4 Nadxa bdxuaj Pilato da xula, ne guzre̱' benne' ca': ―¡Le nna'xque! Dxebéaja' benne' nigá chee̱ nézele quebe dxezrelda' bi da zrinnaj nabague̱'.
5 Bdxuaj Jesús zria xíchaje̱' da naca zruze xaga xeche', ne nacue̱' ladxe' bzawe na'. Nadxa Pilato guzre̱' benne' ca': ―Nigá zua bénnea'.
6 Gate benne' xíchaje̱ ca' chee̱ bxruze ca', ne xra'aga we̱n zrin chee̱' ca' belelé'ene̱' Jesús, na' gulezú lawe̱' dxelenné̱' zizraj: ―¡Bde̱'e̱ xaga béguaj! ¡Bde̱'e̱ xaga béguaj! Pilato guzre̱' benne' ca': ―Le che̱'e̱, ne le gudé̱'e̱ xaga béguaj lé'equeze, lawe' da quebe dxezrelda' bi da zrinnaj nabague̱'.
7 Na' benne' judío ca' belexeche̱be̱': ―Netu' nápantu' tu da nadxixruj bea na, ne ca dxenná na dxal-la' gatie̱' lawe' da dxun cuine̱' Zri'ine Dios.
8 Gate ben Pilato da nigá, na' bezrébedxe̱'.
9 Bexu'e̱ xu'u na', na' bche̱be̱' Jesús: ―¿Gazra benne' Lue'? Quebe bi beche̱be Jesús.
10 Nadxa guzre Pilato Le̱': ―¿Quebe dxexeche̱bu' chia'? ¿Quebe nézenu' Lue' napa' neda' xel-la' dxenná bea gudá'a Lue' xaga béguaj, ne napa' xel-la' dxenná bea gusana' Lue'?
11 Beche̱be Jesús: ―Quebe bi xel-la' dxenná bea napu' bi gunu' chia' chela ca be̱nna Dios lue' xel-la' dxenná bea nigá. Chee̱ le̱ na', bénnea' bdee̱' neda' lu na'u dul-la zrendxa nabague̱' ca lue'.
12 Lu zra na'te̱ gudilaj lazre' Pilato ájala gune̱' gusane̱' Jesús, san benne' judío ca' gulenné̱' zizraj: ―Che gusanu' benne' nigá, quebe nacu' César tuze, bénnea' dxenná bea Roma. Nu benne' dxun cuine̱' wenná bea dxedábague̱' César.
13 Nadxa Pilato, gate benne̱' da nigá, bdxixruj bé'ene̱' xelexebéaje̱' Jesús, na' gudxé'e̱ lataj blau chee̱', da zua lataj na' nazí le na Gabata nen dizra' hebreo, da zéaje̱ na chale'aj xiaj ta'a.
14 Naca na zra za zrin Laní Pascua, ca du wagubizra. Nadxa Pilato guzre̱' benne' judío ca': ―Nigá zua wenná bea chee̱le.
15 Na' benne' ca' gulenné̱' zizraj: ―¡Gatie̱'! ¡Gatie̱'! ¡Bde̱'e̱ xaga béguaj! Pilato guzre̱' benne' ca': ―¿Gudá'a wenná bea chee̱le xaga béguaj? Belexeche̱be benne' xíchaje̱ ca' chee̱ bxruze ca': ―Netu' zua tuze wenná bea chee̱ntu'. ¡César!
16 Nadxa Pilato bdee̱' Jesús lu na' benne' ca' chee̱ te̱'e̱ xaga béguaj, na' guleché̱'e̱ Jesús.
17 Na' bdxuaj Jesús nu'e̱ xaga béguaj chee̱ chéaje̱' lataj na' nazí le na Zrita Xichaj Benne' Gate, na' nen dizra' hebreo nazí le na Gólgota.
18 Buludé̱'e̱ Jesús xaga béguaj lataj na', na' tu zren nen Jesús buludé̱'e̱ xechupa benne' xaga béguaj ca' chalá'a weaj naga da' Jesús.
19 Pilato bdxixruj bé'ene̱' buluzúe̱' le̱'e xaga béguaj xichaj Jesús da dxenná na: Jesús, Benne' Nazaret, Wenná Bea Chee̱ Judío Ca'.
20 Zane' benne' judío ca' bululabe̱' da na' lawe' da zua lataj na' naga buludé̱'e̱ Jesús xaga béguaj gáguze naga dxe' xe̱zre na', na' da na' naxúaj na nen dizra' hebreo, ne nen dizra' griego, ne nen dizra' latín.
21 Chee̱ le̱ na' benne' xíchaje̱ ca' chee̱ bxruze chee̱ judío ca' gulé̱'e̱ Pilato: ―Quebe guzúaju' na: Wenná Bea Chee̱ Judío Ca'. Bzuaj na: Le̱' Gunné̱' Naque̱' Wenná Bea Chee̱ Judío Ca'.
22 Beche̱be Pilato: ―Da bzuaja', ba naxúajqueze na.
23 Ca gudé buludá' benne' dxjaque̱' wedil-la Jesús xaga béguaj, na' belexequé̱'e̱ zra lane̱', ne belebeque̱' na tapa cue', tu cue' weaj chee̱ tu tu benne' dxjaque̱' wedil-la. Belecá'aqueze̱' ladxe' dxexrúa cuzre̱' da quebe nadía na. Tu ca nácheze na.
24 Chee̱ le̱ na' benne' dxjaque̱' wedil-la gulé̱ ljwezre̱': ―Quebe chézadxu na. Cwéajdxu da gunna bea na chee̱ la' nu xala le̱ na. Ca'an guca, guca li da naxúaj na lu xiche chee̱ Dios, da dxenná na: Belexelé̱'e̱ zra lana', ne guléaje̱' da gunna bea na chee̱ le̱ na. Caní belún benne' dxjaque̱' wedil-la.
25 Gáguze naga zua xaga béguaj chee̱ Jesús ze̱ xrna Jesús nen bi bila xrne̱'e̱, ne María, zru'ula Cleofas, ne María Magdalena.
26 Gate ble'e Jesús xrne̱'e̱, ne cuita xrne̱'e̱ na' ze̱ Juan, benne' bse̱de Jesús, bénnea' nazri'idxe̱', na' guzre̱' xrne̱'e̱: ―Nú'uladau', na' ze̱ zri'inu'.
27 Nadxa guzre Jesús bénnea': ―Na' ze̱ xrna'u. Zra na'te̱ benne' nigá beche̱'e̱ nu'ula na' lizre̱'.
28 Ca gudé gunná Jesús da nigá, lawe' da nézene̱' xúgute̱ na ba guca li, ne chee̱ guca li ca naxúaj na lu xiche chee̱ Dios, gunné̱': ―Dxebíleda'.
29 Zua na' tu dxe'e nupe zichaj, na' bulusubise̱' tu da dxezrupe na nupe zichaj na', ne buluzúe̱' na lawe' tu xia tunna, na' buluzúe̱' na dxu'a Jesús.
30 Na' Jesús guzrupe̱' nupe zichaj na', na' gunné̱': ―Ba guca li ca naca na. Nadxa bse dxu'a xíchaje̱', gutie̱'.
31 Naca na zra za zrin Laní Pascua, na' judío ca' quebe gulaca lazre̱' xelexegá'ana benne' ca' le̱'e̱ xaga béguaj ca' lu zra dxulupá'ane̱' lawe' da naca zra na' tu zra blau. Chee̱ le̱ na' gulenabe̱' lau Pilato dxixruj bé'ene̱' xelíchaje̱' ni'a benne' ca' zaj de̱'e̱ xaga béguaj ca', ne xelexequé̱'e̱ le̱' le̱'e̱ xaga béguaj ca'.
32 Nadxa tu benne' ca' dxjaque̱' wedil-la gudíchaje̱' ni'a benne' nedxu na', ne cá'anqueze chee̱ benne' xetú de̱'e̱ cuita Jesús.
33 Gate bzrine̱' naga da' Jesús, blé'ene̱' ba gutie̱', na' chee̱ le̱ na' quebe gudíchaje̱' ni'e̱.
34 Tu benne' ca' dxjaque̱' wedil-la guchízie̱' xia chee̱' lachú'u Jesús, na' bdxuaj dxen, ne nisa na'.