4 Baṉara heheda, qetu nia Goi gua sapu toṉoto; ele va tana va toṉotia Goi gua sapu garo koari na tie Izireli. Ele evaṉia Goi sa tinoṉoto meke sa lineana koarini.
5 Vahesia se Zihova sa nada Tamasa; mi hoqa vahesia pa kenuna Sa Nana habohabotuana baṉara! Na hopena si Asa.
6 Ari Mosese, e Eroni, meke sari tudia si na hiama te Tamasa, meke e Samuela si na tie pu varavara la koa Sa; sari kasa hire si hoke tepatepa la koa Sa, meke avosi Sa si arini.
7 Zama la koa rini sa Tamasa pa korapana sa lei sapu turu sage guana dedegere lavata, va tabei rini sari na tinarae na ginarunu pu poni ni na tozi ni Sa.
