2 Glunëꞌ tu breguiꞌ zxuzaꞌ nëꞌi yötsiꞌ bönniꞌ rjaquëꞌ gdil‑l, atiꞌ guludxíëꞌ lei icjëꞌ Jesús, len gulugacuëꞌ Lëꞌ tu lariꞌ tunn xna ca nac le tacuëꞌ bönniꞌ taꞌná bëꞌë.
3 Niꞌr gulabiguëꞌë lahuëꞌ Jesús, len tëꞌ Lëꞌ: ―Bicaꞌ bauꞌ Liꞌ, Bönniꞌ Rna Béꞌinëꞌ Bunách Judío. Niꞌr gulagapëꞌë lau ruꞌë.
4 Niꞌr burujëꞌ leyúbl Pilato, len rëꞌ yuguꞌ bönniꞌ judío uná bëꞌ, rnëꞌ: ―Gul‑yú, ubijaꞌ‑nëꞌ lauliꞌ ni quië gnö́ziliꞌ nitú le nac döꞌ cutu rudzöldaꞌ nuꞌë bönniꞌ ni.
5 Niꞌr brujëꞌ Jesús, dxia icjëꞌ breguiꞌ zxuzaꞌ nëꞌi yötsiꞌ naꞌ len nacuëꞌ lariꞌ tunn xna naꞌ. Pilato rëꞌ lequëꞌ: ―Ni zoëꞌ bönniꞌ ni.
6 Catiꞌ gulaléꞌinëꞌ Jesús yuguꞌ bxuz uná bëꞌ len yuguꞌ bönniꞌ niꞌa naꞌquëꞌ, zidzj gluꞌë didzaꞌ, taꞌnë́ꞌ: ―Bdëꞌë lëꞌi yag cruz. Bdëꞌë lëꞌi yag cruz. Pilato rëꞌ lequëꞌ: ―Lbiꞌiczliꞌ gul‑chë́ꞌë len gul‑tsajdë́ꞌë lëꞌi yag cruz. Nedaꞌ cutu bi döꞌ budzöldaꞌ nuꞌë bönniꞌ ni.
7 Niꞌr bönniꞌ judío naꞌ tëꞌ lëꞌ: ―Dë queëtuꞌ tu zxba, len rna bëꞌ zxba queëtuꞌ naꞌ ral‑laꞌ gatiëꞌ bönniꞌ ni le gnëꞌ naquëꞌ Zxiꞌnëꞌ Dios.
8 Catiꞌ byönnëꞌ didzaꞌ ni Pilato, gudxrnëꞌ.
9 Leyúbl buaziëꞌ yúlahuiꞌ naꞌ, len rëꞌ Jesús: ―¿Gazxtë bönniꞌ Liꞌ? Cutu bi didzaꞌ bubiꞌë Jesús.
10 Niꞌr Pilato rëꞌ Lëꞌ: ―¿Naruꞌ cu ubiꞌitsuꞌ didzaꞌ, quíxjöiꞌnuꞌ nedaꞌ? ¿Naruꞌ cu nöznuꞌ dë lu naꞌa udáꞌa Liꞌ lëꞌi yag cruz, len dë lu naꞌa usanaꞌ Liꞌ?
