SAN JUAN 11:5-16 in Tzotzil

⁵ Ti Jesuse manchuc mi c'ux ti yo'nton ti Martae xchi'uc ti smuque xchi'uc ti Lázaroe, ti c'alal laj ya'i ti tsacbil ti chamel ti Lázaroe, chib to c'ac'al te nihalejtutic te ti bu ono'ox oyuntutique.

⁷ Patil ti Jesuse hech lic yalbuntutic ho'ontutic ti yajchanc'opuntutique: ―Sutucutic batel ti Judea yan vuelta ―xiyutuntutic.

⁸ Ho'ontutic ti yajchanc'opuntutique hech lic calbetutic: ―Maestro, ja'to no'ox c'an yac'bot ton ti jchi'iltique. ¿Mi te chabat yan vuelta? ―xcututic.

⁹ Ti Jesuse laj yac'bun jna'tutic ti c'u x'elan yabtel ti Diose. Hech laj yalbuntutic: ―P'isbil lajcheb ora jujun c'ac'al ti yac'oj ti Diose. Ti much'u chanav ti c'ac'altic mu sp'osi yacan yu'un oy to ti squeval ti c'ac'ale.

¹⁰ Ja'uc mi i'ic'ub ti osile, ja' laj sta yorail ti tsp'osi yacan yu'un itup' xa ti squeval ti c'ac'ale ―xiyutuntutic. Hech laj yac'bun jna'tutic ti ja'to mi laj sta yorail yu'un ti Diose ti chmilate, ja'to xu' yu'un ti jchi'iltaque.

¹¹ Patil hech laj yalbuntutic uc: ―Ivay xa ti quermanotique, ja' ti Lázaroe. Ho'oni chba jtij liquel yu'un vayal xa ―xiyutuntutic.

¹² Hech lic calbetutic, ho'ontutic ti yajchanc'opuntutique: ―Cajval, mi vayale, ja' sna'oj chlic stuc ―xichitutic.

¹³ Hech laj yal ti Jesuse yu'un icham xa ti Lázaroe. Ho'ontutic ti yajchanc'opuntutique laj jcuytutic ti chcux no'ox yo'nton yu'un ti vayale.

¹⁴ Hech yu'un ti Jesuse hech jamal laj yalbuntutic: ―Icham xa ti Lázaroe.

¹⁵ Nichim no'ox co'nton yu'un mu teucutic. Yu'un ja' sventailuc ti mu teucutique yu'un hech chach'unic. Batic che'e, ba jq'ueltic ―xiyutuntutic ti Jesuse.

¹⁶ Hech yu'un ti jun jchi'iltutic ti abtele ja' ti Tomas sbie, ja' ti vats xcututique, hech lic yalbuntutic: ―Batic, co'ol ac'o chamucutic xchi'uc ―xiyutuntutic.

⁵ Li Jesuse, acꞌo mi cꞌux ta yoꞌon li Martae, schiꞌuc li smuque, schiꞌuc li Lázaroe, cꞌalal iyaꞌi ti ip li Lázaroe, chib to cꞌacꞌal te lijocꞌtsajcutic li yoꞌ bu oyuncutic onoꞌoxe.

⁷ Tsꞌacal to jech laj yalbuncutic li Jesuse, joꞌoncutic li yajchanbalajeltacuncutique: ―Sutcutic batel nojtoc li ta Judeae ―xijyutcutic.

⁸ Jech laj calbecutic: ―Jchanubtasvanej, achꞌ to te chac smilicot ta ton li jchiꞌiltactique. ¿Mi chacꞌan chachaꞌsut batel tey? ―xcutcutic.

⁹ Itacꞌav li Jesuse: ―Li Diose lajchaeb ora yacꞌoj li ta jujun cꞌacꞌale yoꞌ jech xuꞌ chijꞌabtej. Jaꞌ noꞌox jechun eꞌuc li joꞌone, yora to xuꞌ chiꞌabtej. Jech chac cꞌu chaꞌal li buchꞌu ta xanav ta cꞌacꞌaltique mu spꞌosi yoc yuꞌun sac to li osile.

¹⁰ Yan mi iꞌicꞌub xa li osile, ta spꞌosi yoc yuꞌun mu xa xil sbe. Jech li joꞌone, jaꞌ to mi icꞌot scꞌacꞌalil yuꞌun Dios ti chimilee, jaꞌ to xuꞌ chismilic li jchiꞌiltactique ―xijyutcutic.

¹¹ Jech laj yal nojtoc li Jesuse: ―Li Lázaro ti lec jcꞌopon jbatic jchiꞌuctique vayal xa, pero chba jtij acꞌo julavuc ―xijyutcutic.

¹² Jech laj calbecutic, joꞌoncutic li yajchanbalajeltacuncutique: ―Cajval, mi iꞌoch xa svayele, jaꞌ svinajeb ti ta smeltsaje ―xcutcutic.

¹³ Ti jech laj yal li Jesuse yuꞌun chamem xa li Lázaroe. Joꞌoncutic li yajchanbalajeltacuncutique la jnopcutic ti yuꞌun noꞌox ta xvaye.

¹⁴ Li Jesuse jamal laj yalbuncutic ti chamem xa li Lázaroe. Jech laj yal nojtoc:

¹⁵ ―Ximuybaj noꞌox ti muc bu te oyun li cꞌalal ichame yoꞌ jech chachꞌunic o ti joꞌon Avajcoltavanejicune. Batic, ba jqꞌueltic ―xijyutcutic li Jesuse.

¹⁶ Li jun jchiꞌilcutic ta yajchanbalajeltac li Jesuse, jaꞌ li Tomase, jaꞌ li vach xcutcutique, jech laj yalbuncutic: ―Batic, coꞌol acꞌo chamcutic jchiꞌuctic li Cajchanubtasvanejtique ―xijyutcutic.

⁵ Manchuc mi ti Jesús cꞌux ta xaꞌi ti Martae, ti Maríae, ti Lázaroe,

⁶ pero cꞌalal iꞌalbat ti ip ta xaꞌi ti Lázaroe, tey to icom chib cꞌacꞌal ti bu onoꞌox oye.

⁷ Tsꞌacal to un, jech laj yalbe ti yajchancꞌoptaque: ―Batic yan velta ta Judea ―xi ti Jesuse.

⁸ Ti yajchancꞌoptaque jech laj staqꞌuic: ―Jchanubtasvanej, ti jꞌisraeletic teye achꞌ to noꞌox ti jutuc mu laj smilot ta tone. Avi tana un, ¿mi ta xacꞌan ta xabat avaꞌi yan velta? ―xutic ti Jesuse.

⁹ Ti Jesuse jech laj yal: ―¿Mi mu yichꞌojuc lajcheb ora ti jun cꞌacꞌale? Ti mi ta xijxanav ta cꞌacꞌaltique, mu jbosi cacantic. Yuꞌun sac jaman ti banomile.

¹⁰ Yan ti mi ta xijxanav ta acꞌobaltique, ta jbosi cacantic. Yuꞌun chꞌabal sac jaman ti banomile ―xi ti Jesuse.

¹¹ Tsꞌacal to un, ti Jesuse jech laj yalbe ti yajchancꞌoptaque: ―Vay xa ti Lázaro ti lec jcꞌopon jbatic schiꞌuque. Pero ta xbat jtij liquel ―xi ti Jesuse.

¹² Ti yajchancꞌoptaque jech laj staqꞌuic: ―Cajval, ti mi ta xvaye, jaꞌ svinajeb ti ta xa xlecube ―xiic.

¹³ Ti vaꞌi sꞌelan ta xal ti Jesuse, jaꞌ ta xal ti cham ti Lázaroe. Yan ti yajchancꞌoptaque laj snopic ti ta xal ti batsꞌi vayel noꞌoxe.

¹⁴ Jech o xal un, ti Jesuse jamal laj yalbe ti yajchancꞌoptaque: ―Cham xa ti Lázaroe.

¹⁵ Ximuyubaj xa ti muꞌyuc tey oyune. Más lec ti jech icꞌot ta pasele ta sventa ti voꞌoxuque yoꞌ jech ta xachꞌunicun. Pero batic, ba jqꞌueltic ―xi ti Jesuse.

¹⁶ Ti Tomase, ti jaꞌ sbiinoj ti vache, jech laj yalbe ti yan jchancꞌopetique: ―Batic ec yoꞌ jmoj tey chba chamcutic schiꞌuc ti Jesuse ―xi.

⁵ Li Jesuse, ac'o me lec sc'anoj li Martae, xchi'uc li smuque, xchi'uc li Lázaroe, c'alal laj ya'i ti ip cha'i li Lázaroe, chib to c'ac'al tey lijoc'tsajcutic yo' bu ono'ox oyuncutique.

⁷ Ts'acal to jech laj yalbuncutic Jesús, vu'uncutic li yajchanc'opuncutique: ―Sutcutic batel yan velta ta Judea ―xiyutuncutic.

⁸ Jech laj calbecutic: ―Jchanubtasvanej, ach' to tey c'an smilot ta ton li jchi'iltactique. ¿Me tey chac'an chabat yan velta? ―xcutcutic.

⁹ Itac'ov li Jesuse: ―Li Diose lajchab ora yac'oj li jujun c'ac'ale yu'un jech xu' chij'abtej. Ja' no'ox jechun ec li vu'une, yorail to chi'abtej. Jech chac c'u cha'al li boch'o ta xanov ta c'ac'altique mu'yuc ta sbosi yacan yu'un sac to li osile.

¹⁰ Yan me ic' xae, ja' xa yorail ta sbosi yacan yu'un mu xa xil sbe. Jech li vu'une, ja' to me la sta sc'ac'alil yu'un Dios ti chimilate, ja' to xu' yu'unic li jchi'iltactique ―xiyutuncutic.

¹¹ Jech laj yal noxtoc li Jesuse: ―Li Lázaro ti lec chquil jbatic jchi'uctique vayem xa. Pero ta xbat jtij liquel ―xiyutuncutic.

¹² Jech laj calbecutic, vu'uncutic li yajchanc'opuncutique: ―Cajval, me i'och xa svayele, yu'un xa ta x'utsib ―xcutcutic.

¹³ Ti jech laj yal li Jesuse yu'un chamen o li Lázaroe. Vu'uncutic li yajchanc'opuncutique la jnopcutic ti naca no'ox ta xvaye.

¹⁴ Li Jesuse jamal laj yalbuncutic, jech laj yal: ―Chamen o li Lázaroe.

¹⁵ Pero xcuxet no'ox co'nton ti mu'yuc tey oyun c'alal ichame yu'un jech ac'o ach'unic o ti vu'un Jcoltavanejun avu'unique. Batic, bat jq'ueltic ―xiyutuncutic.

¹⁶ Li jun jchi'ilcutic ta abtele, ja' li Tomás sbie, ja' ti loin xcutcutique, jech laj yalbuncutic: ―Batic, co'ol ac'o chamcutic jchi'uctic li jchanubtasvanej cu'untique ―xiyutuncutic.

⁵ Ti Jesuse, acꞌu mi lec scꞌopon sbaic xchiꞌuc ti Martae, xchiꞌuc ti smuque, xchiꞌuc ti Lázaroe, cꞌalal iyaꞌi ti ipe, muc xba sqꞌuel ta ora. Chib to cꞌacꞌal tey ipaj ta jech ucꞌum Jordán.

⁷ Tsꞌacal to ―Suticotic ta Judea ―xiyutoticotic voꞌoticotic ti yajchancꞌopoticotique.

⁸ ―Jchanubtasvanej, achꞌ to me ti yoꞌonicuc smilot ta ton li jchiꞌiltactique. ¿Cꞌu yuꞌun ti chachaꞌsut echꞌel noxtoc teyoꞌe? ―xcuticotic.

⁹ ―Ti Rioxe lajcheb ora yacꞌoj li jujun cꞌacꞌale yuꞌun chiꞌabtejotic. Jaꞌ noꞌox yechon uc, yora to chiꞌabtej. Ti muchꞌutic jaꞌ tspasic cꞌusi tscꞌan ti Rioxe mu xiꞌic. Coꞌolic xchiꞌuc ti muchꞌutic chanavic ta cꞌacꞌaltique, mu cꞌusi spꞌosi o yoquic, xil sbeic.

¹⁰ Yan ti muchꞌutic mu xichꞌic ta mucꞌ ti Rioxe, coꞌolic xchiꞌuc ti muchꞌutic chanavic ta acꞌubaltique, tspꞌosi yoquic, mu xil sbeic ―xiyutoticotic.

¹¹ Tsꞌacal to liyalboticotic noxtoc: ―Lec jcꞌopon jbatic jchiꞌuctic ti Lázaroe, pero ivay xa. Chba jtij ―xiyutoticotic.

¹² ―Cajval, mi iꞌoch xa svayele, yuꞌun nan yo jsetꞌ xa. Ch-echꞌ xa li chamele ―xcuticotic.

¹³ Ti xꞌelan iyal ti Jesuse, yuꞌun icham ti Lázaroe. Li voꞌoticotique ijchꞌunticotic ti vayem noꞌoxe.

¹⁴ Ti Jesuse jamal liyalboticotic ti ichame.

¹⁵ ―Lec ti mu teyicon cꞌalal ilocꞌ xchꞌulele yoꞌ xachꞌunic o ti stacojon tal ti Rioxe. Ba jqꞌueltic ―xiyutoticotic.

¹⁶ Tey jun jchiꞌilticotic ta yajchancꞌop ti Jesuse, jaꞌ ti Tomase, ti “vach”, xcuticotique. ―Batic, coꞌol chamicotic xchiꞌuc li Cajchanubtasvanejtique ―xiyutoticotic.