6 Te súcuan ni cahān yā jeē jíto ndee yā de núu ndese cahān de. Chi je jíní maá yá ndese sáha ya.
7 Te ni cahān Felipe jiín yá: Te ni ma cánda uū ciento denario staā, ni vēsú jeē cáji i jecu jecu jijnáhan i, áchí de.
8 Yūcuán na te ni cahān Andrés, ñani Simón Pedro, ɨnga tēe scuáha jíín yá un:
9 Yāha íne ɨɨn sūchi yɨ́ɨ́ jéē ndíso i uhūn staā cebada jiín úū chācá. ¿Te ndé canda cuɨtɨ ún, chi ñayuu cuehē ndasɨ́ cúu?
10 Yūcuán na te ni cahān Jesús: Cahān jiín ñáyuu na cúcōo i, áchí yá. Te yūcuan cáa cuehē ite, te ni cacucōo i, te nájnūhun uhūn mil tēe cúu.
11 Te ni quihin Jesús staā ún, te ni nacuatáhú yá nuū Yaā Dios. Te ni jēhe ya nuū tée cáscuáha jíín yá, te máá de ni casaja de nuū ñáyuu ní cacucōo ún. Te suni súcuan ni sáha ya jiín cháca, te ni cayeji i nasaa cácuni maá i.
12 Te nuū ní candutú chíji i, te ni cahān yā jiín tée cáscuáha ún: Nastútú ró tācá pedazo jeē ni ndóo, návāha tu stɨ́vɨ cuɨtɨ yō.
13 Te ni canastútú de, te ni chitú úxī uū jīca pedazo jeē ni ndóo sɨquɨ̄ ndɨhúhún staā cebada un jeē tuá ni ndɨ́hɨ caji ñayuu.
14 Te ñayuu un ní cajito i jniñu jéhnu ni sáha Jesús jeē ni stéén yā poder yā. Te ni cacahān i: Jendaá ndije jeē tée yáha cúu jeē cahán tutu jeē quíji ini ñayɨ̄vɨ jéē nácani jnūhun Yaā Dios. Achí i.
15 Te ni jini Jesús jeē cácuni i sáfuerza i ya jeē cuu ya rey i núú. Te ni cujiyo tucu máá ɨɨn‑ni ya, ni caa ya cuahān yā nuū sucún gá yucu.
16 Te nuū cuácuaa, te tēe cáscuáha jíín yá ni nanuu de cuangoo de nde mar.
17 Te ni ndɨ̄vɨcoo de ini barco, te ni cascáca de jeē quíngoo de nde ɨnga lado mar nde ñuu Capernaum. Te je ni cunee, te ná tu ndee Jesús nuū de.
18 Yūcuán na te ni jequɨ̄hɨ ɨɨn tachī níhin, te sáha jeē ndónda ndute mar un.
