7 Naꞌra una Jesús rëbinëꞌ benꞌ laochula: ―Uyo yetibi laoloꞌ luꞌu pozo nisa lao Siloé, ta inaro xtiꞌidzaꞌro: Pozo nisa quie benꞌ uyo lao laza benꞌ tula. Biz̃i uyo benꞌ laochula yetibinëꞌ laohuëꞌ, naꞌ biz̃i bedyinnëꞌ z̃an yuꞌu quienëꞌ baoyalo laohuëꞌ barlëꞌënëꞌ.
8 Naꞌra yaca benꞌ nitaꞌ gaꞌalaꞌ ga zu benꞌ abeyalo laohue, len yacara los demás benꞌ tula, benꞌ bezaque chi lënëꞌ requeꞌnëꞌ rnabëꞌ gun, caora naꞌ unayaquëꞌ rëbiyaquëꞌ laguedyiyaquëꞌ: ―¿Cala benꞌ niga requeꞌ rnaba gun yugu dza?
9 Bala yaca benëꞌ unayaquëꞌ: ―Lëlëbëꞌ. Ibalayaquëꞌ unayaquëꞌ: ―Lëbëꞌ raquero. Pero biz̃i cuincazi benꞌ beyalo laohue unëꞌ: ―Lënëꞌëdiꞌ.
10 Naꞌra unabayaquëꞌ lëbëꞌ: ―¿Biz̃i baoꞌ ta belëꞌëloꞌ?
