3 Na Anutue natanggamataawanu musipmaatangu kwanam sikut. Atnatayuwawa gan musipmaatangu meya sikut.
4 Anutu, gata dua nandutewi dapuna pekum. Natapanu natane musipmaatangu meya siknga sikut. Unzingge na wamu yananga dua.
5 Sike natdetnaatangu tapduu tupa siknga nanae natapbum. Siakan siknga, na nakan bamu apu napbikingge gatuna natapbum.
6 Sike zikaane nata natdetdetbam pake yukum. Yuke tupa kap taisika tasikum takngae asinggan natayukum. Natayuke natdetdetbam pake ninae anzing yakwaikum.
7 Asikaya Buyambam tapata masa asinggan ba namik? Ba asikaya nae apmea take dua ba natangamik?
8 Gatu nae butaya tupa natangamukut taknga apmanu dua ba natangamik? Wamu yawan kekekakut taknga gwamba pimakut, ba dasing?
9 Asikaya Anutu ninde gwa ba botakutde musip kwikwiu dua natanimik? Ba kaanga akngata ba musip kwikwik kaknga umukut?
10 Sike meya waakngae natake nata anzing natapbum, Asikaya Anutu enane siknga yuak kapata natapan siwan apba napmakut. Unzingge na sanga waakngae natake iniwit.
11 Apmanu Anututa puya buyambam taknga aknga pasikutde gatu natapit. Ngan, nata sanga buyambam inata inata tupa pasikuyakge gatuna natatakuuwit.
12 Nata sangabamu pasikuyakge natapasiwit. Gata puya kekeknga pasikuyak, ge nata iatdeat kuut natapit.
13 Anutu, gatane yuyukga take siwan noman gan siknga. Sike anutu pupuknga tapatuat gaat ina unzakan dua. Gata anutu pupuknga waakwau asiknga yapbikuyak.
14 Anutu, ga awia apatakan, sanga duya takngatu takngatu pasinggayak. Sike gata kekekngaka buyambam taknga aminu kepna kepna yukingu kuupbamde yeuyamunggayak.
15 Gikane kekeknga waakngane amindabamu gatuka pakuyak. Sike wa pakuyau Jekopat gatu Josepatdane bapuna masan aakingunin pakuyak.
16 Anutu, tupa yangga anga anga ganduke akgwauking. Gwauke yanggabam gwenu miamun sitakukut. Ngan, keu yanggabam amakatangu kutakngi komune yuaingu saasitakukut.
17 Sike sopa enandangga buyambam siknga taawan gakngat gwekaa buyambam siknga kaapmapa yakut. Yaawan yapasik kaa kuwan apan kuupbam sikut.
18 Gata tasiwi gakngat gwenu got taknga pinggu yemi dakngakutde banakan katang yakut. Sike yapasikga siwan kepna kepna kuupbam kakaa sikut. Siwan kepdaka ayamuyamu yuuk yukut.
19 Gata yanggabam gwene banakan kukuyak. Ngan, gatane kepiapaka yanggabam gwende banakan yuak. Siwan ngana kepi tangga aminu tapatuta kananga dua singgak.
