San Juan 11:6-49 in Ozumacín Chinantec

⁶ Läꜙ maˊ gaꜙnuuꜘ Jesús kihꜗ hi̱ˉ maˊ dsaahˊ heꜘ, gaꜙjä̱yꜘ gaˊ to̱ˈ jmɨɨˋ jeeˊ maˊ gyayˈ ja̱ˉ.

⁷ Maˉngëëꜘ heˉ ja̱ˉ, ja̱ˉgaˊ gaꜙjäyhꜘ sɨɨyhꜙ jnäähˈ discípulo: —Maˋ jneˊ kaˉlähꜘ taꜙ hwaꜗ Judea.

⁸ Mahꜗ gaꜙchiihˊ jnäähꜗ: —Taˉjwohꜗ, hnøøꜗ dsaˉka̱a̱hˊ heꜘ maˊ teˈ ku̱u̱ˊ kyahˈ, mahꜗ jwahꜘ gaˊ hneˉ gohˈ kaˉlähꜘ jeeˊ ooꜙ.

⁹ Mahꜗ gaꜙjähꜘ Jesús sɨɨyhꜙ jnäähˈ: —¿Ja̱ˈ gyaꜙto̱ꜘ hor˜ kye̱ˉ ko̱o̱ˉ jmɨɨˊ? Hi̱hꜗ hi̱ˉ gaꜙnääˊ taꜙlaꜙ jmɨɨˈ, saꜙ të̱yhꜗ. Jëëhꜘ, jëëy˜ waˊjeˉ kihꜗ jmɨˉgyʉʉꜙ laˉ.

¹⁰ Pero hi̱ˉ gaꜙnääˊ taꜙlaꜙ hwëˈ, dsaˉtë̱yhꜗ. Jëëhꜘ, moꜙsoꜙ jnäꜘ waˊjeˉ kihꜗ jmɨˉgyʉʉꜙ laˉ.

¹¹ Maˉngëëꜘ maˉjäyhꜘ läꜙja̱ˉ, ja̱ˉgaˊ gaꜙjäyhꜘ kaˉlähꜘ: —Maˉgwɨ̱ɨ̱ˉ Lázaro omeꜚ jnänˋ, nɨɨnˋ mahꜗ naˊcha̱a̱ꜙ jnihꜘ.

¹² Heˉja̱ˉ gaꜙjähˊ jnäähꜗ: —Dsaˉjø̱ø̱hˈ kya̱a̱nꜙ, cherˊmahꜗ naˉgwɨ̱ɨ̱yˉ, jä̱ꜗ kiyhꜗ.

¹³ Heˉ laˉ maˊ jähꜘ Jesús, kihꜗ heˉ maˉnaˉju̱u̱yˊ baˊ ja̱ˉ. Pero maˊ liiꜘ jnäähˈ, naˉgwɨ̱ɨ̱yˉ heˉ te̱e̱yhˉ dsëyꜗ baˊ ja̱ˉ, heˉ maˊ hlëëhꜙ Jesús läꜙja̱ˉ.

¹⁴ Ja̱ˉgaˊ gaꜙjähꜘ Jesús jë̱ë̱ˉ goˉte˜: —Maˉnaˉju̱u̱ˊ baˊ Lázaro.

¹⁵ Jë̱ë̱ˉ baˊ dsënꜙ heˉ saꜙ gaˊ maˉgyanˊ jeeˊ ooꜙ, jëëhꜘ läꜙja̱ˉ laꜗ lluꜗ kyahꜗ hnähꜘ mahꜗ läꜙja̱ˉ läꜙdsooꜘ hohꜘ hnähꜘ. Maˋ jneˊ maꜙjë̱ë̱ˊ jnihꜘ.

¹⁶ Ja̱ˉgaˊ gaꜙjähꜘ Tamá, hi̱ˉ maˊ tëëyh˜ Dsaˉsu̱u̱ˋ, gaꜙsɨɨyhꜙ jnäähˈ: —Maˋ jneˊ kaˉlähꜘ, mahꜗ ju̱u̱ꜘ jneˊ ko̱ˉjø̱hꜘ kya̱a̱yhˊ.

¹⁷ Maˊ hyaˉ kye̱ꜘ jmɨɨˊ naˉha̱a̱ˈ Lázaro maˊ gaꜙllooꜗ Jesús jeeˊ ja̱ˉ.

¹⁸ Jeeˊ jwɨɨˉ Betania ja̱ˉ, maˊ jä̱ꜙ jä̱hꜙ kihꜗ Jerusalén, ko̱o̱ˉ hnëˉ kilómetro baˊ.

¹⁹ Jwë̱ë̱ꜘ dsaˉ judiu naˊnääˈ naˊjë̱ë̱yˉ Marta kya̱a̱hˊ María, naˊkwayˉ beꜘ kiyhꜗ mahꜗ saꜙ waˊ meehˉ dsëyꜗ heˉ gaꜙju̱u̱ꜗ Lázaro ø̱ø̱yhꜚ.

²⁰ Maˊ gaꜙnuuꜘ Marta jaꜗ Jesús, yaꜙhë̱ë̱yꜗ mahꜗ ngooyꜗ gaꜙmiꜙje̱e̱yꜚ. Pero gaꜙjä̱ꜘ baˊ María chaˊnehꜙ.

²¹ Maˊ gaꜙje̱e̱ˈ Marta Jesús mahꜗ gaꜙsɨɨyhꜙ: —Dsaˉjø̱ø̱hˈ kya̱a̱nꜙ, waˊraˉ jähꜘ kihꜗ maˊ ñehꜘ jeeˊ laˉ, saꜙ maˉju̱u̱ꜙ dsaˉñʉʉhˉ ø̱ø̱hnꜗ.

²² Jnäꜘ manꜙ, gaꜙläꜙjëꜙ heˉ ngɨɨhˊ kihˈ Dio, kwayꜗ baˊ —gaꜙjähꜘ Marta.

²³ —Läꜙji̱i̱hˊ baˊ ø̱ø̱hˈ —gaꜙjähꜘ Jesús sɨɨyhꜙ.

²⁴ —Jnäꜘ manꜙ läꜙji̱i̱yhˊ waˊraˉ gaꜙtëꜘ jeeˊ läꜙji̱i̱hˊ dsaˉ jeeˊ lla̱a̱ꜙ jmɨɨˊ —gaꜙjähꜘ Marta sɨɨyhꜙ.

²⁵ Mahꜗ gaꜙjähꜘ Jesús sɨɨyhꜙ: —Jnäꜘ heꜘ hi̱ˉ miˉji̱i̱hˋ dsaˉ, hiꜙ jmeenꜙ cha̱a̱yˉ. Hi̱ˉ jmeeꜙ dsooꜘ dsëꜗ kinꜙ, maꜙkeꜙ gaꜙju̱u̱yꜗ, läꜙji̱i̱yhˊ kaˉlähꜘ.

²⁶ Gaꜙläꜙjë̱ë̱ꜙ hi̱ˉ cha̱a̱ˉ mahꜗ jmeeyꜗ dsooꜘ dsëyꜗ kinꜙ, maꜙkeꜙ gaꜙju̱u̱yꜗ, saꜙ jä̱yꜗ läꜙja̱ˉ. ¿Cheˊ he̱e̱hꜘ juuˈ laˉ? —gaꜙjähꜘ Jesús sɨɨyhꜙ.

²⁷ —Ja̱a̱hˉ, Dsaˉjø̱ø̱hˈ kya̱a̱nꜙ, he̱e̱ꜘ baˊ jnäꜘ, hneˉ heꜘ Cristo, Jo̱o̱ꜘ Dio hi̱ˉ hiiꜘ juuˈ kihꜗ jäꜙ jmɨˉgyʉʉꜙ laˉ —gaꜙjähꜘ Marta.

²⁸ Maˉngëëꜘ maˉjäyhꜘ läꜙja̱ˉ, ñeeyˊ naˊteeyhˉ María ø̱ø̱yhꜚ mahꜗ naˊhlë̱ë̱yhˊ kya̱a̱hˊ juuˈ hiiˉ mahꜗ saꜙ nuuˉ dsaˉ kiyhꜗ, gaꜙsɨɨyhꜙ: —Hi̱i̱ꜚ taˉjwohꜗ maˊ ja˜, tëëyh˜ hneˉ.

²⁹ Maˊ gaꜙnuuꜘ María läꜙja̱ˉ, läꜙcha̱hꜘ ja̱ˉ gaꜙnooyˉ ngooyꜗ gaꜙmiꜙje̱e̱yꜚ Jesús.

³⁰ Saꜙ gaˊ maˉhe˜ Jesús taꜙ jeeˊ jwɨɨˉ mähˉ ja̱ˉ. Läꜙ maˉcheyhꜗ ja̱ˉbaˊ jeeˊ gaꜙje̱e̱yˈ Marta.

³¹ Maˊ tä̱ä̱hˊ dsaˉ judiu chaˊnehꜙ kihꜗ María maˊ kwayꜙ beꜘ. Maˊ gaꜙjëëyꜗ gaꜙnooˉ María mahꜗ ngooyꜗ koˉchihˊ, heˉja̱ˉ gaꜙnääꜗ dsaˉ heꜘ kaahˋ kiyhˈ, maˊ jäyhꜘ: —Ngooyꜗ taꜙ jeeˊ laˈ toˉhø̱ø̱ˉ mahꜗ gaꜙhooyhˋ jeeˊ ooꜙ.

³² Maˊ gaꜙllooꜗ María jeeˊ maˊ chehˈ Jesús, gaꜙju̱u̱yhꜗ jnëyˊ chaˊnëyˊ mahꜗ gaꜙsɨɨyhꜙ: —Dsaˉjø̱ø̱hˈ kya̱a̱nꜙ, waˊraˉ jähꜘ kihꜗ maˊ ñehꜘ jeeˊ laˉ, saꜙ maˊ ju̱u̱ꜘ dsaˉñʉʉhˉ ø̱ø̱hnꜗ.

³³ Maˊ gaꜙjëëꜗ Jesús hooyh˜, hiꜙ gaꜙjëëyꜗ hooh˜ dsaˉka̱a̱hˊ kya̱a̱yˈ hi̱ˉ maˊ jmeeꜙ ko̱ˉjø̱hꜘ kya̱a̱yhˊ, heˉja̱ˉ gaꜙläꜙmeehꜙ dsëyꜗ jwërte, läꜙji̱i̱hˈ gaꜙji̱i̱ꜗ nehꜙ tuhˉdsëyꜗ.

³⁴ Mahꜗ gaꜙsɨɨyhꜙ: —¿Haˉ gaꜙkya̱a̱hꜙ hnihꜘ? Mahꜗ gaꜙjäyhꜘ: —Dsaˉjø̱ø̱hˈ kya̱a̱nꜙ, ñaˉ mahꜗ goˊjëëhˋ.

³⁵ Peerꜙ gaꜙhoohꜗ Jesús.

³⁶ Mahꜗ gaꜙjähꜘ dsaˉ judiu heꜘ: —Jëëˋ daˊ, heˉ baˊ cheˉ maˊ hnääyˈ.

³⁷ Mahꜗ gaꜙjähꜘ ko̱ˉlla̱a̱ˊ dsaˉ heꜘ: —Dsaˉ naˉ, gaꜙjmeeyꜘ gaꜙläꜙjnäꜘ mɨˈnëˊ ja̱a̱ˉ dsaˉtʉʉˊ. ¿Cheˊ saꜙ leꜘ maˊ jmeeyˈ mahꜗ saꜙ maˊ ju̱u̱ꜘ dsaˉ ooꜙ?

³⁸ Ko̱o̱ˉ kaˉlähꜘ gaꜙläꜙmeehꜙ dsëꜗ Jesús, mahꜗ ngooyꜗ chu̱hꜙ jeeˊ laˈ toˉhø̱ø̱ˉ. Hehꜗ toˉhø̱ø̱ˉ ja̱ˉ, maˊ naˉjnëˉ kya̱a̱hˊ ko̱o̱ˉ mɨˈku̱u̱ˊ.

³⁹ Mahꜗ gaꜙjähꜘ Jesús: —Jñuuhˊ hnähꜘ ku̱u̱ˊ naˉ. Mahꜗ gaꜙjähꜘ Marta dsaˉmëꜘ ø̱ø̱hꜚ hlɨɨꜘ heꜘ sɨɨyhꜙ Jesús: —Dsaˉjø̱ø̱hˈ kya̱a̱nꜙ, maˉhë̱ë̱yˉ miˉju̱u̱ˉ, jëëhꜘ maˉhyaˉ kye̱ꜘ jmɨɨˊ naˉju̱u̱yˊ.

⁴⁰ Mahꜗ gaꜙjähꜘ Jesús sɨɨyhꜙ: —¿Ja̱ˈ maˉjwë̱ë̱hnꜗ hneˉ, cherˊmahꜗ gaꜙjmeehˊ dsooꜘ hohꜘ, jëëhˈ heˉ jʉhˉga̱a̱ˉ heˉ jmeeꜗ Dio?

⁴¹ Ja̱ˉgaˊ gaꜙjñuuyhˉ mɨˈku̱u̱ˊ heˉ maˊ naˉjnëˉ hooˊ toˉhø̱ø̱ˉ ja̱ˉ, jeeˊ maˊ hä̱ä̱ˊ hlɨɨꜘ heꜘ. Ja̱ˉgaˊ gaꜙjëëꜗ Jesús taꜙ gyʉʉhˈ, gaꜙjäyhꜘ: —Tääˋ kya̱a̱nꜙ, kwanꜙ tiˊhmaahˊ kyahˈ, jëëhꜘ maˉnʉʉhˉ baˊ kinꜙ.

⁴² Maꜙ baˊ jnäꜘ, nuuhˉ baˊ hneˉ kinꜙ tä̱ä̱ꜘ. Heˉ jwahnꜙ läꜙlaˉ, laꜗ lluꜗ kihꜗ hi̱ˉ tä̱ä̱hˊ nuuˉ läꜙkuˊ läꜙji̱i̱ꜗ kinꜙ jeeˊ laˉ, mahꜗ läꜙja̱ˉ läꜙdsooꜘ dsëyꜗ, hneˉ baˊ gaꜙche̱e̱hꜙ jnäꜘ.

⁴³ Maˉlaꜙ maˉjäyhꜘ läꜙja̱ˉ, gaꜙhlëëyhꜘ ko̱o̱ˉ ki̱ˉga̱a̱ˉ: —¡Lázaro, goˉhë̱ë̱ˈ jeeˊ naˉ!

⁴⁴ Heˉja̱ˉ yaꜙhë̱ë̱ꜗ hi̱ˉ maˊ naˉju̱u̱ˊ heꜘ läꜙ maˉnaˉgyo̱hꜘ ja̱ˉ gooˉ tɨɨyˊ, kya̱a̱hˊ hmɨɨhˉ heˉ gaꜙgya̱a̱hˉ dsihꜘ maˊ gaꜙju̱u̱yꜗ, hiꜙ läꜙ maˉnaˉløøˉ ja̱ˉ moˉnëyˊ kya̱a̱hˊ hmɨɨhˉ saˊluuˉ. Mahꜗ gaꜙjähꜘ Jesús: —Je̱e̱yˋ saˊhmɨɨhˉ, mahꜗ waˊ ngëyꜘ.

⁴⁵ Jwë̱ë̱ꜘ dsaˉ judiu hi̱ˉ naˊnääˈ kya̱a̱hˊ María gaꜙläꜙdsooꜘ dsëyꜗ kihꜗ Jesús, maˊ gaꜙjëëyꜗ heˉ gaꜙjmeeyꜘ läꜙja̱ˉ.

⁴⁶ Pero ko̱ˉlla̱a̱ˊ dsaˉ heꜘ naˊnääyˈ naˊjë̱ë̱yˉ dsaˉ fariseo naˊjmeeyhˊ juuˈ haˉ läꜙ gaꜙjmeeꜘ Jesús.

⁴⁷ Heˉja̱ˉ jmiˉdsaˉ ka̱a̱hˊ kya̱a̱hˊ dsaˉ fariseo gaꜙku̱yhꜗ läꜙjë̱ë̱ꜙ dsaˉtaˊ dsaˉgyʉʉhˊ kya̱a̱yˈ, maˊ jäyhꜘ: —¿Haˉ läꜙ jmeenˊ? Peerꜙ chaˉmiihˉ heˉ jʉhˉga̱a̱ˉ jmeeꜙ dsaˉñʉʉhˉ heꜘ.

⁴⁸ Cherˊmahꜗ gaꜙkwanˊ jwëˈ jä̱ꜗ läꜙnaˉ baˊ, läꜙjë̱ë̱ꜙ baˊ dsaˉ läꜙhe̱e̱ꜘ kiyhꜗ. Heˉja̱ˉ yaˉnääꜘ dsaˉ roma yaˉhe̱e̱yˉ jeeˊ jwɨɨˉ jnänˋ hiꜙ läꜙka̱a̱ˉ hwaꜗ jnänˋ kaˉlähꜘ.

⁴⁹ Caifá, ja̱a̱ˉ dsaˉkya̱a̱hˊ dsaˉ judiu heꜘ, maˊ la̱a̱ˈ dsaˉjø̱ø̱hˈ kya̱a̱ꜗ läꜙjë̱ë̱ꜙ jmiˉdsaˉ ji̱ˉñeˉ ja̱ˉ. Gaꜙjäyhꜘ: —Niꜙ miihˉ saꜙ ñehˊ hnähꜘ.