1 Panuje innojen lachihualisli. Cuaquín Jesús monextilic imonextilinijmes oc sejpa, cataya pa in al huejcalan itoca Tiberias. Huan yojque unca quinami quinmonextilic.
2 Cataloaya lanechiculi nepa Simón Pedro huan Tomás hual noje quitocayaltiloaya “Seinomenten”. Noje cataya Natanael hual yulini pin caltilan Cana pin lalticpan Galilea, huan cataloaya ixolomes Zebedeo huan oc sequin omenten imonextilinijmes Jesús.
3 Huan Simón Pedro quinmilic: —Nehual nía niquinquitzquía michin. Yehuanten quilije: —Tehuanten noje tiasi timitztocasi. Quisaje huan calaquije pin barquito huan pa in layúa amo quiquitzquiloaya nindeno.
4 Yahuiaya quisa in tonali, huan nepa xalipan cataya Jesús. Ma yoje in monextilinijmes amo quimatiloaya yihual cataya.
5 Cuaquinon Jesús quinnotzac: —Nitos, ¿amo anquipía michin pa quicuas se? Quinanquilije pampa amo quipialoaya.
6 Huan yihual quinmilic: —Xiclasacan xictzojuican ca ima cuali in barquito huan anquinquitzquis. Cuaquín quitzojuije huan jan axcan etíac ca míac michimes, amo huil quejuaje pa quilalilosquiaya in xiquipili hué pin barquito pampa quinmanaje niman míac michimes.
7 Cuaquinon lajtuc in monextilini hual Jesús quinequiaya, yihual quilic Pedro: —¡Unca in Tata! Quicaquic Simón Pedro pampa cataya in Tata, molaquentic pampa quiquixtic ilaquen pa tequipanus. Cuaquín molasac pa al.
8 In oc sequin monextilinijmes ajsije pa xalipan pin barquito quitilantihualaloaya in xiquipili tentataya ca michimes. Amo cataya huejca in xalipan itenco, jan cien metros san.
