14 Na mé ó chjina chonkíxin ntá tí tso̱njín la mé ó tsjasin sín tí kia pascua. Ntá chꞌín Pilato ntáche chꞌán tí sín judío kíxin: ―Ntihi itjen tí chꞌín rey kuèntárá ―ichro chꞌán.
15 Kjánchó jehe sín kꞌóyako sín ntáchro sín kíxin: ―¡Itsꞌen chꞌán! ¡Itsꞌen chꞌán! ¡Tsjakꞌenkáni chꞌán ntacruz! ―ichro sín. Ntá ntáchro chꞌín Pilato kíxin: ―¿Á tjinkáonrá kíxin janhan chrókjuakénka̱nia ijnko ntacruz tí chꞌín rey kuèntárá ní? ―ichro chꞌán. Kjánchó tí sín ncha̱tꞌá tꞌe̱to̱an mé kjuáte̱he sín kíxin: ―Náhí. Chóntahyani í jnko rey, jehó tí chꞌín César ―ichro sín.
16 Ntá chꞌín Pilato kjuanjon chꞌán kjuachaxin sátsjiko sín tí chꞌín Jesús tsja̱kꞌe̱nka̱ni sín chꞌán ntacruz. Ntá sákjuíko sín chꞌán.
17 Ntá sákjuíko sín tí chꞌín Jesús kuámá chꞌán tí ntacruz tsjakꞌenkáni chꞌán. Ntá kjuíjiko sín chꞌán ijnko tjo ti̱ki̱texín sín Hueso Kja Chojni. A̱ ntá nkìva hebreo mé ti̱ki̱texín sín Gólgota.
18 Ntaha mé kjua̱kꞌe̱nka̱ni sín chꞌán tí ntacruz. Ntá kja̱xin yaá sín nánánko kꞌuéjó jnkojnko sín ntá jnko̱siné kjuákꞌe chꞌín Jesús.
19 Ntá kꞌue̱to̱an chꞌín Pilato kíxin tsokjin sín ijnko ntachiso tsja̱kꞌe̱nka̱ni sín ikja tí ntacruz ntáchro kíxin: “Chꞌín Jesús kjui̱xi̱n chꞌán chjasin Nazaret, mé tí chꞌín Rey kuènte tí sín judío”, tsixro.
20 A̱ ntá itsjé tí sín judío mé kjuínchekuáxin sín tí letra tsíkꞌóna kíxin chjino tí chjasin Jerusalén tsíkja̱kꞌe̱nka̱ni sín chꞌín Jesús ntacruz la ko iní nkìva tsíkjin sín, na mé ijnko nkìva la hebreo, la ijnko nkìva la griego, la ijnko nkìva la latín.
21 Ntá tí sín ncha̱tꞌá tꞌe̱to̱an kuènte tí sín judío mé ntáche sín tí chꞌín Pilato kíxin: ―Chrókjinhya jaha xi̱kaha kíxin jehe chꞌán mé tí “Chꞌín Rey kuènte tí sín judío.” Náhí. Íchá jína chrókjian jaha kíxin “Jehe chꞌán ntáchro chꞌán kíxin jehe chꞌán mé tí chꞌín Rey kuènte tí sín judío” ―ichro sín.
22 Kjánchó kjuáte̱he chꞌín Pilato kíxin: ―Tí letra kuéto̱an kꞌóna la ó kꞌóna, kjónté xi̱kahó tsito̱he ―ichro chꞌán.
23 Ntá tí sín soldado tió tsíkjixin tsíkja̱kꞌe̱nka̱ni sín tí chꞌín Jesús tí ntacruz ntá kuákja sín tí ké chꞌán la kꞌóxika̱ye̱he sín jnkojnko ka kuákja sín kanoé sín. La ko kja̱xin kuákja sín tí ka kjínjin kꞌuékꞌinkáya chꞌán. Tí ka mé tsíxro̱nhya ka la me jnkoko̱á ka tíha.
24 Ntá tí sín soldado kjo sín kíchó sín ntáchro sín kíxin: ―Tsótséchjehyani tí ké chꞌán. Íchá jína sichꞌexínni suerte ntá tsotsjeheni siná nkexro tsꞌáyéhe̱ tí ka. Mé xi̱kaha xiteyá éxí ntáchro xroon itén Dios tsíkjin sín ósé ntáchro kíxin: “Kjuíchꞌexín sín suerte ntá kꞌóxika̱ye̱he sín kaná.” Mé xi̱kaha kjuíchꞌe tí sín soldado.
