1 Ore sore ɨvɨ Galilea ve, Jesús oyemboyecua iri oreu ɨpa Tiberia ve.
2 Ahese oyeseve Simón Pedro yuvɨrecoi, Tomás ahe acoi icõi vahe, Natanael, ahe aipo tecua Caná pendar ɨvɨ Galilea rese, ñuvɨrío ore Zebedeo rahɨr oroico vahe iyavei ambuae ñuvɨrío Jesús remimbohe.
3 Simón Pedro aipo ehi: —Asora pira mboha —ehi. Ore avei aipo orohe: —Toroso nde rupi —orohe chupe. Orosoño, oroha carite pɨpe. Ahe pɨ̃tu pɨpe rumo ndorombohai eté pira.
4 Cõhe potase rumo, Jesús oyemboyecua ɨmbehɨ ɨvɨi. Ore rumo ndoroicuai eté Jesús secose.
5 Evocoiyase aipo ehi oreu: —Mbɨa chĩhivahe, ¿ndapembohaimi eté pira? —ehi. —Aní eté —orohe chupe.
6 Evocoiyase aipo ehi: —Pemondo pira mbohasa ɨve pe asu cotɨ. Ahese pembohara —ehi. Ẽgüe orohe, ipare voi, “¡Too!” orohe, ndorovɨnose catui eté ɨpɨ sui pira mbohasa oroico. Esepia, savapɨpo tuprɨ ité pira ipɨpe.
7 Evocoiyase che, sembiaɨsu, aipo ahe Pedro upe: —¡Yande Yar niha evocoi! —ahe. Pedro che ñehe rendu ramoseve voi, omonde oturucuar. Esepia, yɨpɨndar nani secoi; opo ɨve oso chupe.
8 Ore evocoiyase orovɨroyepota ité carite ndatɨpɨimisave, oroichoho pira rehɨi imbohasa pɨpe seraso, cien metro tẽi oroico ɨmbehɨ sui.
9 Orovɨnosese ɨvɨ ãtasave, orosepia tãtapɨi harɨve pira, pan reseve.
10 —Peru movɨro evocoi pira penose ramo vahe —ehi oreu.
11 Evocoiyase Simón Pedro oha carite pɨpe, oichoho ndatɨpɨisave pira guasu rehɨi imbohasa pɨpe, ciento cincuenta y tres tuprɨ; yepe setá viña, imbohasa rumo ndosoroi eté.
