2 Te xíáⁿ nǐ cadúha‑yu sá nǐ cudìni Jesús. Te tá Mǎrta ní sani‑xi cóhó, te té Lǎzarú yɨ́hɨ́‑dě mèsá ndɨhɨ Jèsús, ndɨhɨ dava‑gá‑güedé xéxí‑güedě.
3 Te tá Màriá néhé‑xí cuǎdava lǐtrú acìtí sàháⁿ tnámí sǎ ǐo ndèyáhu, te acìtí‑áⁿ nǐ cuáha mee‑ni yǔcú nǎrdú, te ní sódó‑xi sáhá Jèsús, te ní nadayìchí‑xi ndɨhɨ idi dɨ́quɨ́‑xi sáhá‑gǎ. Te nɨhìí xɨtɨ́ vehe ní xíté nuu dicó acìtí‑áⁿ.
4 Te té Jùdás déhe té Xǐmú Iscàrioté dɨu‑ni ɨɨⁿ tée xìca cuu ndɨhɨ‑gá, tée cuáha cuèndá ñáhá xìi‑gá núú cuè tée cùu úhú iní ñáhá nǐ xáhaⁿ‑dě xii‑gá:
5 —¿Ná cuèndá ñá ní cùyáhu acìtí‑a sá ùní cièndú díhúⁿ denàriú cuu cuèndá ñáyiu ndàhú? —càchí‑dé xǎhaⁿ‑dě xii‑gá.
6 Dico sá dúcáⁿ nǐ cáháⁿ té Jùdás chi ñá dɨ́ú sǎ ndísá ñùhu iní‑dé ñáyiu ndàhú chi dìcó‑ni ɨɨⁿ ñádúhú cúú‑dě, chi dɨu‑dé néhé cuèndá‑dé díhúⁿ‑güedě nchaa‑güedé te ní xóo duhu ñàha‑dé xii‑güedé.
7 Te ní xáhaⁿ Jèsús: —Daña, vá dásàtú‑n ìní xíchí‑a na tàxúha nahi‑xi àcití‑a, chi nàndɨ́hɨ ndéé òré ná nguɨ̌ndǔxi‑í.
8 Chi nchòhó chi cuhuⁿ tnahá‑ni ñáyiu ndàhú tnuú‑ndó, dico yúhú chi vá ncháá ndùu cundecu ndɨhɨ ñaha‑í xii‑ndo —càchí‑gá xáhaⁿ‑gǎ xii‑dé.
9 Te vài ñáyiu isràél ní níhǐ‑yu tnúhu sá ndécú Jèsús ñuú Bètaniá. Te ní sáháⁿ‑yu cuèndá quiní‑yu‑gá, te quiní‑yu tnàhá té Lǎzarú tée ní dándótó‑gǎ.
10 Te cue dútú cúnùu ní ndatnúhu‑güedé ní cuu ɨɨⁿnuu‑güedě cuèndá sá cáhní‑güedě tnàhá té Lǎzarú ní cùu,
11 chi dɨu cuèndá tée‑áⁿ nǐ cuu cuéhé ñǎyiu isràél tá dàña nihnú‑yu‑güedé cuáháⁿ cuèndá sá nǐ sándáá iní‑yu Jèsús.
12 Te nduu tněé‑áⁿ vài ñáyiu ní quexìo ñuú Jerusàlén cuèndá cundecú‑yu vico, te ní níhǐ‑yu tnúhu sá Jèsús sáá‑gá tnàhá‑gá cundecu‑gá vico‑áⁿ,
13 núu ní xehndé‑yu ndaha yùtnu ñúú, te nèhé‑yu ní sáháⁿ ní sátnahá ñáhǎ‑yu xii‑gá. Te níhi ní cáháⁿ‑yu, te càchí‑yu: —¡Ío càhnu cuu Yá Ndiǒxí! Te ducaⁿ‑ni ǐo càhnu cuu Yaá ní tendaha‑gǎ véxi quɨndaha ñàha xii‑o —duha ní cachí‑yu.
14 Te Jèsús ní níhí‑gǎ ɨɨⁿ bǔrru, te yòdo‑gá‑dɨ cuáháⁿ. Te ducaⁿ nǐ cuu chi ní quee ndáá‑xi nàcuáa càháⁿ‑xi núú tùtú Yǎ Ndiǒxí núú càchí‑xi:
15 Vá yùhú nchòhó cue ñáyiu ndècu ñuú Sìón, chi iha véxi tée yɨ̀ndaha ñaha xii‑ndo yodo‑dé ɨɨⁿ bǔrru. Duha càchí‑xi núú tùtú‑gá.
16 Dico cue tée xìca cuu ndɨhɨ Jesús ñá ní ndàcu iní‑güedé nàcuáa càháⁿ‑xi núú tùtú Yǎ Ndiǒxí nàcuáa cada Jèsús. Dico sátá cuǎndaa‑gá andɨu càda cahnu ñaha Tátá‑gǎ xii‑gá, te ní ndacu iní‑güedé sá dúcáⁿ yòdo tnuní nàcuáa cada‑gá, te ducaⁿ nǐ cuu.
17 Nchaa ñáyiu ní xíndecu ndɨhɨ Jèsús òré ní dándótó‑gǎ té Lǎzarú, ya yàcáⁿ ní caní‑yu cuèndú núú ñǎyiu nàcuáa ní quide ñaha‑gǎ xii‑dé.
18 Te vàí‑yu ní sáháⁿ‑yu núú ndécú Jèsús cuèndá sá nǐ níhǐ‑yu tnúhu ní quide‑gá sá vǎ yǒo tnàhí ndàcu cada.
19 Te cue tée cùu fariséú ní xítnàha‑güedé: —Ní xito‑ndo nǎ ñá túú nàndɨhɨ sá quídé‑ó‑vá, chi nchaa ñáyiu ní chinchícúⁿ ñáhǎ‑yu xii‑dé —càchí‑güedé xǐtnàha‑güedé.
20 Te tnàhá ñáyiu ñá túú cùu ñáyiu isràél ní sáháⁿ‑yu vico ñuú Jerusàlén ní quide càhnú‑yu Yá Ndiǒxí.
21 Te ñáyiu‑áⁿ nǐ sáháⁿ‑yu núú tě Lìpé tée ñuú Bètsaidá, te ñuú‑áⁿ yɨ́ndèhu‑xi distritú Galìleá. Te ní xáhǎⁿ‑yu xii‑dé: —Tǎtá, vá cúndèe iní‑n càchí tnúhu‑n nǔu ndèé ndécú Jèsús, chi cuìní‑ndɨ́ cáháⁿ ndɨhɨ‑ndɨ́‑gá —càchí‑yu xǎhǎⁿ‑yu xii‑dé.
22 Te té Lìpé ní naníhí‑dě té Ndrǐxí te ní xáhaⁿ‑dě nàcuáa càháⁿ‑yu, te ndɨ ndùú‑güedé ní sáháⁿ‑güedé ní xáhaⁿ‑güedě xii Jèsús nàcuáa càháⁿ‑yu.
23 Te ní xáhaⁿ Jèsús xii‑güedé: —Vitna ní cuyatni òré cada càhnu ñaha Tátà‑í xii‑í, te quiní‑yu sá ǐo càhnu cuu yúhú Tée cùu ñaní tnáhǎ‑yu nchaá‑yu.
24 Te na càchí tnúhu ndáá‑í xii‑ndo sǎ nǔu ɨɨⁿ tatá vá ngává‑xí nǔú ñúhú těhyú‑xi ña, te dɨu‑ni ducaⁿ cùnduu‑xi cundecu‑xi. Dico ɨɨⁿ tatá ná ngává nǔú ñúhú xǐnu déhe‑xi, te xíǎⁿ nádàcayá tnáhá‑xí, te mee‑xi tèhyú‑xi.
25 Te nchaa ñáyiu ío ñùhu iní‑xi cundecu ñuyíú‑a ñá túú ñùhu iní‑yu Yá Ndiǒxí, te ñáyiu‑áⁿ cuǐta nihnú‑yu. Te nchaa ñáyiu ío ñùhu iní ñáhá xìi Yá Ndiǒxí, ñáyiu‑áⁿ cundecú‑yu ndɨhɨ‑gá nɨ caa nɨ quɨ́hɨ́ⁿ.
26 Te nchaa ñáyiu cuìní cunu cuechi nǔù‑í xìni ñuhu‑xi natuha ñahá‑yu xii‑í, te nduu táhǔ‑yu cundecú‑yu núú nùhú‑í cundecu‑í. Te nchaa ñáyiu na cùnu cuechi núù‑í, te cada càhnu ñaha Tátà‑í xií‑yu —càchí‑gá xáhaⁿ‑gǎ xii‑güedé.
27 Te ní xáhaⁿ tùcu‑gá: —Ío ndɨ̀hú iní‑í. Te cúñaha‑ǐ xii Tǎtà‑í taunihnu ñaha‑gǎ nǔu dìcó sá cúú, dico vá cúú chi cuèndá tnàhí‑a véxi‑í —càchí‑gá xáhaⁿ‑gǎ xii‑güedé.
28 Te ní xáhaⁿ‑gǎ xii Tǎtá‑gǎ Dútú Ndiǒxí: —Táu, cada nàcuáa ní sani iní‑n cùnduu cuendá sá ná cádá càhnu ñaha ñáyiu xii‑n —càchí‑gá xáhaⁿ‑gǎ. Te ducaⁿ te ní tecú ní cáháⁿ Yǎ Ndiǒxí ndéé andɨu, te càchí‑gá: —Sa ní quide‑í nàcuáa cachí ñáyiu sá ǐo càhnu cuu‑í. Te cada tucu‑í cuèndá cada càhnu ñaha‑gá‑yu xii‑í —càchí Yǎ Ndiǒxí xáhaⁿ‑gǎ xii Déhe‑gá.
29 Te nchaa ñáyiu xǐndecu ní tecú dóho‑yu ní cáháⁿ‑gá, dico ñá túú ní sàni iní‑yu sá méé‑gǎ ní cáháⁿ, chi davá‑yu ní xítnàhá‑yu sá ñǔhu ní cáháⁿ, te davá‑yu ní xítnàhá‑yu sá ɨ̀ɨⁿ espíritú xínú cuèchi núú Yǎ Ndiǒxí ní cáháⁿ.
30 Te ní xáhaⁿ Jèsús xií‑yu: —Ñá dɨ́ú cuèndá yúhú ní cǎháⁿ Yǎ Ndiǒxí, chi ní cáháⁿ‑gá cuèndá sá nchòhó cundedóho‑ndo.
31 Te vitna ní sáá nduu càda ndáá Yǎ Ndiǒxí cuéchi nchaa ñáyiu ñuyíú‑a, te ducaⁿ te vá cúnùu‑gá yucu ñǎvǎha.
32 Te na càta caa ñaha‑güedé xii‑í núú cùrúxí, te xíáⁿ cuú‑í te níhǐ‑yu tnúhu nɨ càa xico ñuyíú, te quɨndáá iní‑yu tnúhu‑í —càchí‑gá xáhaⁿ‑gǎ xií‑yu.
33 Duha ní cáháⁿ‑gá cuèndá cutnùní iní‑yu nàcuáa ndoho‑gá òré cuú‑gá.
34 Te ní xáhǎⁿ‑yu xii‑gá: —Nìhí‑ndɨ́ tnúhu sá nǔú tùtú yódó tnùní tnúhu Yá Ndiǒxí càháⁿ‑xi sá Crìstú Yaá tendaha‑gǎ quixi ñuyíú‑a cundecu‑gá nɨ caa nɨ quɨ́hɨ́ⁿ. ¿Te yòhó nása càháⁿ‑tu‑n sǎ ɨ̀ɨⁿ tée cùu ñaní tnáhá nchàa ñáyiu ñuyíú‑a cahni ñaha‑güedě núú cùrúxí? Te cachí tnúhu‑n nǎ cúú těe‑áⁿ —càchí‑yu xǎhǎⁿ‑yu xii‑gá.
35 Te ní xáhaⁿ Jèsús: —Yúhú cúù‑í dàtná ɨɨⁿ ñuhú dáyèhé ñuyíú‑a, dico sacú‑ni nduu ndècu ndɨhɨ ñaha‑í xii‑ndo. Te caca‑ndo ìchi ndáá vitna dàyehé‑gá‑í núú‑ndó chi na cùnee te vá cútnùní‑gá núú‑ndó ndèé ichi quɨ́hɨ́ⁿ‑ndó.
36 Quɨndáá iní ñáhá‑ndó xìi‑í vitna ndècu ndɨhɨ ñaha‑gá‑í xii‑ndo dàndixi túu‑í iní‑ndó, cuèndá cutnùní iní‑ndó nàcuáa ndùu cuendá Yǎ Ndiǒxí, te cuu‑ndo děhe‑í —càchí‑gá xáhaⁿ‑gǎ xií‑yu. Te sátá dúcáⁿ nǐ cáháⁿ Jèsús, te ní quee‑gá cuáháⁿ‑gá ɨɨⁿ núú vǎ ná nìhí ñáhǎ‑yu xii‑gá.
37 Te cuěi ío vài sá vǎ yǒo tnàhí ndàcu cada ní quide Jèsús ní xiní‑yu, dico ni dùcaⁿ ñá túú ní sàndáá iní‑yu‑gá.
38 Te ducaⁿ nǐ quidé‑yu chi dacuɨtɨ́í nǐ quee ndáá‑xi nàcuáa ní chídó tnùní ndíi Chàiá ndíi ní cáháⁿ tnúhu Yá Ndiǒxí ndéé sanaha nǔú tùtú‑gá núú càchí‑xi: Yòhó Yaá cúú Xǐtohó‑í, vá yǒo ɨɨⁿ sàndáá iní tnúhu càháⁿ‑ndɨ́. Te vá yǒo ɨɨⁿ cùtnuní iní‑xi sá ǐo càhnu cuu‑n. Duha ní chídó tnùní ndíi Chàiá núú tùtú‑gá.
39 Te ñá ní sàndáá iní‑yu chi ní quee ndáá‑xi nàcuáa ní chídó tnùní tucu ndíi Chàiá núú tùtú Yǎ Ndiǒxí nàcuáa cáháⁿ Jèsús:
