15 Juan Vitenda rë Xuta ne, cachja me cojo xuta tsëhë me xi Cjua jan, cuitjin cachja me: ―Me vihi xi cachjá tsëhë, xi me xi sehe cuinduva ne, handasa ngahan canduvá titjun ne, peru me vëhë xi hitsë sa venguichji rë me xi cuma ná ngahan, tsëhë xi ha tacun me hya xi catsin ngahan.
16 Tsëhë xi hatuxa jemu quitsë rë xahasen rë me cjuandaja ne, vëhë xi ngayejen ni ne, hacuaha jemu cachjahanntsan cjuandaja.
17 Ley rë Nina ne, nima Moisés casua naja me, peru cjuandaja cojo cjuaquixi ne, Jesucristu casua naja me.
18 Tsajin camahani yo xi cavëë rë Nina. Suvá ni Quihndi ngu rë Nina xi hacuaha nina me hacuaha tacun tangun me cojo Nina Nahmi naja ne, me vëhë casua me camachaya naja yo xi Nina.
19 Cuitjin cachja Juan hya xi catsingatju xutaxa rë tsëhë nandya Jerusalén ngu jo nahmi cojo sacristán xi cjue cjuinenguise rë me Juan cuitjin: ―Ngayun ne, ¿yo ngayun? ―Cuatjin cjuinenguise me.
20 Hane hora xi cuatjin cavinenguise me ne, Juan ne, catsinguixi me, hacuiin cavetsangui me, cuitjin catsinguixi me: ―Hacuiin ngahan Xihin xi Tsingatju Nina. ―Cuatjin cachja me.
21 Ngajan xi cavinenguise nga nahmi xi cuacun jan cuitjin: ―¿Mé ni ni? ¿Há xutachanga naja Elías ngayun? ―Cuatjin cavinenguise me. Ngajan xi Juan ne, cuitjin cafayangui me: ―Hacuiin ngahan. ―Cuatjin cafayangui me. Ngajan xi cavinenguise nga nahmi xi cuacun jan cuitjin: ―¿Há ngayun profeta xi jemu nechanyan rë? ―Cuatjin cavinenguise me. Hane Juan ne, cuitjin cafayangui nga me: ―Jéya. ―Cuatjin cafayangui nga me.
22 Ngajan xi nahmi xi cuacun jan ne, cavinenguise nga me cuitjin: ―¿Yo ngayun ni? Tinújun cojo niji ne, cojo sa xi cuma nicuyin ngu cjua tsëhë me xi catsingatju niji. ¿Mé nújun tsujun suvun? ―Cuatjin cachja me.
23 Ngajan xi Juan ne, cuitjin cafayangui me: ―Ngahan ne, xuta xi jercu hñu chjá nguehe hiscan jemu xín tsëhë nandya, xi catitsinguixi xuta ndiya tsëhë Nai naja, sacuatjin cachja profeta Isaías hatsëë nixtin. ―Cuatjin cafayangui me.
24 Quihndë ne, xuta xi cuacun catsingatju cha partidu fariseo xi cuichja me cojo Juan ne,
25 cuitjin cavinenguise me: ―¿Mé má cuatjin vitendun xuta sa xi hacuiin ngayun xi Tsingatju Nina ngayun, hacuiin ngayun xi profeta Elías ngayun, hacuiin ngayun xi profeta xi jemu nechanyan rë ngayun ni? ―Cuatjin cavinenguise me.
26 Ngajan xi Juan ne, cuitjin cafayangui me: ―Ngahan ne, cojo nandá tiviténda nuju, peru ngajñi nuju secun ngu me xi hyúun yo.
27 Ngahan ne, canduvá titjun, sehe canduva me vëhë, peru hisca tsajin mé cumachjirëhë ngahan xi cuma rë me. ―Cuatjin cafayangui Juan.
28 Xcusun vëhë ne, camá ngajan ngu cahndë́ hiscan xi hmí Betania, ngunda vëhë tsëhë ndajyë Jordán, hiscan tivitenda Juan xuta.
29 Xi camá nchujun jan ne, cavëë Juan xi nduva Jesús hiscan secun me. Hane cuitjin cachja Juan cojo xuta: ―¡Chutsujun ni! Cuajyihi me xi sacuaha chu tsánga xi sua Nina xi tsicjë jyë́ rë xuta.
30 Me vëhë xi cachjá cojo nuju xi me xi sehe cuinduva. Handasa ngahan canduvá titjun ne, peru me vëhë xi hitsë sa venguichji rë me xi cuma ná ngahan, tsëhë xi ha tacun me hya xi catsin ngahan.
31 Ngahan suva ne, hveen yo me. Peru cojo sa xi ngayaan xuta tjë rë Israel cumachaya naja yo me ne, vëhë xi cuitjin tiviténda xuta. ―Cuatjin cachja Juan.
32 Hacuaha cachja Juan cuitjin tsëhë Jesús: ―Ngahan ne, cahvë Hasen rë Nina xi canduvajne tsëhë ngahnga sacuaha ngu paloma, quiji casesun rcu me.
33 Ngahan suva ne, hveen yo me, peru me xi cavitexa ná xi cuiténda xuta cojo nandá ne, cuitjin cachja me cojo ná: “Me xi che xi cuinduvajne Hasen naha cjue sesun rcu ne, me vëhë xi cuitenda me xuta cojo Hasen naha.” Cuatjin cachja Nina cojo ná.
34 Ngahan ne cahvë hacuaha cachjá cojo xuta xi me vëhë xi Quihndi rë Nina me. ―Cuatjin cachja Juan.
35 Xi camá nchujun nga jan ne, secun Juan cojo jo xuta ladu rë me.
36 Hane xi cavëë Juan Jesús xi tivatju me jan ne, cachja me cuitjin: ―¡Chutsujun ni! Cuajyihi me xi sacuaha chu tsánga xi sua Nina. ―Cuatjin cachja me.
37 Xi cahndë jo xuta ladu rë Juan cjua jan ne, quijitjengui me Jesús.
38 Xi cavuya Jesús cavutsejen me xi cjuitjengui xuta jan me ne, sehe cavinenguise Jesús me cuitjin: ―¿Mé meje nuju ngayun? ―Cuatjin cavinenguise me. Ngajan xi xuta jan ne, cuitjin cafayangui me: ―Maestro, ¿jani nechun? ―Cuatjin cavinenguise me.
39 Ngajan xi Jesús ne, cuitjin cachja me cojo jo xuta jan: ―Nduvun chutsujun. ―Cuatjin cachja me. Hane xi quiji vutsejen xuta jan ne, sehe cavëë me hiscan véjña Jesús. Sacuaha chuva rë fane ñuju hora vëhë. Hane caviyuju me ngajan cojo Jesús nixtin hya.
40 Ngu xuta ladu rë Juan xi cahndë sacuatjin cachja me hacuaha quijitjengui rë Jesús ne, hacui Andrés, me xi hntsë Simón Pedru.
41 Me vëhë titjun quiji jaha me hntsë me Simón, hane xi casacu rë me ne, cuitjin cachja me cojo: ―¡Cahyin Mesías! ―Cuatjin cachja me. (Mesías ne, hacui cjua xi meje cuichja: Me xi Tsingatju Nina.)
42 Hya xi camá ne, Andrés ne, quijicojo me Simón xicjin me ngajan hiscan tacun Jesús. Hane xi cafehe me jan ne, cavutsejenya Jesús xcun Simón ne, sehe cachja me cuitjin cojo rë me: ―Ngayun ne, Simón hmí nuju, peru chjuhunñuhu Cefas. ―Cuatjin cachja Jesús. (Ñihi xi Cefas ne, tangun vijne cojo ñihi xi Pedru ta catsijo ni ne, ndyojo, meje cuichja.)
43 Hane xi camá nchujun jan ne, cavejña cacun Jesús xi cjue me ngu nandya tsëhë distritu Galilea. Chaja sa xi cjue me ne, cavechútáha me Felipe, hane cachja me cojo cuitjin: ―Nduvun, cuanguen cojo ná. ―Cuatjin cachja me.
44 Felipe ne, Betsaida nangui rë me, hiscan nangui rë Andrés cojo Pedru.
45 Hya xi camá ne, Felipe ne, quiji jaha me Natanael, hane xi casacu rë me ne, cachja me cuitjin: ―Cahyin ngu xuta Nasaret xi hmí rë Jesús, quihndi rë José. Me vëhë xi catsihindu Moisés cojo jingu sa profeta tsëhë, ngajan xcun xujun rë Nina. ―Cuatjin cachja Felipe cojo Natanael.
