San Lucas 16:12-17

¹²Dan' de c̱hele yežlio nga, c̱he Diosen' gague c̱helen'. Na' še bitw chonḻe can' cheyaḻa' gonḻe len da' nac c̱he', bitw goṉe' le'e da' zaca'ch da' bi te c̱hen.

¹³’Nono mos gac gone' žin len c̱hop x̱ane' to ši'ize, ḻe še gone' ca', gue'ede' to x̱an žinṉa' na' gacde' yetoe'; o gone' žin c̱he toe' do yic̱hj do laže' na' c̱he ben' yeto gonen' do chža'alaže'ze'. Ḻecze ca' le'e, bitw gac gonḻe xšin Diosen' do yic̱hj do laže'le na' gonte xšinḻe cont gacle beṉe' gwṉi'a.

¹⁴Na' ḻecze nita' beṉe' fariseo ca' chesende' xtiža' Jesúsen', na' gosezi'diže' ḻe', ḻe gosaclaže' yesaque' beṉe' gwṉi'a.

¹⁵Na' gož Jesúsen' ḻegaque': ―Le'e chonḻe cont beṉac̱hen' chesacde' chdaczle ḻicha, perw Diosen' ṉeze nle'ede' yic̱hjlažda'ole, na' Diosen' chgue'ede' baḻ da' chesaque beṉac̱hen' zjanaquen da' žialao xen.

¹⁶Na' gozna' Jesúsen': ―Gwzolaon cani'te bžinten cate' bla' Juanṉa' bedetix̱jue'ede' xtiža' Diosen', ley dan' bzoj da' Moisés len dan' bosozoj yezica'chle beṉe' gosoe' xtiža' Diosen' bzejni'in chio' c̱he Diosen'. Na' ṉa'a gwzolaon len Juanṉa', ṉe' nita'cze beṉe' cheseyix̱jue'ede' Diosen' ṉabi'e yic̱hjlaždao' beṉe' yosozenague' c̱he'. Na' beṉe' zan cheseyiljue' nacle yesone' cont ṉabia' Diosen' yic̱hjlažda'ogaque'.

¹⁷’Ḻa'czḻa' še yežlion' len da' ca' zjažia ḻe'e yaban' yesede c̱hegaquen, ca nac Xtiža' Diosen' dan' nyojen, ṉe late' daon' cbi te c̱hen.