San Juan 12:21-36 in Woun Meu

²¹ Makhʉʉnau Felipe aig bëewia irigta, —Kakë, marau Jesús dʉ̈i iyʉ̈ʉ am khõsi nʉmgui aichëjierram. Mag Felipeegta jëeuchëtarran amachjö judionaan khabam ee bãautarr aawai ajim, amach kõit Jesuug iekhamkhĩir. Chi Felipe phöbördam Betsaida anʉm eem ajim.

²² Magbaawai Felipeeu jũrr agjö maar khapeer ãb Andrés anʉmʉg jaauwia amach numiim khʉʉnau jũrr ich Jesús aarcha jawaan wëtjim.

²³ Mag wëtwia judionaan khabam khʉʉnau ich jʉr wënʉrrʉm a jaaubaicheewai amjã peerdʉ awaag ʉdʉraa ich thõopiju jaaubaadëmua magjim: —Ya ĩsta chadcha mʉch chi Emkhooi Iewaa chikhamnau thõoju gayaa pamamgui ajim, mag amau mʉ thõobarmua mʉchta Ẽwandamau thumaam khʉʉn khãaijã ʉ̈rpai apieg.

²⁴ ¿Pãrau ooba aajẽ ajim, nemjĩir dau ĩiu awaagjã jãga aajẽ? Jẽb ee jĩirbam chan maan ich mag sĩsim, bʉ̈ʉrjã ĩiuba. Magarrau jĩir sĩuwia öbër sĩsiewain chadau chëbaadëmua ich jĩirtarr khãaijã ʉ̈r aaujem. Ich agjöta mʉjã meeju aai chirabahab ajim, mag mʉch meebarm gaaimua õor pöm peerdʉ awaag.

²⁵ Ich agjö khaphʉ abat ajim: Ar mʉig eegar aawai mʉ gaaimua bʉ̈ʉrjã ich chig apimapha sim chan meewaijã ʉ̈gthar öbërbam. Pari mʉ gaaimuata ich dau aphʉʉ ajujã khĩirjuba mʉ iek ʉ̈kha nʉrrʉmʉn chadau meewiajã ʉ̈gtharchata öbërwia mʉg atagjã ich mag iiu sĩerrajugui ajim.

²⁶ Maimua ĩchab chi chadcha mʉ chogkhanaa mʉ dʉ̈i nʉrram khõsi simʉn, ichdëu khõchagpierr nem wauba, mʉchdëu nem waupim khõsimpaita wau nʉrraju aai sim. Mag amʉn magan am wënʉrrʉmpierr mʉchjã am dʉ̈i chitajugui ajim. Ãbmua magta mʉ chogkha nem wau nʉrrʉmʉn, mʉ Ayaujã ich khĩircha i thö iekhajugui ajim.

²⁷ Maimua mag jaaumamua ĩchab, ’Ĩs chadcha thumaa khĩirjuwia mʉ ökhĩirjug pöoma chirʉmgui ajim, chikhamnau mʉch thõoju dakkha pamaawai. Mag chirab mamʉ am jua ee thõmaaugaujã mua mʉch Ayag, “Tata, mʉ peerdʉ athájã” abamgui ajim, warrjã mag atheeta mʉ bëetarr aawai.

²⁸ Maimua sĩi ich Ayag, —Tata, muan mʉch gaaimuata sĩi thumaam khʉʉnaujã pʉrʉgta ãba ee apim khõsi chirʉmgui ajim. Pari irua magbaawai ʉ̈gtharmuata woun iekjö, —Ya pʉ gaaimua õrau mʉrʉg ee abarm; pari ichiita warag mʉchig ee apijugui ajim.

²⁹ Pari edjã eemua Ẽwandamauta woun iekjö irig magbarm ũrbaawai aig õor narr khʉʉnau sĩi pagthʉmpii naajim. Maagwai ãaur khʉʉnau jũrr, —Ẽwandam chogauta ʉ̈gtharmua irig iekha sim khabahab aajeejim.

³⁰ Pari amau mag nʉm ee, ich Jesuu thumaam khʉʉnag iekhamamua magjim: —Mʉg pãrau woun iekjö ũrbarm chan sĩi mʉchigpai ich iek ũrmkhĩir khabamgui ajim. Jãan jãg ich iek ũrpitarr gaaimua ichdëu mʉ iek ʉ̈kha sim pãrag khap amkhĩirta pãrag jãg iekhajimgui ajim.

³¹ Ya ĩsta chikhamnau mʉ thõoju gayaa pamam. Mag mʉ isegwi mʉ thõobarm gaaimuata khaigbam khʉʉn thumaam khʉʉn dʉ̈i Ẽwandamau ichdëu khap ajugui ajim. Mag õor kõit mʉ thõobarm gaaimuata ĩchab mepeer mʉg durr gaai ichta chi pörkha sĩerrʉmjã Ẽwandamau pödpʉ̈im iek pödpʉ̈ijugui ajim.

³² Pari ĩchab mag ʉ̈gthaa õor khapanag dakhĩir mʉ jiirjop sĩuwia thõobarmuata mʉch iek ʉ̈khamam khʉʉnan mua thumaa mʉchig paa aumajugui ajim.

³³ Jesuu mag iekhamarran mag dau aphʉʉ pakuls gaai ich thõju jaau sim ajim.

³⁴ Mamʉ irua mag iekhabarm ũrwia õrau irig, —Ẽwandam iek phã sim gaaimua marau khaphʉ nʉmgui ajierram, ich Ẽwandamaucha pʉ̈ibarm chan meeba ich mag sĩerraju a sim. Pari mag simta, pʉ iek mag pʉʉta ich Emkhooi Iewaa anʉmta, ¿jãga mag Emkhooi Iewaata ʉ̈gthaa pakuls gaai thõbarju? Magan, ¿ma khanim Emkhooi Iewaa agá? ajierram irig.

³⁵ Magbaawai Jesuu amag ejemplo jaaumamua warag ichta Emkhooi Iewaa ich Ẽwandamau pʉ̈itarr khap amkhĩir magjim: —Ĩsweran pãrau agtha õtdau paa dʉnʉmjö mʉ oo wai nʉmgui ajim. Pari nau jöpcha ya tag pãar khĩir mʉ chitabaju. Magua agtha mʉ iek ũr nʉwe ʉ̈khabat ajim, khĩirjug khaigbamta pãach gaai ʉ̈rpam ugua. ¿Pãrau ooba aajẽ khĩchag ee wëtum khʉʉn? Amau amach wënʉrrʉmjã khaugba aajem. Chi mʉ iek ʉ̈khaba nʉm khʉʉnjã ich agjöta thʉnʉmgui ajim, amach okhoo nʉmjã khaugba.

³⁶ Magnaa ichdëupai ich igwia, Mag õtdaujö sim agtha pãach ee wai nʉwe ʉ̈khabat ajim, ich mag mʉ dʉ̈i ararag ee wënʉrraag. Mag iekha sĩewia õor eemua igbaadeeu i sĩeimamjã tag õrau khaugba, ãba maach appaita i dʉ̈i naaimajim.

²¹ Mak'ʌʌnau Felipe haig bëewia hirigta, —Kakë, marau Jesús dʌ̈i hiyʌ̈ʌ ham k'õsi nʌmgui haichëjierram. Mag Felipeegta jëeuchëtarran hamachjö judionaan k'abam hee bãautarr haawai hajim, hamach kõit Jesuug hiek'amk'ĩir. Chi Felipe p'öbördam Betsaida hanʌm heem hajim.

²² Magbaawai Felipeeu jũrr hagjö maar k'apeer hãb Andrés hanʌmʌg jaauwia hamach numiim k'ʌʌnau jũrr hich Jesús haarcha jawaan wëtjim.

²³ Mag wëtwia judionaan k'abam k'ʌʌnau hich jʌr wënʌrrʌm ha jaaubaicheewai hamjã peerdʌ hawaag hʌdʌraa hich t'õopiju jaaubaadëmua magjim: —Ya hĩsta chadcha mʌch chi Hemk'ooi Hiewaa chik'amnau t'õoju gayaa pamamgui hajim, mag hamau mʌ t'õobarmua mʌchta Hẽwandamau t'umaam k'ʌʌn k'ãaijã hʌ̃rpai hapieg.

²⁴ ¿Pãrau hooba haajẽ hajim, nemjĩir dau hĩiu hawaagjã jãga haajẽ? Jẽb hee jĩirbam chan maan hich mag sĩsim, bʌ̃ʌrjã hĩiuba. Magarrau jĩir sĩuwia höbër sĩsiewain chadau chëbaadëmua hich jĩirtarr k'ãaijã hʌ̃r haaujem. Hich hagjöta mʌjã meeju haai chirabahab hajim, mag mʌch meebarm gaaimua hõor pöm peerdʌ hawaag.

²⁵ Hich hagjö k'ap'ʌ habat hajim: Har mʌig heegar haawai mʌ gaaimua bʌ̃ʌrjã hich chig hapimap'a sim chan meewaijã hʌ̃gt'ar höbërbam. Pari mʌ gaaimuata hich dau hap'ʌʌ hajujã k'ĩirjuba mʌ hiek hʌ̈k'a nʌrrʌmʌn chadau meewiajã hʌ̃gt'archata höbërwia mʌg hatagjã hich mag hiiu sĩerrajugui hajim.

²⁶ Maimua hĩchab chi chadcha mʌ chogk'anaa mʌ dʌ̈i nʌrram k'õsi simʌn, hichdëu k'õchagpierr nem wauba, mʌchdëu nem waupim k'õsimpaita wau nʌrraju haai sim. Mag hamʌn magan ham wënʌrrʌmpierr mʌchjã ham dʌ̈i chitajugui hajim. Hãbmua magta mʌ chogk'a nem wau nʌrrʌmʌn, mʌ Hayaujã hich k'ĩircha hi t'ö hiek'ajugui hajim.

²⁷ Maimua mag jaaumamua hĩchab, ’Hĩs chadcha t'umaa k'ĩirjuwia mʌ hök'ĩirjug pöoma chirʌmgui hajim, chik'amnau mʌch t'õoju dakk'a pamaawai. Mag chirab mamʌ ham jua hee t'õmaaugaujã mua mʌch Hayag, “Tata, mʌ peerdʌ hat'ájã” habamgui hajim, warrjã mag hat'eeta mʌ bëetarr haawai.

²⁸ Maimua sĩi hich Hayag, —Tata, muan mʌch gaaimuata sĩi t'umaam k'ʌʌnaujã pʌrʌgta hãba hee hapim k'õsi chirʌmgui hajim. Pari hirua magbaawai hʌ̃gt'armuata woun hiekjö, —Ya pʌ gaaimua hõrau mʌrʌg hee habarm; pari hichiita warag mʌchig hee hapijugui hajim.

²⁹ Pari hedjã heemua Hẽwandamauta woun hiekjö hirig magbarm hũrbaawai haig hõor narr k'ʌʌnau sĩi pagt'ʌmpii naajim. Maagwai hãaur k'ʌʌnau jũrr, —Hẽwandam chogauta hʌ̃gt'armua hirig hiek'a sim k'abahab haajeejim.

³⁰ Pari hamau mag nʌm hee, hich Jesuu t'umaam k'ʌʌnag hiek'amamua magjim: —Mʌg pãrau woun hiekjö hũrbarm chan sĩi mʌchigpai hich hiek hũrmk'ĩir k'abamgui hajim. Jãan jãg hich hiek hũrpitarr gaaimua hichdëu mʌ hiek hʌ̈k'a sim pãrag k'ap hamk'ĩirta pãrag jãg hiek'ajimgui hajim.

³¹ Ya hĩsta chik'amnau mʌ t'õoju gayaa pamam. Mag mʌ hisegwi mʌ t'õobarm gaaimuata k'aigbam k'ʌʌn t'umaam k'ʌʌn dʌ̈i Hẽwandamau hichdëu k'ap hajugui hajim. Mag hõor kõit mʌ t'õobarm gaaimuata hĩchab mepeer mʌg durr gaai hichta chi pörk'a sĩerrʌmjã Hẽwandamau pödpʌ̈im hiek pödpʌ̈ijugui hajim.

³² Pari hĩchab mag hʌ̃gt'aa hõor k'apanag dak'ĩir mʌ jiirjop sĩuwia t'õobarmuata mʌch hiek hʌ̈k'amam k'ʌʌnan mua t'umaa mʌchig paa haumajugui hajim.

³³ Jesuu mag hiek'amarran mag dau hap'ʌʌ pakuls gaai hich t'õju jaau sim hajim.

³⁴ Mamʌ hirua mag hiek'abarm hũrwia hõrau hirig, —Hẽwandam hiek p'ã sim gaaimua marau k'ap'ʌ nʌmgui hajierram, hich Hẽwandamaucha pʌ̈ibarm chan meeba hich mag sĩerraju ha sim. Pari mag simta, pʌ hiek mag pʌʌta hich Hemk'ooi Hiewaa hanʌmta, ¿jãga mag Hemk'ooi Hiewaata hʌ̃gt'aa pakuls gaai t'õbarju? Magan, ¿ma k'anim Hemk'ooi Hiewaa hagá? hajierram hirig.

³⁵ Magbaawai Jesuu hamag ejemplo jaaumamua warag hichta Hemk'ooi Hiewaa hich Hẽwandamau pʌ̈itarr k'ap hamk'ĩir magjim: —Hĩsweran pãrau hagt'a hõtdau paa dʌnʌmjö mʌ hoo wai nʌmgui hajim. Pari nau jöpcha ya tag pãar k'ĩir mʌ chitabaju. Magua hagt'a mʌ hiek hũr nʌwe hʌ̈k'abat hajim, k'ĩirjug k'aigbamta pãach gaai hʌ̃rpam hugua. ¿Pãrau hooba haajẽ k'ĩchag hee wëtum k'ʌʌn? Hamau hamach wënʌrrʌmjã k'augba haajem. Chi mʌ hiek hʌ̈k'aba nʌm k'ʌʌnjã hich hagjöta t'ʌnʌmgui hajim, hamach hok'oo nʌmjã k'augba.

³⁶ Magnaa hichdëupai hich higwia, Mag hõtdaujö sim hagt'a pãach hee wai nʌwe hʌ̈k'abat hajim, hich mag mʌ dʌ̈i hararag hee wënʌrraag. Mag hiek'a sĩewia hõor heemua higbaadeeu hi sĩeimamjã tag hõrau k'augba, hãba maach happaita hi dʌ̈i naaimajim.