4 Toteco, ta amo techcahuilía ma nicochi. Hasta amo hueli nicamanalti pampa tahuel hueyi ni notequipachol.
5 Talojtzitzi nimoyolilhuía ten nopa cuajcualtzi tonali huan xihuime cati panoque huejcajquiya.
6 Niquelnamiqui nopa yohualme quema nihuicayaya ica paquilisti. Quena, nimotajtachilía huan niquita para ama nochi tamanti tahuel mopatatoc.
7 ¿Huelis Toteco nechtahuelcajtoc para nochipa? ¿Huelis ayecmo quema nechpalehuis?
8 ¿Huelis ya tanqui itaicnelilis ica na? ¿Huelis ya tanqui cati achtohuiya techtajtolcahuili techmacas?
9 ¿Huelis Toteco Dios ya quielcajqui para monequi nechchihuilis cati cuali na cati niitztoc ipan tequipacholi? ¿Huelis tahuel cualantoc huan yeca ayecmo quinequi nechtasojtas?
10 Huan ipan nohueyi tequipachol nimoilhui: “Toteco Cati Más Hueyi mopatatoc. Achtohui niitztoya inejmat huan nechtiochihuayaya miyac, pero ama nechcualancaita.
11 Más cuali niquelnamiquis nochi nopa huejhueyi tiochicahualnescayot cati TOTECO nechchihuili huejcajquiya.”
12 Quena, mojmosta nimoilhuis ten nopa huejhueyi tamanti para nochipa. Amo hueli nijcahuas nimoyolilhuis ten yaya quichijtoc.
13 ¡NoTeco Dios, nelía tatzejtzeloltic nochi moojhui! Amo aqui seyoc dios cati más quipiya chicahualisti que ta, titoTeco.
14 ¡Ta tiDios cati tijchihua huejhueyi tiochicahualnescayot huan miyac tamanti cati masehualme quitachilíaj! Huan hasta ama quejipa tijnextía mohueyi chicahualis.
15 Ica mohueyi chicahualis techmanahui, timomasehualhua cati tiiconehua Jacob huan José.
16 Toteco Dios, nopa hueyi at cati itoca Chichiltic momajmati quema mitzitac. Huan huihuipicac hasta tatzinta campa más huejcata.
17 Nopa mixti quichijqui ma huetzi at chicahuac. Huan tatomonqui nepa ilhuicac. Huan nojquiya tapetanqui ten se lado hasta seyoc.
18 Caquistic tatomonilot ipan nopa hueyi ajcomalacat. Huan nopa tapetancayot quitaahuili nochi taltipacti, huan ni taltipacti huihuipicac.
19 Tijchijqui se ojti quema tiquixcotonqui nopa hueyi at, pero amo aqui quipanti campa tijquetztiyajqui moicxi.
