1 A̱nda̱ já na̱cachi Jesús já xi̱hín na̱ xíca tuun xi̱hi̱n á: —Níí tiempo quixi ña̱ha ña̱ cája ña̱ ná ndicají ini ña̱yivi caja na cua̱chi. Joo ndáhví na̱cuu na tá ná jándicava na inga na nu̱ú cua̱chi.
2 Ja̱nda̱ va̱ha chága̱ ná candi̱co̱ in yu̱ú yo̱jó ji̱co̱ ná ta ná ndihi sa̱ha̱ ná ca̱há tañu̱hú a̱ ju̱ú ga̱ ña̱ jándicava na na̱ nda̱hví yóho nu̱ú cua̱chi.
3 Cuéntá coo ndó xi̱hín ña̱ cája ndó. ʼTá ná caja ñani táhan ndó cua̱chi nu̱ ndo̱, jána̱ni ndó da̱. Ta tá ná ta̱hvi̱ ini da sa̱há cua̱chi na̱caja da, caja cáhnu ini ndó sa̱ha̱ dá.
4 Ta va̱tí u̱sa̱ táhndá ná caja da cua̱chi nu̱ ndo̱ in qui̱vi̱ ta já va̱xi tucu da nu̱ ndo̱ u̱sa̱ táhndá ta já cásáhá cáchí tucu da xi̱hi̱n ndo̱ ña̱ a̱ ndícó co̱o ga̱ da̱ caja da ña̱ já ndítahan nu̱ ndó caja cáhnu ini ndó sa̱ha̱ dá —na̱cachi Jesús.
5 Tá na̱ndihi já na̱cachi na̱ xíca tuun xi̱hi̱n Jesús cán já xi̱hi̱n á: —Vá ná caja ndó ña̱ ná candeé chága̱ ini nde̱ ndo̱hó —na̱cachi na xi̱hi̱n á.
6 A̱nda̱ já na̱cachi Jesús já xi̱hi̱n ná: —Tá ná candeé ini ndó ye̱he̱ va̱tí cúú á tátu̱hun in ndiquí mostaza cuu cachi ndó xi̱hín in yíto̱ cáhnu ña̱ ná cu̱hu̱n dó candichi dó ini tañu̱hú ta chí já ndusa coo.
7 ʼTá íin in mozo ndo̱ ta chindahá ndó da̱ yúcu̱ ña̱ ná tiin da ya̱ta̱ á candaa da quíti̱ ja̱na̱ ndo̱ ta tá ná ndicó co̱o da̱ cán já ama ná cachi ndó xi̱hi̱n dá ña̱ ná ya̱ha da caco̱o da nu̱ mesa cuxu da.
8 Ña̱ caja ndó quéa̱ cachi ndó já xi̱hi̱n dá: “Jácatáhan ña̱ha ná cajíni i̱ ta caja ndíví ná cuxu u̱. Ta tá sa̱ na̱ndihi na̱xixi i̱ já cuxu mún tá cúnu̱n”, ña̱ ja̱n va quéa̱ ca̱ha̱n ndó xi̱hi̱n mozo ndo̱.
9 Ta ama ná ndiquia̱hva ña̱yivi ndixa̱hvi nu̱ mozo na̱ tá na̱ndihi na̱caja da in chuun na̱sahnda na nu̱ dá caja da.
10 Ta quia̱hva já ndítahan coo ri xi̱hi̱n ndóhó va. Tá ná ndihi na̱caja ndó tócó ndihi chuun na̱sahnda Ndióxi̱ nu̱ ndo̱ já ndítahan nu̱ ndó cachi ndó já: “Mé nde̱ cúú nde̱ mozo co̱ó sa̱ha̱ ta na̱caja cuití va nde̱ chuun ndítahan nu̱ú nde̱ caja nde̱”, já ndítahan cachi ndó —na̱cachi Jesús xi̱hín na̱ cán.
11 Ta nani xíca Jesús cua̱ha̱n chí ñuu Jerusalén já na̱ya̱ha chí xoo nu̱ íin lindero na̱ Samaria xi̱hín na̱ Galilea.
12 Ta tá na̱xi̱nu̱ co̱o a in ñuu loho já na̱queta u̱xu̱ ta̱a ndóho cue̱he̱ táhyi̱ nu̱ á joo na̱sacui̱ta xícá da̱ nu̱ á.
13 Já na̱casáhá cáyuhú da̱ nu̱ Jesús já na̱cachi da já xi̱hi̱n á: —Jesús, maestro, candáhví loho ini ndó nde̱he̱ —na̱cachi da xi̱hi̱n Jesús.
14 Tá na̱xini Jesús ndíhu̱xu̱ da̱ cán já na̱cachi a já xi̱hi̱n dá: —Cuáhán ndó na̱ha̱ ndó mé ndó nu̱ú na̱ cúú ju̱tu̱ —na̱cachi Jesús xi̱hi̱n dá. Ta nani xíca ndihi da cua̱ha̱n da̱ na̱ndivií yiquí cu̱ñu da ta na̱ndindaa cue̱he̱ da̱.
15 Ta ndaja coo in táhan ndíhu̱xu̱ da̱ cán tá na̱xini da ña̱ na̱ndivií yiquí cu̱ñu da já na̱cavatá ndiva̱ha da. Ta na̱casáhá da̱ cája cáhnu da Ndióxi̱ cáyuhú cóhó da̱ já na̱ndicó co̱o da nu̱ Jesús.
16 Já na̱caxítí da̱ nu̱ á ja̱nda̱ quia̱hva na̱xi̱nu̱ taan da nu̱ ñúhu̱ jáchi̱ ndíquia̱hva ndiva̱ha da ndixa̱hvi nu̱ á. Ta mé da̱ta̱a yóho cúú dá da̱ Samaria.
17 A̱nda̱ já na̱cachi Jesús já xi̱hi̱n dá: —U̱xu̱ cúú da̱ na̱ndiva̱ha na̱caja i̱. Joo i̱n da̱ cán co̱ó na̱xeen toho da ndicó co̱o da ndiquia̱hva da ndixa̱hvi nu̱ú i̱.
