1 Kzdq nzaongr drtwr kx yr Devet. Doa kx nzipq mz alwx ngrde Drtwrde elalz-zlwzm.
2 Murde mz nzobqkr Yawe trvz-rbrpeu. A' plzpxle alwx rdeng murde ma tqyc-kapq da kxtrka mz nabzde.
3 Yawe, mzli kc tqpxtxpx-ngrne nzplzpx-krbo alwx rngeng bam, Drtqnge satx zlwz mz nzetq-zvz-krde.
4 X drtqnge tropx-pnzu mz nzayrplapx-krm ninge ngrlx x mz nrlckxbq. X yangrngatxpex nzapu-krnge lxbi kcng tqngibr mz nepi.
5 Pnzpe drtwrnge kx naplzpxbo alwx rngeng bam. X mz nzplzpx-krboleng, trpnzngr kx yrlq-kapqbo bam. Delc tqipqpe-ngrn ninge, X katxpx-ngrbzme nzmrlepukr alwx rngeng amrlx.
6 X nigr leplz nemqng nakrka'bzkr bam mzli ka. Murde mzli kc nzkxpungr na-apune-ngrmle nrc kc tqoda, Trtxpnzngr nzkrlz-krmlr nigr.
7 Nim me rlakitrx x ayrbqpxq ninge mz da kxprtz. Mzli lc tqxlrx nabz kxyrlvi kx nim nou nzrlapxngr.
8 Rpim Yawe kx, “Sa na-aelwa-ngrbo bam lrpzki kc nao-zliq, Mz nzmailz-krnge nim.
9 A' bzkq apuq hcsi kx narde mqngi, Kx vz-nqblqle me pnz drtwr ncblo mz nqvi kcng tzpetrpz bade.”
10 Kxdrka'-ngrng sa na-ayrplapxng mz alwx ngrdrng. A' nigu kcng tqbrti drtwrgu Yawe sa namcku kx aodu-zvzle nigu.
11 Nigu kxnztubqng na-angrlvz-ngrgu Yawe. Na-abrtz-ngrgu nide.
