49 Pero in tayecanque quilij Jesús ijcuín: ―Notecotzin, niman xionyohui nochan achtopa que noconeu momiquilis.
50 Ijcuacón Jesús quilij ijcuín: ―Niman xiyó ximocuepa mochan porín moconetzin nenquentis huan amo miquis. Huan melau ijcón in tayecanque quiyecneltoquilij ten quilij Jesús. Huan ijcón nimantzin yajqui ichan.
51 Huan cuac ne tayecanque ajsitoyaya ya ichan, ijcuacón hual quisque sequin itaquehualuan huan quinamiquicoj huan quilijque ijcuín: ―Mooquichpil nenquentic ya.
