5 Pus antá̱ xmá̱ cha̱tum chixcú, xlá̱ aya xle̱ma̱ xli̱puxamacu̱tzayán ca̱ta̱ la̱ntla̱ xta̱tatlay.
6 Acxni̱ úcxilhli̱ Jesús pi̱ antá̱ xmá̱ yama̱ chixcú, chu̱ cátzi̱lh pi̱ maka̱sa quilhtamacú̱ la̱ntla̱ xlá̱ xpa̱ti̱ma̱, pus huá̱ chuná̱ li̱kalhásquilh: —¿Pi̱ huix na̱ pacsputuna?
7 Yama̱ ta̱tatlá̱ kalhtí̱nalh: —Tla̱ti, luhua cpacsputún hua̱mpi̱ ni̱tí̱ hua̱nti̱ naquimakta̱yay naquimuju̱y c-chúchut acxni̱ tzucuy tanakay. La̱ntla̱ makatunu̱ ctaju̱putún tanuja tuncán hua̱nti̱ quilakataju̱ni̱t.
8 Hua̱mpi̱ Jesús huánilh: —Cata̱qui, casacti̱ mixtícat, chu̱ catlá̱huanti.
9 Puschí̱ acxni tuncán pacsli̱ yuma̱ chixcú, na̱ má̱qui̱lh xtícat, chu̱ tzúculh tla̱huán. Hua̱mpi̱ cumu sábado xuani̱t yama̱ quilhtamacú̱, xli̱huancán pala tí̱ nascuja̱ usu pala tú̱ nacucalé̱n.
10 Huá̱ xpa̱lacata c-tiji̱ makapitzi̱n judíos hua̱nti̱ ucxilhko̱lh pi̱ xcucani̱t cxtícat, chuná̱ huaniko̱lh: —Sa̱mpi̱ yuma̱ quilhtamacú̱ luhua caj li̱jáxat, chú̱ ni̱ mili̱cúcat mixtícat.
11 Hua̱mpi̱ yama̱ chixcú̱ kalhti̱ko̱lh: —Hua̱nti̱ quima̱pácsalh quihuánilh: ‘Casacti̱ mixtícat, chu̱ catlá̱huanti.’
12 Puschí̱ xlacán kalhasquimpalako̱lh: —¿Xatí̱ yama̱ chixcú̱ hua̱nti̱ huanín: ‘Casacti̱ mixtícat, chu̱ catlá̱huanti’?
13 Hua̱mpi̱ hua̱nti̱ xpacsni̱t ni̱ kalhtí̱nalh sa̱mpi̱ ni̱ xcatzi̱y xatí̱, sa̱mpi̱ Jesús xlaksti̱pa̱tanu̱ni̱t anta̱ni̱ luhua lhu̱hua̱ xlaya̱kó̱ chixcuhuí̱n.
14 A̱li̱sta̱lh Jesús ma̱noklhuchá̱ c-tlanca xtemplo̱ Dios, chu̱ chuná̱ huánilh: —Ca̱na̱ huix, luhua tla̱n pi̱ aya pacsni̱ta, hua̱mpi̱ chú̱ nia̱lh catlahua̱ tala̱kalhí̱n xta̱chuná̱ la̱ntla̱ xtlahuaya̱ xapu̱lana̱, laqui̱mpi̱ nia̱lh nachipayá̱n hasta luhua tlak xali̱pe̱cua̱ tajátat.
15 Yama̱ chixcú pi̱ aya xcatzi̱y xatí̱ ya̱ chixcú̱ hua̱nti̱ xma̱pacsani̱t, huata xlá̱ lacapala̱ alh huaniko̱y xanapuxcun judíos pi̱ Jesús xuanicán yama̱ chixcú̱ hua̱nti̱ xma̱pacsani̱t.
16 Puschí̱ yuma̱ xma̱paksi̱nani̱n judíos tzucuko̱lh putzako̱y la̱ntla̱ nata̱la̱tlahuako̱y Jesús caj xpa̱lacata̱ pi̱ xtlahuay catu̱huá̱ ná̱ yuma̱ tascújut acxni̱ quilhtamacu̱ li̱jáxat.
17 Pero pala tí̱ xkalhasquín Jesús xatú̱ xpa̱lacata chuná̱ xtlahuay, na̱má̱ xkalhti̱y: —Dios hua̱nti̱ luhua xli̱ca̱na̱ quintla̱t, ma̱squi catu̱hua̱ quilhtamacú̱ scujma̱ xlá̱ la̱ntla̱ makta̱yako̱y tachixcuhuí̱tit, chu̱ na̱ chuná̱ quit xa̱li̱ankalhí̱n cscujma̱.
18 Huá̱ xpa̱lacata yuma̱ xanapuxcun judíos xli̱makni̱putunko̱y, sa̱mpi̱ ni̱ caj xma̱n pi̱ ni̱ xca̱cni̱naniy yama̱ quilhtamacú̱ acxni̱ jaxcán, hua̱mpi̱ na̱ pacs xa̱ huatiyá̱ xpa̱lacata̱ pi̱ na̱ luhua Dios xli̱tapu̱lhca̱y acxni̱ xuan pi̱ huá̱ luhua xtla̱t.
19 Jesús na̱ chuná̱ huaniko̱lh yama̱ xanapuxcun judíos: “Xli̱ca̱na̱ quit xCam Dios, chu̱ luhua lacatancs cca̱huaniyá̱n pi̱ ni̱ lay pala tú̱ ctlahuay hua̱ntu̱ caj quiacstu quimpa̱lacata, huata caj xma̱n huá̱ ctlahuay hua̱ntu̱ cmakucxilha̱ tlahuay Dios sa̱mpi̱ huá̱ quintla̱t; sa̱mpi̱ xli̱pacs hua̱ntu̱ xlá̱ tlahuay, na̱ hua̱ yumá̱ macxtum cta̱tlahuay.
