39 Chiꞌchi rahbi raꞌ ba loh Jesuhs: ―¡Xtaada nu naa guehtu Abrahn! Ya chiꞌchi rahbi Jesuhs: ―Sidela laꞌh tu guchii tu naa tu lliiꞌn guehtu Abrahn, ñuhnn tu ziga bwiꞌhnn guehtu Abrahn,
40 pwihsi naꞌh nicala guñiꞌn loh tu dxyiꞌdxyi guchii nin baniꞌhi Dxiohs guiñiꞌn loh tu, ya laꞌh tu xclaaꞌdzi tu gadxiinn tu naꞌh, ¡nee guehtu Abrahn ayi guyuuꞌ ba lligaaba ziga lligaaba nin nuu tu!
41 Laꞌh tu ruhnn tu ziga ruhnn xtaada tu. Ya chiꞌchi rahbi raꞌ ba loh Ñiꞌh: ―¡Ayi nee dxiꞌh nu naa nu lliiꞌn loh nehza bwiinn, sino que tuhbi dxiꞌh Daada Dxiohs naa Xtaada nu!
42 Chiꞌchi rahbi Jesuhs loh raꞌ ba: ―Sidela guchii tu naa Dxiohs Xtaada tu, pwihsi ñantsiiꞌhi tu naꞌh, laasii naꞌh zeꞌldahn pur xcweenta Dxiohs nee laꞌn zuuꞌhu loh tu riiꞌ; naꞌh ayi zeꞌldahn pur xcweenta gahcahn, sino que Dxiohs guluꞌnehza naꞌh loh guidxyiyuh.
43 ¿Xixnaa ayi rahcabwaꞌ tu xchiꞌdxyiꞌhn? Pwihsi pweda pur nin ayi xclaaꞌdzi tu gucaꞌdxiahga tu xchiꞌdxyiꞌhn niꞌchin.
44 Nin naa xtaada tu laꞌhtu naa bwiinndxaaba, laasii ruhnn tu ziga xclaaꞌdzi ba gaca. Bwiinndxaaba naa tuhbi nin rdxiinn bwiinn desde chin gurihxchih guidxyiyuh, ya nin nagahdxi guidxeela dxyiꞌdxyi nin guchii rwaaꞌ ba. Chin rñiꞌ ba dxyiꞌdxyi nin ayi guiguchii rñiꞌ ba pur laꞌh gahca ba laasii naa ba bwiinn nin ruuꞌyi dxyiꞌdxyi dxixiꞌhw ya naa ba xtaada dxyiꞌdxyi dxixiꞌhw,
45 per ziga naꞌh rñiꞌn dxyiꞌdxyi nin guchii, laꞌh tu ayi riachii stoꞌ tu naꞌh.
46 ¿Chyu tuhbi tu zahca guluuꞌyi xtuꞌldahn? Sidela rñiꞌn dxyiꞌdxyi nin guchii, ¿xixnaa chiꞌh ayi riachiistoꞌ tu naꞌh?
47 Bwiinn nin naa xpwiinn Dxiohs ruzoꞌbadxiahga ba xchiꞌdxyi Dxiohs, per ziga laꞌh tu ayi naa tu xpwiinn Dxiohs niꞌchin nin ayi rucaꞌdxiahga tu xchiꞌdxyi Ñiꞌh.
48 Ya chiꞌchi rahbi raꞌ bwiinn Israel raꞌ: ―¡Nachidxiaapaa nu rsohn chin rachiñiꞌ nu yiꞌh naa luꞌh tuhbi bwiinn Samaritano nee nuu tuhbi bwiinndxaaba stoꞌ luꞌh!
49 Chiꞌchi rahbi Jesuhs loh raꞌ ba: ―Ayi nin tuhbi bwiinndxaaba stoꞌn; nin ruꞌnnahnsihn naa ruhnlasahcaꞌhn xcweenta Xtaaꞌdahn nin naa Dxiohs; ya laꞌh tu rbweꞌhestoꞌ tu naꞌh.
50 Naꞌh ayi chiꞌhyihn chyu guiñiꞌzaꞌca naꞌh nicala nuu chyuulla nin rdxiꞌhyi guiñiꞌzaꞌca bwiinn naꞌh, ya laꞌh ba naa nin guunn guelguxchisi.
51 Pwihsi guchiin nin rñiꞌn loh tu bwiinn nin guzoꞌbadxiahga xchiꞌdxyiꞌhn ayi paꞌca gachi ba.
52 Ya chiꞌchi rahbi raꞌ bwiinn Israel raꞌ chi: ―¡Yannah naann dziꞌtsi nu nuu tuhbi bwiinndxaaba stoꞌ luꞌh! Guehtu Abrahn cun garaa raꞌ guehtu daada raꞌ nin guñiꞌ xchiꞌdxyi Dxiohs guhchi raꞌ ba, nee yiꞌh nnaa luꞌh: “¡Bwiinn nin guzoꞌbadxiahga xchiꞌdxyiꞌhn ayi gachi ba!”
53 ¿Ta mahziru chiꞌh lasahca luꞌh yiꞌh loh guehtu xpaah Abrahn nu? Laꞌh ba guhchi ba neezaa guehtu daada raꞌ nin guñiꞌ xchiꞌdxyi Dxiohs guhchi za raꞌ ba, nee yiꞌh ¿chyu ruhnn luꞌh lligaaba naa luꞌh?
54 Chiꞌchi rahbi Jesuhs loh raꞌ ba: ―Sidela naꞌh rñiꞌzaꞌcaꞌhn pur xcweenta gahcahn, pwihsi ayi xi guilasahca xcweeꞌntahn, per nin rñiꞌzaꞌca xcweeꞌntahn naa Xtaada Dxiohsaꞌhn; laꞌhgahca Ñiꞌh nin nnaa tu naa Xchiohs tu,
