1 Ya chin guyaꞌloh raꞌ deeꞌ, chiꞌchi baluuꞌyiloh Jesuhs stuhbi loh raꞌ xpwiinn Ñiꞌh rwaaꞌ laguhn xteenn Tiberias. Squiiꞌ guhcan:
2 Riꞌchi rii raꞌ ba tuhsi juunta; Simohn Pehdru, Tomahs nin laaza Gemelu, Natanael nin naa tuhbi bwiinn Canah xteenn guihdxyi Galilea, nee neezaa raꞌ lliiꞌn Zebedeu cun schiohpa raꞌ xpwiinn Jesuhs.
3 Simohn Pehdru guñiꞌ loh raꞌ ba, rahbi ba: ―Laꞌn cheteꞌhe bwehlda. Chiꞌchi rahbi snuhn raꞌ ba: ―Neezaa laꞌhnu chonee nu yiꞌh. Ya zee raꞌ ba, seguihdu gucah raꞌ ba laꞌn tuhbi laancha; per gueꞌla chi ayi chyu bwehlda guleꞌhe raꞌ ba.
4 Ya chin zeꞌyaꞌñih loh yuh, chiꞌchi baluuꞌyiloh Jesuhs rwaaꞌ laguhn chi, per laꞌh raꞌ xpwiinn Ñiꞌh ayi guhcabwaꞌ raꞌ ba laꞌh Ñiꞌh nin naa Jesuhs.
5 Chiꞌchi gunaabadxyiꞌdxyi Jesuhs loh raꞌ ba, rahbi Ñiꞌh: ―Lliiꞌnraꞌn, ¿ta nin tuhbi bwehlda nagahdxi guinaꞌzu tu? Chiꞌchi rahbi raꞌ xpwiinn Ñiꞌh loh Ñiꞌh: ―Nin tuhbi ma.
6 Chiꞌchi rahbi Jesuhs loh raꞌ ba: ―Gulgalaꞌha xchihxi bwehlda tu lahdu derechu cweꞌ laancha ca, ya zibweꞌhe tu ziahan bwehlda. Ya bwiꞌhnn raꞌ ba ziꞌchi, ya seguihdu hasta nin ayi ruhnn raꞌ ba gahn gabweꞌhecaa raꞌ ba dxihxi bwehlda tantu ziahan bwehlda binaꞌzu laꞌnan.
7 Ya chiꞌchi rahbi xpwiinn Ñiꞌh nin mahzi guhca nadziiꞌhi Jesuhs, rahbi ba loh Pehdru: ―¡Laꞌn biuꞌnbwaꞌ laꞌh Daada Jesuhs niꞌca! Balaaquiꞌhnsi bihn Simohn Pehdru laꞌh Jesuhs niꞌchi, lwehgu guhta ba xahba ba laasii ayi nahcu ba xahba ba hohra chi, ya balaꞌha ba laꞌhgahca ba loh ñihsa tin dxiooba bariaꞌcaa ba rwaaꞌ ñihsa hasta zuu Jesuhs,
8 gaduhbi zieꞌganee spaaldaa raꞌ xpwiinn Ñiꞌh laancha rwaaꞌ ñihsa cun dxihxi bwehlda gadxah bwehlda laꞌnan, ya nin gariaꞌcaaꞌhan rwaaꞌ ñihsa chi guhcan ziga tuhbi gaywaꞌh mehtru.
9 Ya chin bariaꞌh raꞌ ba laꞌn laancha chi rwaaꞌ ñihsa, bwaꞌha raꞌba cayahca tuhbi bwehla riꞌchi cun tuhbi bwehlda dziꞌba loh bwehla chi cun neezaa pahn.
10 Chiꞌchi rahbi Jesuhs loh raꞌ ba: ―Gulchecaꞌha paaldaa bwehlda nin gueꞌdu guleꞌhe tu.
