11 Acxni̠ Jesús xtla̠huama nac tiji ti̠tum xama nac Jerusalén, y ca̠ti̠puntáxtulh lacalhu̠hua lactzu̠ ca̠chiquí̠n hua̠ntu̠ ca̠ma̠peksi̠y Samaria chu Galilea.
12 Acxni̠ cha̠lh nac aktum actzu̠ ca̠chiquí̠n taúcxilhli kalhacá̠hu lacchixcuhuí̠n hua̠nti̠ xca̠pasani̠t pu̠lactum li̠xcájnit tzitzi huanicán lepra, xlacán juerza tzinú lakamákat tata̠yachá.
13 Huata caj taquilhánilh y chiné tahuánilh: —¡Luu xli̠ca̠na catlahua lanca li̠tlá̠n caquila̠lakalhamáhu!
14 Acxni̠ xlá ca̠úcxilhli chiné ca̠huánilh: —Tla̠n, pero la̠li̠huán chú capítit ma̠siyuniyá̠tit mimacnicán cha̠tum cura la̠qui̠ xlá nama̠luloka pi̠ aya pacsni̠tátit mintajatatcán. Acxni̠ xlacán takáxmatli hua̠ntu̠ ca̠huanícalh la̠li̠huán táalh, pero acxni̠ xtatla̠huamá̠nalh nac tiji ca̠pacsniko̠lh a̠má xtajatatcán hua̠ntu̠ xca̠kalhi̠y.
15 Y cha̠tum chixcú hua̠nti̠ xalac Samaria xlá ni̠ judío xuani̠t, acxni̠ xlá maklhcátzi̠lh pi̠ aya xtatla̠nti̠ni̠t huata la̠li̠huán talákspitli y luu palha la̠ta xca̠tasati̠lhay xlakachixcuhui̠ma y xpa̠xcatcatzi̠nima Dios.
16 Amá samaritano acxni̠ cha̠lh nac xlacatí̠n Jesús la̠li̠huán lakatatzokóstalh la̠qui̠ chuná napa̠xcatcatzi̠niy y taquilhpú̠talh hasta caní lí̠cha̠lh xlacán nac ca̠tiyatni.
17 Pero Jesús chiné chuhuí̠nalh: —¿Ja, lácu pi̠ ni̠ kalhacá̠hu xtahuani̠t hua̠nti̠ xca̠kalhi̠y a̠má li̠xcájnit tzitzi y hua̠k tápacsli? ¿Nícu chi̠nchú tayá̠nalh xa̠makapitzí̠n kalhanaja̠tza?
18 ¿Lácu pi̠ caj xma̠nhuá eé chixcú hua̠nti̠ ni̠ judío huata huá táspitli la̠qui̠ napa̠xcatcatzi̠niy Dios?
19 Acali̠stá̠n chiné li̠ma̠péksi̠lh a̠má chixcú: —La̠li̠huán cata̠ya y capittá li̠pa̠xúhu nac mínchic. Huix luu xli̠ca̠na tatla̠nti̠ni̠ta cumu chuná quili̠pá̠huanti.
20 Ama̠ko̠lh fariseos takalhásquilh Jesús nícu acxni̠ luu nachín a̠má xtapéksi̠t Dios hua̠ntu̠ nama̠tzuqui̠y. Xlá chiné ca̠kálhti̠lh: —Acxni̠ nachín xtapéksi̠t Dios ni̠ calacpuhuántit para tícu tla̠n naucxilha.
21 Y ni̠para tícu catíhua: “Uú huí”, osuchí “Ahuilachá”; porque a̠má xtapéksi̠t Dios hua̠ntu̠ cli̠chuhui̠nani̠t aya antiyá lama nac milaksti̠pa̠ncán.
22 Acali̠stá̠n xlá chiné ca̠huánilh xtama̠kalhtahuaké̠n: —Na̠ nalakchá̠n quilhtamacú acxni̠ huixinín naucxilhputuná̠tit la̠ta lácu aquit Xatalacsacni Chixcú nacmimparay la̠qui̠ nactzucuy ma̠peksi̠nán, pero ni̠lay catiucxílhtit.
23 Y huixinín naca̠li̠ta̠chuhui̠nancaná̠tit: “Uú huí”, osuchí naca̠huanicaná̠tit: “Anú huilachá.” Pero huixinín ni̠ capítit y ni̠ caca̠najlátit.
24 Porque na̠ xta̠chuná cumu la̠ tasiyuy maklipni lacatum lacatúm nac akapú̠n, pus na̠chuná chú aquit Xatalacsacni Chixcú chuná ámaj lakchá̠n quilhtamacú acxni̠ nacmimparay.
25 Pero pu̠lh la̠n nacpa̠ti̠y uú nac ca̠quilhtamacú, porque u̠ma̠ko̠lh cristianos hua̠nti̠ talamá̠nalh la̠ ca̠lacchú quilhtamacú maktum naquintalakmakán.