7 Huan in judeahtecos oquinanquilihque: ―Tehhuanten ticpiyahque se tlanahuatili, huan quen ca ipan in totlanahuatil, quipiya tlen miquis, tleca oquihto Iconetzin Dios.
8 Ic oquicac inin, in Pilato ocachi omomouti.
9 Huan ocalac oc sepa ipan in palacio, huan otetlahtlani in Jesús: ―Tel, ¿de canin tehhuatl? Huan in Jesús ahmo tlen omonanquilic.
10 Oncan Pilato oteiluic: ―¿Tlen tel, ahmo tinechnanquiliya? ¿Ahmo ticmati quen nehhuatl nicpiya tequihuahyotl ic nimitzmictis ipan in cruz huan nicpiya tequihuahyotl noyojqui ic nimitzcahcahuas?
11 Huan Jesús oquinanquililoc: ―Ahmo mopiyas niyan tlen tequihuahyotl ica nehhuatl in tlahmo tlen temacalotoc in Dios. Yeh in ica in aquin onechtemacti moixpa ocachi quipiya hueyi tlahtlacoli huan ahmo tehhuatzin.
12 Ihcuac inon in Pilato oquitemohuaya quen quichihuas ic tecahcahuas in Jesús. Huan in tequihuahten den judeahtecos oquitzahtzilihque: ―¡In tla ticahcahuas inon tlacatl, ahmo titlasohcau in hueyixtoc romanohteco! San aquin mochihua hueyixtoc, inon itecocolihcau in hueyixtoc romanohteco.
13 Ic oquicac inin, in Pilato otlatequiuti matequixtican in Jesús. Huan Pilato omotlali canin tlixcomaca huan ica in tlahtoli hebreo yeh canin itoca Gabata, tlen quihtosnequi mach, Tetehtla.
14 Ocatca in tonali achto den pascuahiluitl, cana chicuasin hora sancuel. Oncan in Pilato oquiniluic in judeahtecos: ―¡Nicanca in hueyixtoc den namehhuan!
15 Huan yehhuanten ocoutzahtzihque: ―¡Mamiqui! ¡Mamiqui ipan in cruz! In Pilato oquiniluic: ―¿Tlen tel, cuali nicmictis in hueyixtoc den namehhuan? Huan in achtohque den tiopixcamen oquinanquilihque: ―Tehhuanten ahmo ticpiyahque oc se hueyixtoc, tlahmo san yeh in tequihua romanohteco.
