64 Apequina mʉsa mehna cjẽna ne yʉhʉre wacũ tutuerare, nidi Jesu. Coã waropʉre Jesu tiquirore wacũ tutueyequinare masidi. Sa yero tiquirore ihña tuhtiyequinare ihñoatiquiro gʉ̃hʉre masi tuhasari. Sa tiquirore wacũ tutueyequinare masino “Apequina mʉsa mehna cjẽna yʉhʉre wacũ tutuerare”, nidi Jesu.
65 Sa ni tuhasa ohõ saha ni nemori: —Ohõ saha ni yahumi mʉsare: “Yʉhʉ Pacʉ masare yʉhʉ pehere cahmegʉ̃ yere. Tiquiro sa yeragʉ̃ masa pehe yeequina iji masiedaboaya”, mʉsare nie timi, nidi Jesu.
66 Tiquiro sa ni buhegʉ̃ tʉhoye peyequina Jesure cahmemediquina tiquirore cohã, tiquiro mehna pari turi wahaerari.
67 Tiquina sa yegʉ̃ ihñano Jesu ʉsãre doce tiquiro buhenare sinituri: —¿Mʉsa gʉ̃hʉ yʉhʉre cohãnatjari? ni sinituri ʉsãre.
68 Tiquiro sa nigʉ̃ Simo Pedro yʉhtiri tiquirore: —Pʉhto, ʉsãre apequiro buheriquiro mariedare. Mʉhʉ ye buheyere tʉhona Cohãcjʉ̃ mehna sa ijiducunatja ʉsã. Mʉhʉ ye buheye dihita tire yahure ʉsãre.
69 Sa yena ʉsã mʉhʉre wacũ tutuaja. Sa yena mʉhʉ quehnoagʉ, Cohãcjʉ̃ macʉ tiquiro ohorigʉ mʉhʉ ijigʉ̃ ʉsã masiaja. Sa yena mʉhʉre cohãsi ʉsã, nidi Simo Pedro Jesure.
70 Tiquiro sa nigʉ̃ tʉhoro Jesu yahuri ʉsãre: —Yʉhʉ pehe mʉsare doce besei. Sa ijiepegʉ̃ta ihcãquiro mʉsa mehna cjʉ̃no watĩno yaquiro ijiatiquiro ijire, nidi ʉsãre tiquiro buhenare.
