29 Na n‑teku María tnuꞌu jaꞌan Tmarta, te yachi n‑ndojuiin‑i, te juaꞌan‑i nuu ndetu Jesús.
30 Te ta xee ka Jesús ñuu Betania. Dani ndetu‑ia nuu n‑nanitnaꞌa Tmarta xiꞌin‑ia.
31 Te veꞌe ijan xyuku kueꞌe ñayiu Israel xiꞌin María, xa juñaꞌa koio‑i tnuꞌu kanu ini nuu‑i. Na n‑ka xini‑i xa yachi n‑ndojuiin María te n‑kee‑i veꞌe, te n‑ka xe kuitandijun ñaꞌa‑i. N‑ka xani ini‑i xa juaꞌan María panteón, xa ndaꞌi‑i xaxeꞌe kuꞌa‑i.
32 Te n‑kixee María nuu tuu Jesús. N‑xini‑i‑ia, n‑nduandee‑i xeꞌe‑ia. N‑jaꞌan‑i: —Xtoꞌo‑da, nux n‑xo tuu‑n yaꞌa, te ma kuú kuꞌa‑da n‑kuu.
33 Na n‑xini Jesús xa ndaꞌi María, te ka ndaꞌi ñayiu Israel vaxi xiꞌin‑i, yo n‑kiti ini‑ia te n‑tnau ini‑ia.
34 N‑jaꞌan‑ia: —¿Ndexu n‑chinduxi‑n‑sɨ? Te n‑ka jaꞌan‑i: —Xtoꞌo‑da, neꞌe‑n, te jini‑n.
35 Te n‑ndaꞌi Jesús.
36 Ñayiu Israel xyuku ijan n‑ka ndatnuꞌu‑i: —Kundeꞌa xa yo n‑xemani‑s‑sɨ.
37 Ko dava‑i n‑ka jaꞌan: —N‑kida‑s xa kuaꞌa se kuaa xa kundeꞌa‑s. ¿Ña n‑kuaꞌa‑s xa kada‑s xa maxku kuú Lázaro a?
38 Ɨnka vuelta kueꞌe xa kueꞌe n‑tnau ini Jesús, te juaꞌan‑ia nuu n‑ka chinduxi‑s ndi Lázaro. Ɨɨn yau kava kuu, te n‑xo ndenee ɨɨn toto kaꞌnu yuyau jan.
39 N‑jaꞌan Jesús: —Dita toto de. Ko n‑jaꞌan Tmarta, kuꞌa ndi Lázaro: —Xtoꞌo‑da, xá xeꞌen teꞌyu‑i vitna, chi xá n‑kuu koon kɨu yɨnduxi‑i.
40 N‑jaꞌan Jesús: —Te, ¿ñadu n‑jaꞌan‑r xa nux jandixa‑n, te jini‑n xa kunxaꞌnu ka Ianyuux dada ntdaa xa io?
41 Xijan kuu xa n‑ka dita‑s toto kaꞌnu nuu yɨnduxi ndɨyɨ. Nukondeꞌa Jesús andɨu, n‑jaꞌan‑ia: —Taa‑da, n‑kutaꞌu‑da xa n‑teku‑n tnuꞌu‑da.
42 Naꞌa‑da xa ntdantuꞌu kɨu nini‑n tnuꞌu‑da, ko n‑jaꞌan‑da xaxeꞌe ñayiu xyuku yaꞌa, xa na jandixa koio mee‑i xa mee‑n n‑tundaꞌa ñaꞌa mee‑da.
43 Na n‑jaꞌan‑ia tnuꞌu yaꞌa, te n‑kana xee‑ia: —Lázaro, ¡ta kee, neꞌe yaꞌa!
44 Te n‑ndee se n‑xiꞌí xiti yau. Duku daꞌma ndaꞌa‑s, xeꞌe‑s, te daꞌu daꞌma nuu‑s. N‑jaꞌan Jesús nuu ñayiu xyuku ijan: —Nandaxi koio ndaꞌa‑s, xeꞌe‑s, xa kuaꞌa‑s xa nakaka‑s.
45 Xijan kuu xa kueꞌe ñayiu Israel n‑ka jandixa Jesús. N‑ka kixee‑i xa juñaꞌa‑i tnuꞌu kanu ini nuu María, te n‑ka xini‑i nax n‑kida Jesús, te n‑ka jandixa‑i‑ia.
46 Ko dava‑i juaꞌan nuu xyuku se fariseu, te n‑ka najani‑i ntdaa xa n‑kida Jesús.
