3 ―Ja kwityiinꞌ yu kwa siꞌya kiꞌya nu ndukwi yu, kwiꞌ ja kwityiinꞌ yu siꞌya kiꞌya nu ndukwi neꞌ kula ꞌin yu ―ndukwin Jesús ꞌin neꞌ―. Kwityiinꞌ yu xa nu ngula yu chaꞌ ka ñaꞌan nten sa ñaꞌan chaꞌ tnun ka bra nu kuꞌni Ndiose chaꞌ chkaa yu.
4 Bra nu ti xaa ka kuꞌnian tñan ―ndukwin Jesús―; xa wa ndyaa kwichaa, ja tukwin ka kuꞌni tñan bra kanꞌ. Kwiꞌ ngwañaꞌan naꞌ ―ndukwin―, ndiꞌin chaꞌ kuꞌniǐn nchga tñan nu ngulo Ndiose ꞌñaǎn chaꞌ nu msuꞌwa Ni ꞌñaǎn ndijyaǎn lo chalyuu ―ndukwin Jesús―.
5 Bra nu ti tyiꞌiǐn lo chalyuu, ti taǎn xaa nu xuꞌwi niꞌ kasiya ꞌin nten.
6 Xa nu mdyii ykwiꞌ Jesús, mxtyuu yu chinꞌ tyiꞌa nu ndyoꞌo tuꞌwa yu lyuu, chaꞌ kuꞌni yu chinꞌ yuu kutsuꞌ bra kanꞌ. Mdaꞌan yu yuu kutsuꞌ kanꞌ chunꞌ kiloo yu kwityiinꞌ kanꞌ.
7 Ykwiꞌ Jesús loꞌo yu bra kanꞌ: ―Yaa jyaꞌaan kiloo seꞌen ndiꞌin yla tyiꞌa nde Siloé―. Nchkwiꞌ neꞌ kwa chaꞌ Siloé naan chku kanꞌ, ñaꞌan tiꞌ chkwianꞌ chaꞌtñan: Chku seꞌen nu ngulo tñan ꞌin neꞌ chaꞌ tsaa neꞌ. Kanꞌ chaꞌ yaa yu kwityiinꞌ kanꞌ, yaa mjyaꞌan yu kiloo yu tuꞌwa chku kanꞌ bra kanꞌ. Bra nu ndyaan yu xiyaꞌ bra kanꞌ, wa ngalaa kiloo yu.
8 Loꞌo neꞌ nu ndiꞌin kwiꞌ seꞌen ti seꞌen ndiꞌin nu ngwa kwityiinꞌ kanꞌ, neꞌ nu wa naꞌan chaꞌ mjñan yu lomstan nu ngwa xkanꞌ, ykwiꞌ neꞌ kanꞌ loꞌo taꞌa neꞌ chaꞌ ꞌin yu: ―Nu kiꞌyu re, ¿ta ti kwiꞌ yu re lka nu mdukwa tuꞌwa tuwiin mjñan yu lomstan ꞌin nten a?
9 ―Ti kwiꞌ kanꞌ lka ― ndukwin ska ta neꞌ. ―Siꞌi yu kanꞌ, ni siya suꞌwa ñaꞌan tloo yu re ―ndukwin xka ta neꞌ. Loꞌo mxkwen ti kwiꞌ nu kiꞌyu kanꞌ chaꞌ ꞌin neꞌ bra kanꞌ: ―Naꞌ lkaǎn nu kanꞌ.
10 Kanꞌ mnichaꞌ neꞌ ꞌin yu: ―¿Ni sa ñaꞌan ngwa chaꞌ nchkaa kiloo ni a?
11 ―Ska nten nu naan Jesús, kanꞌ lka nu mxtiyaaꞌ chinꞌ yuu kutsuꞌ chaꞌ taꞌan yu chunꞌ kiloǔn ―ndukwin―. Kanꞌ ngulo yu tñan ꞌñaǎn chaꞌ tsaꞌaǎn jyaꞌaǎn kiloǔn nde chku Siloé. Kanꞌ chaꞌ yiꞌaǎn mjyaꞌaǎn kiloǔn la kanꞌ, loꞌo bra ti ngalaa kiloǔn; suꞌwe ꞌa nda xaa kiloǔn ni.
12 ―¿La nde yaꞌ ndyaa yu kanꞌ a? ―ndukwin neꞌ ꞌin yu bra kanꞌ. ―Ja jlyo tiǎnꞌ ―ndukwin yu.
13 Ndyaa loꞌo neꞌ ꞌin yu nu ngwa kwityiinꞌ kanꞌ seꞌen ndiꞌin neꞌ fariseo niꞌ lyaa.
14 Tsan nu nxitñaꞌ neꞌ ngwa kanꞌ, kwiꞌ tsan kti ꞌa ngwa xa nu mxtiyaaꞌ Jesús yuu kutsuꞌ kanꞌ, yꞌni yu joꞌó kiloo yu kwityiinꞌ kanꞌ.
