1 Buyambam tapa, gata natane musipma gwa usanzike nae asiknga nataayak.
2 Siakan. Sanga nata tasinggau kuupbamu gata atnataayak. Ngan, nata pukuyuwit ba dandam tangan yuwit siwan ngana gata keu komdune maa yukengu sanga tasinangge nataau atnataayak.
3 Ngan, nata epuke kuwit ba dapuna petnangge tasiwit, siwan ngana gata natane yuyuknga kuupbam atnataayak.
4 Buyambam tapa, nata wamu takngatu ba yanangge tasiwanu wamu waaknga gata gambok nataayak.
5 Natake gata na zaneka kuwawanu gata nandukakaike na gikane kekeknga akngane nanduyuwayak.
6 Siwan gatane natdetdetda unzing wa nataayak kaknga enane siknga. Siwan natane natdetdetna ayapbikgak.
7 Siwan nata zane kuke gatane waung kapaka yuwau tewit? Ngan, nata zane datakuke gae kusopuwit?
8 Sike nata yekaune akoke yuwiu, ga yekaune ayuayak. Gatu nata aminu gwa kumbingga yuaingune paku yuwiu gakaya waomune ayuayak.
9 Siwan nata tembana siknga enake kwaitda binga bepmake maa siknga yanggabam gwene kautdu saak komune ba kuwit, ba paku gunzitda akonggaune ba pukunggaune ba kuwit. Ga waomune kuut ayuayak.
10 Ga waomuneaya ayuke kepina tanomanuke gata na katakgata take akgatangamuya.
11 Sike nata gatu anzing ba yawit, “Zikaandakata na takusopuwik. Siwan kakaa gunzitdaneta na takumbasiwanu wa zikaandaka siwik,” ngang yawit.
12 Siwan ngana undanga, gata zikaa wandaka kawi zikaa daka kakaa gunzitda binga isinggak. Zikaandaka kawi kupakupan gunzitda tasinggak binga singgak. Dasingge, zikaandaka gatu kakaa aknga ngangu gae kaine ina unzakan.
13 Siwan gata sanga natane gupma apaatang yuaingu kuupbam gata pasikuyak. Sike gata na mingae musipnaatang yukum komune, natane gupmaat gatu kwatana ngang gata pasike peke tanomanukuyak.
14 Siakan. Duya kekeknga takngatu takngatu pasikuyak binga. Unzingge nata gatane umanda ayatangenakgat. Sangabamu gata pasikuyau inata siknga siwan gwaam siknga. Siwan nata sanga waakngae katak siknga atnataat.
15 Sike tapduu na mingae musipnaatang yukum komune natane gupma ba kwatana kuut gikane kaikane kusopuknga dua yukut. Ngan. Nata mingatane musiaatang kusopuke wepda wepda takakumu gata kaawi kwatana unekan apuke ngwakapan kakuyak.
16 Gata na mingata dua tangaiwawanu gata na atnandupbuyak. Nata keu andakane dua apuwawa nae buu gikane gopatangu nata keu andakane tapdukbamu yuwitde gwa matakuyak.
