2 Achicyaypa achicyar yurircushpayqui washaycuy Efrainpita, Manasespita, Benjaminpita mirajcunataga. ¡Munayniquiwan nogacunata salbaycamay ari!
3 Tayta Dios, ñaupatano alli goyänäcunapaj yanapaycamay. Alli ñawillayquiwan ricäramay ari salbasha canäcunapaj.
4 Israelcuna mañacuycäshuptiquipis ¿imaycamaraj rabyashalla caycanqui munayniyoj Tayta Dios?
5 Chay-jina wagayllawan weguillätanami upuycäpis. Pasaypa wagashä weguillänami yacöpis.
6 Nogacunataga cachaycamashcanquimi bisïnöcuna manacajman churamar cushipämänanpaj, chiquimajcunapis asipämänanpaj.
7 Munayniyoj Tayta Dios, ñaupatano alli goyänäcunapaj yanapaycamay ari. Alli ñawillayquipa ricäramay ari salbasha canäcunapaj.
8 Egiptupitami übas lantata apamurayqui. Mana rispitashojcunataga chacrapita jitarishcanqui chay übasta lantanayquipaj.
9 Chacrata sumaj picharcurmi lantashcanqui. Lantanami sapichar intëru nasyunman juntasha.
10 Puntacunatapis chapasha llantupänanpaj. Rämancunapis sedrucunata chapasha.
11 Räman lätar aywajcunaga chayasha Mediterráneo lamarcamami, inti yagamunan caj-läpanami Éufrates mayucama.
12 Cananga ¿imanirtaj guenchancunata tunichishcanqui? Päsaj fiyu runacunapis wayuyninta pallacurcaycanmi.
13 Munti cuchicunapis pedäsumi ruraycan. Jirca animalcunapis ushacurcun.
14 Munayniyoj Tayta Dios cutiycamuy ari. Übas lantayquitaga syëlupita-pacha sumaj ricaycuy.
15 Chay übastaga quiquiquimi lantarayqui. Chillguiptenga quiquiquipaj cananpämi ricarayqui.
16 Übasniquega mutur-ushashami, rupachir-ushashami caycan. Chaymi chayno rurajtaga fiyupa castigaycuy ari.
17 Munashayquino cawaj runata ichanga yanapaycuy. Acrashayqui runataga sumaj yanapaycuy.
18 Chauraga mananami nogacuna imaypis gongashayquipänachu. Cawachimay ari gampa jutillayquitana rimanäpaj.