8 ¡Dule-ibmar-aku-itomalad, be magar itomala! Bemar binsaed-satemaladi, ¿sanagwadse be binsaed-nika gumaloe?
9 Ar dule-anmarga-uaya-nasiksadi, ¿itogosuli? Ar dule-anmarga-ibya-sisadi, ¿dakosuli?
10 Ar dulemar-ibmar-noar-imaksad-onudakedi, ¿sabsur-odurdakosur be ebinsae? Ar dule-ibmargi-odurdakedi, ¿ibmar-wisguosur be ebinsae?
11 Bab-Jehová dulemar-binsaed bela wisid, Bab-Jehová wisid, dulemar unnila yogasaar binsamalad.
12 Bab-Jehová, dule-ibmar-noar-imaksad be nudakedi, we-dulegi be ise-nued binsasad. Be, be-igar-maidgi-dule-odurdakedi, we-dulegi be ise-nued binsasad.
13 We-dule, ibagan-bulegangi gwage-bogidiki gudiguoed. Dule-isganagardi, diglegega napa gwislegoed.
14 Bab-Jehová e-dulamar obanosulid. Bab-Dummad, e-dulamar-egadga-imaksad wargwen metosulid.
15 Igar-nabolegedi igar-innikigwadba imaklegoed, bela dule-gwage-inniki-gudimalad, igar-maidba damaloed.
16 ¿Doa, dule-isganamar-abin an-irwa gwisgusa? ¿Doa, dule-isganamar-abin anba nagusa?
17 Ar Bab-Jehová an-bendaksasulina, bato an napa-uluba bergus mellemainad.
18 Bab-Jehová, an sogsagusgu, “an bergudaniye,” be-sabgued-nikadba yog be an-bendaknoni gusad.
19 An bela-bela suli-suli-itogedgine, baisur-itogega be an-imaksad, weligwaled be anga uksad.
20 Bab-Jehová, reymar-isganamar-e-aiga geg be gued. Ar we-reymar ibmar-isgana-imakega igar-mesmalad,
21 dule-nuegangi-aibinega igar-amimalad, dule-ibmar-akar-imaksasulid-oburgwega imakmalad.
22 Ar Bab-Jehová an-edarbedid, an-Bab-Dummadid, akwasaila-an-odukuedyob gued.
