1 Buyambam tapa, ga natane gatak gatak kapana. Nata gae yanggawake sikgawaawa maak pake natangamuyo. Sike gata natane tumuk wama natake sanga takngatu dua tasiwinu, na akupsa amin binga dakngawit.
2 Siwan nata tapduu akgatangamiyakge yawanu, gata natane tumuk wamae natapso. Sike nata tumuk wamu yayuk kataknga tangenake yotdae katapmiyuk tumuk wamu yanggau natapso.
3 Sike aminu kunduta notnaapae kaaya wam yanikaing, ngana natdetdeu wai musiane doke yuaing. Siwan gata naat gatu wai aminu waakwakat ma kaipakapapuke nisipim.
4 Gata waaminu waiaknga tasikaingu pandambanuyo. Waiaknganae buyana inandek inandek asiknga yamuyo. Ngan, waaminde toknga siknga yamuke asiknga pandambanuke pasiwi mainong.
5 Sike waaminu puya buyambamu Buyambam tapata tasikutde dua natapasikaing. Unzingge ita waaminu pandambanuke gatukande pasiwan sopuning. Siwan ita waaminu gatuna dua gatayamik.
6 Siwan nata Buyambam tapatane umana yatangenakgat. Dasingge, nae musip kwikwik natangamikge natake ie tumuk wam yatawaawa gwa natapbut.
7 Anututa ina siknga na kekekngamuke kakuya tasike wamanapmanggak. Nata ie banip siwa Buyambam tapata na akgatangamunggak. Ge nata ie asiknga baknganggat. Bakngake nata kap taike umana yatangenakgat.
