4 Ura sa zinama te Zihova si hinokara na toṉoto, meke ta ronuena si Asa koari doduru Nana tinavete.
5 Qetu nia e Zihova sa tinoṉoto meke sa vinilasa va toṉoto. Sa nana tataru nabuna si koa pa doduruna sa kasia popoa.
6 Pa zinama te Zihova si tava podaka sari na maṉauru, sa rimata, na sidara, na pinopino, meke doduru likakalae pu koa vasina.
7 Varigara ni Sa sari na kolo lamana pa keke vasina, va naqiti Sa si arini pa vasina lohidi, guana kopu ni Sa pa keke lose.
8 Sari doduru pa kasia popoa si madi pamaṉa nia se Zihova; madi va lavatia ri doduru tinoni pa kasia popoa si Asa.
9 Ura zama si Asa meke ta kuri sa kasia popoa, pa Nana zinama si podaka vura mae sari doduru likakalae.
10 Huara pani e Zihova sari na hiniva kaleadi tadi na butubutu meke hukati Sa si arini, pude di lopu gorevura gua saripu kuhana veko ni rini!
11 Ba sari Nana minizimizi na Nana ṉati hiniva si turu hola ninae rane ka rane.
12 Tamanae tugo sa butubutu sapu e Zihova sa dia Tamasa, meke sari na tinoni pu vizati Sa pude Nana telena soti.
13 Doṉo gore mae gua pa Maṉauru sa Tamasa, meke dogoro betoi Sa sari doduru tinoni pa kasia popoa.
14 Na Baṉara lavata si Asa, meke doṉo gore mae koari doduru tinoni pu koa pa pepeso.
15 Va podaki Sa sari bulodi rina tie, meke tumae valeana beto ni Sa sari na dia tinavete.
16 Lopu tava sare koari na kana sa baṉara koari na sinokudi gua rina tie pa nana qeto minate varipera, meke na tie varipera si lopu mataqara pa nana ṉiniraṉira soti telena.
17 Sari na hose varipera si lopu boka mataqara ni goi pa vinaripera, sari na dia ṉiniraṉira si lopu boka harupigo.
18 Kopu totoko ni e Zihova sarini pu pamaṉa nia si Asa, meke sarini pu kalavarae koasa Nana tataru nabuna.
19 Harupi Sa si arini pa minate. Kopu ni Sa si arini pude lopu mate pa totoso soṉe.
20 Raṉea gita se Zihova, Asa sa nada lave, meke nada tinokae.
21 Qetuqetu nia gita se Zihova, ura raṉea gita sa Pozana hopena Sa.
