7 Dxejcti räjp rexpejṉ Israel lo Pila't: ―Nuurnu rajpnu te leii, luxh xcuent leiiga, nanab guetni sa'csi najni najcni Xi'n Dios.
8 Che biejn diajg Pila't rediidxga, bidxejbruni,
9 biusacni neṉ Pretorio, räjpni loj Jesús: ―¿Caro siäädlu? Per xhet räjpdi Jesús lojni.
10 Dxejcti räjp Pila't lojni: ―¿La dilu guinii loä? ¿La dilu gan narä rapä yäḻrnibee te gucuaälu lo crujz, rapäza yäḻrnibee te gusḻaä́lu, ä?
