9 Ajsije pin xalipan, quitaje tixuxli ca ticahuandera huan michin lalalili ipan, huan noje cataya pan.
10 Jesús quinmilic: —Xiquinhualicacan sequin michimes hual anlamic anquinquitzquic.
11 Huan uyac Simón Pedro, quitilanac pa xalipan in xiquipili hué tentataya ca michimes huejué, cataloaya ciento cincuenta y tres (chicomepuhualimajlaclihuanye). Huan mas que cataloaya innojen míac, ma yoje amo cotonic in xiquipili.
12 Cuaquín Jesús quinmilic: —Xihualacan xilacuacan. Huan amaqui ca in monextilinijmes laicanac pa quilajlanis: “¿Aqui tehual?”, pampa momajtiloaya, quimatiloaya pampa yihual Jesús.
13 Huan hualac Jesús, canac in pan huan quinmacac, huan in michin jan yoje quinmacac.
14 Ca in, cataya sejpa huan oc sejpa ca ye lanextilisli hual Jesús monextic yultataya oc sejpa ca imonextilinijmes quiman moquetzac huan quisac capa mictataya ca in mijquimes.
15 Yoje, quiman lamije lacuaje, Jesús quilic Simón Pedro: —Simón, tiꞌixól Juan, ¿tilaicana tichlasojla ca innojen oc sequin quinami nechlasojlalo? Pedro quilic: —Quema, Tata, ticmati nimitznequi. Jesús quilic: —Xiquinmita huan xiquinlacualti noborreguitos.
16 Jesús quilic oc sejpa: —Simón, tiꞌixól Jonás, ¿tichlasojla nehual? Pedro quilic: —Quema, Tata, ticmati nimitznequi. Jesús quilic: —Xiquinlachili huan xiquinlacualti noborregos.
17 Jesús quilic oc sejpa, huan ca in cataya ca ye lajlanilisli, quilic: —Simón, tiꞌixól Jonás, ¿tichnequi nehual? Huan quicocuc Pedro iyolo pampa Jesús quilic ca in ye lajlanilisli: “¿Tichnequi nehual?” Huan quilic: —Tata, ticmati mochi, ticmati nimitznequi. Jesús quilic: —Xiquinlachili huan xiquinlacualti noborreguitos.
18 Neli, nimitzilía inon: Ticatani yancuic, timolalilini molacuejtiloni, timocuejtini tehual huan tinejnemini ca capic catani ticnequini. Huan quiman tiviejojtis, tiquinxilanis momajmajuan huan oc se mitzlalilis molacuejtiloni huan mitzhuicas ca capic amo ticnequis tías.
19 Inon quilic pa quimachiltis Pedro quinami yahuiaya miqui huan pan ipampa imiquilisli quinami yahuiaya quichihuili hué Dios. Huan lamic Jesús quilic inon, cuaquín quilic: —Xichtoca pa tiyes nomonextilini.
