San Juan 11:4-48 in Silacayoapan Mixtec

⁴ Ta tá na̱ñe̱he̱ Jesús tu̱hun yóho já na̱cachi a já: —A̱ ju̱ú cue̱he̱ cahní ñahá cúú toho ña̱ yóho. Joo xi̱hín cue̱he̱ yóho cuu na̱ha̱ ndá quia̱hva cáhnu cúú Ndióxi̱. Ta xi̱hín ña̱ yóho na̱ha̱ nu̱ú ña̱yivi ndá quia̱hva cáhnu cúú ye̱he̱, da̱ cúú in túhún ji̱ni̱ já ja̱hyi Ndióxi̱ —na̱cachi a.

⁵ Ta ndaja coo quíhvi̱ ndiva̱ha ini Jesús Marta xi̱hín qui̱hvi̱ ñá ta quia̱hva já quíhvi̱ ri ini a Lázaro viti.

⁶ Joo tá na̱ñe̱he̱ Jesús tu̱hun ña̱ quíhvi̱ Lázaro já na̱cando̱o a i̱vi̱ qui̱vi̱ chága̱ mé nu̱ú na̱sahi̱in a̱ cán.

⁷ Ta tá na̱ndihi já na̱cachi Jesús já xi̱hín na̱ xíca tuun xi̱hi̱n á: —Xíhín ndo̱ ná co̱ho̱ tucú chí Judea —na̱cachi a.

⁸ A̱nda̱ já na̱cachi na̱ cán já xi̱hi̱n á: —Maestro, viti chá va ndúcú ña̱yivi ndúu cán cahní na̱ ndo̱hó xi̱hín yu̱u̱ ta cáa tucu ri ndó cu̱hu̱n ndo̱ cúni̱ ndo̱ —na̱cachi na.

⁹ Joo sa̱ xíni̱ Jesús ña̱ cáma̱ní xi̱nu̱ qui̱vi̱ quivi a sa̱há ña̱ cán quéa̱ na̱cachi a já xi̱hi̱n ná: —Cande̱hé ndó. U̱xu̱ i̱vi̱ hora ndáca in qui̱vi̱ ta tá xíca nuu na ndiví a̱ cúu toho cachihin sa̱ha̱ ná jáchi̱ tívi xícá yéhe̱ nu̱ xíca na.

¹⁰ Joo ndá na̱ xíca nuu ñuú cuu cachihin sa̱ha̱ ná jáchi̱ co̱ yéhe̱ nu̱ xíca na —na̱cachi Jesús.

¹¹ Tá na̱ndihi já na̱cachi tucu a já xi̱hi̱n ná: —Sa̱ na̱qui̱ji̱ va amigo yo̱ Lázaro viti. Joo víla̱á cu̱hu̱n i̱ ndiñehe e̱ da̱ —na̱cachi Jesús.

¹² A̱nda̱ já na̱cachi na̱ cán já xi̱hi̱n á: —Maestro, tá ta̱ na̱naá ini da na̱qui̱ji̱ dá já quéa̱ íin va̱ha da, dá já —na̱cachi na̱ cán.

¹³ Joo ña̱ cúni̱ cachi Jesús quéa̱ sa̱ na̱xi̱hi̱ va Lázaro va̱tí na̱ xíca tuun xi̱hín a̱ cán na̱ca̱hán na̱ ña̱ cúni̱ mé á cachi a quéa̱ na̱qui̱ji̱ Lázaro cán tá quia̱hva quíji̱ tócó ndihi ña̱yivi.

¹⁴ A̱nda̱ já na̱ca̱ha̱n cáxí táhyí tucu Jesús xi̱hi̱n ná já na̱cachi a já: —Na̱xi̱hi̱ va Lázaro.

¹⁵ Joo cáji̱i̱ va ini i̱ ña̱ co̱ó i̱ ná sahi̱in i̱ tá na̱xi̱hi̱ da̱ jáchi̱ ña̱ yóho chindeé a̱ ndo̱hó já ná candúsa chága̱ ndó ye̱he̱. Cóho̱ cande̱hé yo̱ Lázaro —na̱cachi Jesús.

¹⁶ A̱nda̱ já na̱casáhá Tomás, da̱ cáha̱n na̱ cuátí xi̱hi̱n cán cáha̱n da̱ xi̱hín java ga̱ na̱ xíca tuun xi̱hín Jesús já cáchí da̱ já: —Cóho̱ ri mí ví quiví xi̱hi̱n mé dá, dá já —cáchí da̱. Já na̱quee na cua̱ha̱n na̱.

¹⁷ Tá na̱xi̱nu̱ co̱o Jesús yati ñuu Betania cán já na̱ñe̱he̱ á tu̱hun ña̱ sa̱ na̱xi̱hi̱ Lázaro ta sa̱ íin co̱mí qui̱vi̱ na̱chica̱a̱n va na da̱ ini in cáva̱.

¹⁸ Mé ñuu Betania cán ñéhe táhan yati a xi̱hín Jerusalén tátu̱hun u̱ni̱ kilometro ñéhe táhan.

¹⁹ Ta cua̱ha̱ táhan na̱ Israel cán na̱sa̱ha̱n na̱ ndúu tóo na xi̱hi̱n Marta xi̱hi̱n María tá quia̱hva jáya̱ha na ini na sa̱há ña̱ na̱xi̱hi̱ Lázaro quia̱hva na.

²⁰ Ta tá na̱ñe̱he̱ Marta tu̱hun ña̱ cáyati Jesús ñuu cán cua̱ha̱n já ndáva ñá na̱sa̱ha̱n ñe̱he̱ ñahá ña̱. Joo na̱cando̱o María vehe.

²¹ Tá na̱ndique táhan Marta xi̱hín Jesús já na̱cachi ñá já xi̱hi̱n á: —Xitoho, tá ná coo ndó yóho ta ni a̱ quíví toho Lázaro quia̱hva i̱, nduu.

²² Joo cánda̱a̱ va̱ha ini i̱ ña̱ tá ná ca̱ca̱ ndó ña̱ cúni̱ mé ndó nu̱ Ndióxi̱ quia̱hva va mé a̱ cán ña̱ nu̱ ndo̱ —na̱cachi Marta.

²³ A̱nda̱ já na̱cachi Jesús já xi̱hi̱n ñá: —Cande̱hé Marta. A̱ ndícani inún jáchi̱ nditacu tucu va Lázaro, quia̱hvún ja̱n —na̱cachi Jesús.

²⁴ A̱nda̱ já na̱cachi ñá já xi̱hi̱n á: —Sa̱ xíni̱ vi̱ ña̱ nditacu tucu quia̱hva i̱ tá ná xi̱nu̱ co̱o qui̱vi̱ nu̱ ndíhí tá ná nditacu tócó ndihi na̱ sa̱ na̱xi̱hi̱ —na̱cachi Marta.

²⁵ Já na̱cachi Jesús já xi̱hi̱n ñá: —Ye̱he̱ cúú da̱ cuu caja ña̱ ná nditacu tucu ndi̱i ta cuu caja i̱ ña̱ ná catacu ña̱yivi a̱nda̱ ama cáa qui̱vi̱. Ta ndá na̱ cándeé ini ye̱he̱ va̱tí ná quivi na catacu tá catacu na.

²⁶ Ta tócó ndihi na̱ cándeé ini ye̱he̱ catacu na a̱nda̱ ama cáa qui̱vi̱ ta a̱ ndíhi toho sa̱ha̱ ná ini indayá. Á cándúsún ña̱ cáha̱n i̱ xu̱hu̱n —na̱cachi Jesús.

²⁷ A̱nda̱ já na̱cachi Marta já xi̱hi̱n á: —Cándúsa i̱ ndo̱hó ña̱ cúú ndó in túhún ji̱ni̱ já ja̱hyi Ndióxi̱ ta cándúsa i̱ ña̱ mé ndó cúú Cristo, da̱ na̱chindahá Ndióxi̱ quixi ñuyíví yóho —na̱cachi ñá xi̱hi̱n á.

²⁸ Tá na̱ndihi já na̱quee Marta na̱sa̱ha̱n ñá cana ñá María qui̱hvi̱ ña̱. Ta já na̱ca̱ha̱n ya̱á ña̱ xi̱hín María já na̱cachi ñá já xi̱hi̱n ña̱: —Sa̱ na̱xi̱nu̱ co̱o Jesús, xitoho í ta íin a yóho. Cuáhán nu̱ íin a jáchi̱ cána yo̱hó —na̱cachi Marta xi̱hín qui̱hvi̱ ñá.

²⁹ Tá na̱xini jo̱ho María cán ña̱ na̱cachi qui̱hvi̱ ña̱ xi̱hi̱n ña̱ chí i̱vi̱ la̱á ndáva ñá na̱sa̱ha̱n ña̱ nu̱ íin Jesús.

³⁰ Mé Jesús na̱sandati a cán yuhú ñuu, mé nu̱ú na̱ndique táhan xi̱hi̱n Marta cán.

³¹ Ta ndaja coo mé na̱ Israel, na̱ ndúu jáya̱ha ini ñá cán tá na̱xini na na̱quee númi̱ joho ñá cua̱ha̱n ña̱ já na̱ndicui̱ta na ndíco̱ na̱ ja̱ta̱ ñá cua̱ha̱n na̱. Jáchi̱ na̱ca̱hán na̱ cua̱ha̱n ñá cuacu ñá nu̱ ndáca̱a̱n Lázaro, quia̱hva ñá.

³² Ta tá na̱xi̱nu̱ co̱o ñá nu̱ íin Jesús já na̱caxítí ña̱ nu̱ á já na̱casáhá cáchí ña̱ já xi̱hi̱n á: —Tá ná coo ndó yóho, nduu ta ni a̱ quíví toho Lázaro quia̱hva i̱ —na̱cachi ñá.

³³ Ta tá na̱xini Jesús ña̱ sácu cóhó María xi̱hín na̱ Israel, na̱ ndíco̱ na̱sa̱a̱ xi̱hi̱n ñá cán já na̱ta̱hvi̱ ndiva̱ha ini a ja̱nda̱ quia̱hva na̱ndisa̱a̱ ini a.

³⁴ A̱nda̱ já na̱nda̱ca̱ tu̱hún a̱ María cán já na̱cachi a já xi̱hi̱n ña̱: —Ndájá na̱chica̱a̱n ndó da̱ já —na̱cachi Jesús. —Na̱ha̱ quíi̱ ndó, xitoho i̱. Cande̱hé ndo̱ nu̱ú na̱chica̱a̱n nde̱ da̱ —na̱cachi María.

³⁵ A̱nda̱ já na̱sacu Jesús.

³⁶ Tá na̱xini na̱ Israel ña̱ yóho já na̱casáhá cáchí xi̱hi̱n táhan na já: —Cande̱hé ndo̱ ndaja náha̱ na̱qui̱hvi̱ ini Jesús yóho Lázaro —na̱cachi na.

³⁷ Ta java na na̱casáhá cáchí na̱ já: —Mé Jesús yóho na̱suná da̱ nduchú núú na̱ cua̱á. Á chí a̱ cu̱ú cuití caja da chindeé da̱ Lázaro já ná a̱ quíví da̱, nduu —na̱cachi java na̱ cán.

³⁸ Tá na̱ndihi já na̱casáhá táhvi̱ ndiva̱ha tucu ini Jesús ta já na̱cayati a nu̱ú na̱chica̱a̱n na̱ yiquí cu̱ñu Lázaro. Mé nu̱ú ndáca̱a̱n da̱ cán na̱sa̱cuu a in ndi̱ca cáva̱ ta in yu̱u̱ jáhndá cáhnu na̱saji nuu yéhé cán.

³⁹ A̱nda̱ já na̱ndica̱ha̱n Jesús xi̱hín java na̱ ndúu cán ña̱ ná jácaxoo na yu̱u̱ ndájí nuu nu̱ ndáca̱a̱n Lázaro cán. Joo ndaja coo Marta, ña̱ cúú quia̱hva mé ndi̱i cán na̱casáhá ña̱ cáchí ña̱ já xi̱hín Jesús: —Cande̱hé ndo̱, xitoho i̱. Sa̱ quini cúú sáhan ndi̱i quia̱hva i̱ ja̱n jáchi̱ sa̱ íin co̱mí qui̱ví na̱xi̱hi̱ da̱ —na̱cachi ñá.

⁴⁰ A̱nda̱ já na̱cachi Jesús já xi̱hi̱n ñá: —Xíní ñúhú ndicu̱hu̱n inún tá na̱cachi i̱ xu̱hu̱n ña̱ tá ná candúsún Ndióxi̱ já cunún ndá quia̱hva cáhnu ña̱ha cuu caja mé á —na̱cachi Jesús.

⁴¹ Tá na̱ndihi já na̱jácaxoo na yu̱u̱ cáhnu ña̱ na̱saji nuu nu̱ú na̱sa̱ndaca̱a̱n Lázaro. Já na̱ndiñehe Jesús nu̱u̱ á chí indiví já na̱cachi a já: —Tátá Ndióxi̱, ndíquia̱hva i̱ ndixa̱hvi nu̱ ndo̱ jáchi̱ na̱xini jo̱ho ndó nu̱ú na̱ca̱ha̱n i̱ xi̱hi̱n ndo̱.

⁴² Va̱tí mé a̱ nda̱a̱ cánda̱a̱ va̱ha ini i̱ ña̱ níí tiempo xíni̱ jo̱ho ndó nu̱ cáha̱n i̱ xi̱hi̱n ndo̱. Joo cáha̱n i̱ ña̱ yóho sa̱há ña̱ ná cuni jo̱ho ña̱yivi ndúu xi̱hín i̱ yóho já ná candúsa na ña̱ mé ndó na̱chindahá ndó ye̱he̱ va̱xi i̱ ñuyíví yóho —na̱cachi Jesús ndíquia̱hva ndixa̱hvi nu̱ Ndióxi̱.

⁴³ Tá na̱ndihi já na̱cayuhú cóhó a̱ já na̱cachi a já: —Lázaro, cuáhán queta.

⁴⁴ Tá na̱ndihi já na̱queta Lázaro nu̱ú na̱sa̱ndaca̱a̱n da. Na̱ca̱va nuu ndáha̱ dá a̱nda̱ sa̱ha̱ dá xi̱hín ti̱co̱to̱ ta ndáji jáhma̱ nu̱u̱ dá na̱queta da va̱xi da. A̱nda̱ já na̱cachi Jesús xi̱hín java na̱ ndúu cán ña̱ ná ndaxí na̱ da̱ já ná quee da cu̱hu̱n da̱. Ta já na̱caja na.

⁴⁵ Ta cua̱ha̱ táhan na̱ Israel, na̱ ndáca táhan na̱sa̱ha̱n xi̱hín María cán tá na̱xini na ña̱ na̱jánditacu tucu Jesús Lázaro cán já na̱candúsa na mé á.

⁴⁶ Joo java táhan na̱ Israel cán ndáva na na̱sa̱ha̱n na̱ cáha̱n na̱ xi̱hín na̱ fariseo ta na̱ndicani na nu̱ ná ña̱ na̱caja Jesús.

⁴⁷ A̱nda̱ já na̱casáhá na̱ fariseo xi̱hín na̱ sa̱cua̱ha̱ nu̱ú ju̱tu̱ cán na̱játaca na tócó ndihi na̱ sa̱cua̱ha̱ nu̱ú na̱ Israel já na̱cachi na já xi̱hi̱n ná: —Ndía̱ caja í xi̱hín Jesús viti jáchi̱ cua̱há ndiva̱ha ña̱ha xitúhún cája da̱ yóho.

⁴⁸ Xíní ñúhú caji nuu í nu̱ dá jáchi̱ tá ná a̱ cájí nu̱u̱ í nu̱ dá va̱xi qui̱vi̱ tá tócó ndihi ña̱yivi candeé ini na mé dá. Ta xi̱hín ña̱ yóho xi̱nu̱ ini na̱ jutixia ñuu Roma quixi na jándicani na veñu̱hu í ta jándihi na sa̱ha̱ tócó ndihi mí, na̱ Israel —na̱cachi na.