31 Te cuehē ñayuu chi ni cacandíje i ya, te ni cacahān i: ¿A násūu tée yáha cúu Cristo, Yaā ndétu yó jéē quiji? Chi cuehē ndasɨ́ jniñu jéhnu sáha ya jeē steén yā poder yā. Achí i.
32 Te ni cajini tēe fariseo jeē súcuan cácahān ñayuu jnūhun ya. Te máá de jíín sútū cácujéhnu, ni catají de policía cándito templo jeē jnɨ́ɨ de ya.
33 Te ni cahān Jesús: Jecu na quɨvɨ̄ condee rī jiín ró jijnáhan ró. Yūcuán na te nuhun rī nuū Yaā ní tají rúhū vēji ri.
34 Te nanducú ró ruhū, te ma nánihīn rō ruhū. Chi ma cúu jinūcoo ró núū cóndee rī. Achí yá.
35 Yūcuán na te máá tée un ní cacajnūhun jnáhan de: ¿Te ndé nuū quihín tēe yáha jeē ma nánihīn yō de? ¿A quíhīn de nuū jnáhan yó hebreo jeē ní cajitē núu cáyūcu ndé nación Grecia? ¿Te á stéén de jnūhun nuū ñáyuu Grecia, chí naún?
36 ¿Te na jnūhun cúu jeē ni cáhān de jíín yó jeē nanducú yó de te ma nánihīn yō de, chi ma cúu jinūcoo yó núū cóndee de? Achí tée un jíjnáhan de.
37 Te quɨvɨ̄ sándɨ̄hɨ́ vico ún te cúu vico cáhnu ga. Te quɨvɨ̄ un ní ndocuɨñɨ̄ Jesús, te ni cahān jee ya: Núu ndé ñáyuu jnáa ndasɨ́ i tāca jéē váha jeē sáha ri jehē i, nájnūhun jeē jichí i ndute, núu súcuan te na quɨ́vɨ i ndaha ri te coho i ndute, cúu jeē nihín i jeē váha ún.
