2 ndxiꞌhw riiꞌ gwah ba gueꞌla hasta guyuuꞌ Jesuhs paaldaa dxyih raꞌ ya rahbi ba loh Ñiꞌh: ―Mwehsu, naann nu Dxiohs guluꞌnehza yiꞌh tin guluuꞌyi luꞌh laꞌh nu, laasii ayi nin tuhbi bwiinn nin guunn milahgru raꞌ nin ruhnn yuꞌbiluꞌh, sidela ayi nabahannee Dxiohs laꞌh ba.
3 Chiꞌchi rahbi Jesuhs loh ba: ―Guchiin nin rñiꞌn loh luꞌh, bwiinn nin ayi gaalaa nacuubi (nin zeꞌ loh deeꞌ naa chechiistoꞌ luꞌh xchiꞌdxyi Dxiohs) ayi nuu gwaꞌha ba loh guelrnabwaꞌ xteenn Dxiohs llaaꞌndxibaaꞌ.
4 Chiꞌchi rahbi Nicodemu loh Ñiꞌh: ―Per, ¿xa gaca gaalaa nacuubi tuhbi ndxiꞌhw nin ba guyuꞌxa? ¿Ta zahca gabiaꞌgarii dxiuuꞌ ba stoꞌ xmaah ba stuhbi tin gaalaa nacuubi ba?
5 Chiꞌchi rahbi Jesuhs: ―Guchiin nin rñiꞌn loh luꞌh, bwiinn nin ayi gaalaa cun ñihsa cun Spíritu Saantu ayi gaca chuꞌtii ba loh guelrnabwaꞌ xteenn Dxiohs.
6 Bwiinn raꞌ nin raalaa raꞌ pur guzahn raꞌ naa raꞌ ba bwiinn guidxyiyuh, per nin raalaa raꞌ pur Spíritu Saantu, cabwaꞌ raꞌ ba pur xcweenta Spíritu.
7 Ayi guzuꞌhyi yihca luꞌh cun lligaaba pur dxyiꞌdxyi raꞌ nin guñiꞌn loh luꞌh: “Garaa tu nahpa gaalaa nacuubi tu stuhbi.”
8 Bwih rzuhun cachiꞌzi nehza rihn luꞌhn, per nin ayi gaann luꞌh canehzan zeꞌen, nee nin ayi za gaann luꞌh canehza guzeeꞌhehn; pwihsi ziꞌchi naa raꞌ bwiinn raꞌ nin rahlaa cun Spíritu Santu.
9 Chiꞌchi rahbi Nicodemu: ―Per, ¿xa gaca dee raꞌ?
10 Chiꞌchi rahbi Jesuhs loh Nicodemu: ―Per ziga yiꞌh, mwehsu dxiꞌh naa luꞌh loh raꞌ bwiinn Israel raꞌ, nee ayi rahcabwaꞌ luꞌh dxyiꞌdxyi raꞌ riiꞌ.
