1 Nimitzhuicatis, TOTECO, para nochipa pampa tahuel hueyi moyolo ica na. Quena, nochi telpocame huan huehuentzitzi niquinpohuilis para ta nelía titemachti.
2 Na niquijto: “Ta titetasojtas para nochipa. Huan nochipa tiitztos titemachti san quej para nochipa huejcahuas ilhuicacti campa tiitztoc.”
3 Ta tiquijtojtoc para tijchijqui se camanal sencahuali ica motequipanojca David cati tijtapejpenijtoc. Titatestigojquetzqui ten taya tijchihuilis.
4 Tiquilhui para se iixhui mosehuis ipan isiyaj campa yaya tanahuatía, huan nopona tanahuatis para nochipa.
5 TOTECO, cati itztoque ipan ilhuicac mitzpaquilismacaj por nochi nopa tiochicahualnescayot cati tijchihua. Huan miyac millones moilhuicac ejcahua mitzhueyimatise pampa titemachti.
6 Pampa ipan nochi ilhuicac amo aqui seyoc cati san se quej ta, Toteco Dios. Huan yon se ilhuicac ejquet amo quipiya chicahualisti quej cati tijpiya ta, Toteco.
7 Toteco Dios, ta nelía tihueyi huan titemajmati. Nochi motatzejtzeloltijca ilhuicac ehuani mitztepanitaj. Quena, nochi cati mitzyahualojtoque, majmahuij quema moquetzaj moixpa.
8 TOTECO, ta tiDios Cati Tijpiya Nochi Chicahualisti, ¿ajquiya seyoc tahuel quipiya chicahualisti quej ta? ¡Amo aqui seyoc! San ta TOTECO tahuel tijpiya chicahualisti. San ta nelía titemachti.
9 San ta tihueli tijtacahualtía nopa hueyi at quema mosisinía huan mocoxonía chicahuac. Tijtacahualtía huan quichihua cati tiquilhuía.
10 Ta tijtzontamilti nopa cati temajmatiyaya ipan hueyi at. Ica mohueyi chicahualis tiquinsemanqui mocualancaitacahua.
11 Ta moaxca ilhuicacti, taltipacti huan nochi cati onca, pampa nochi tijchijchijqui ta.
12 Tijchijchijqui nopa norte huan sur. Nopa tepeme Tabor huan Hermón paquij pampa ta tiquinchijchijqui.
13 Moajcol tahuel quipiya chicahualisti. Huan monejmat quipiya tetili huan miyac yajatili para tatanis.
